اپنی پارٹی کے سب سے مضبوط امیدوار اور سابق امریکی صدر ڈونالڈٹرمپ سے مقابلہ کرنے کا عزم، ملک کے مفاد کیلئے نئی نسل کی قیادت پر زور

 جنوبی کیرولینا کی سابق گورنر اور  اقوام متحدہ کی سابق سفیر نکی ہیلی نے بدھ کو ۲۰۲۴ء میں ریپبلکن پارٹی کی جانب سے امریکی صدارتی الیکشن لڑنے کا اعلان کر دیا۔ٹویٹر پر جاری اپنے ایک ویڈیو بیان میں نکی ہیلی کا کہنا تھا ،’’میں نکی ہیلی  ہوں ،  آئندہ صدارتی امیدوار کے طور پر قسمت آزمانا چاہتی ہوں۔ ‘‘
 اپنے ویڈیو پیغام میں اُن کا مزید کہناتھا ، ’’اب پیچھے ہٹنے کا وقت نہیں ہے، اب ایک مضبوط اور قابل فخر امریکہ کا وقت ہے۔ ملک میں معاشی بحران کے خاتمے ، سرحدوں کی حفاظت ،ملک کی مضبوطی ،  ہمارے وقار اور ہمارے مقاصد کیلئے یہ نئی نسل کی قیادت کا وقت ہے۔  ‘‘
 ؍  ۵۱سالہ گورنر امریکی صدارتی انتخاب لڑنے والی دوسری بڑی ریپبلکن امیدوار ہیں جبکہ وہ تیسری ہندوستانی نژاد امریکی ہیں جنہوں نے صدارتی الیکشن میں حصہ لینے کا اعلان کیا ہے۔ ۲۰۲۱ء میں انہوں نے کہا تھا کہ وہ وہائٹ ہاؤس کیلئے ٹرمپ کو چیلنج نہیں کریں گی لیکن حالیہ مہینوں میں انہوں نے اپنا موقف تبدیل کرتے ہوئے کہا کہ اب نئی نسل کو آگے آنے کی ضرورت ہے۔دیگر ریپبلکن جن کو وہائٹ ہاؤس کی اپنی مہم شروع کرنے کا مشورہ دیا گیا ہے ان میں فلوریڈا کے گورنر رون ڈی سینٹیس اور سابق نائب صدر مائیک پینس شامل ہیں۔
 دوسری جانب آئندہ صدارتی انتخابات  سے متعلق پولنگ فرم’ ٹریفلگر گروپ‘ کے حالیہ سروے میں موجودہ اور ممکنہ امیدواروں کو شامل کیا گیا ہے جس میں ٹرمپ ۴۳ ؍فیصد کے ساتھ پہلے اور ہیلی ۱۲ ؍فیصد کے ساتھ چوتھے نمبر پر ہیں۔