اروندکیجریوال نے بھی پردھان کی مذمت کی اور طلبہ کی حمایت کی

مرکزی حکومت پر طلباء کی آواز کو دبانے کا الزام لگاتے ہوئے کانگریس صدر ملکارجن کھرگے نے وزیر تعلیم دھرمیندر پردھان سے استعفیٰ کا مطالبہ کرتے ہوئے کہا کہ ملک میں پیپر لیک ہونے کے واقعات سے کروڑوں طلباء کا مستقبل متاثر ہوا ہے، لیکن حکومت طلباء کی تشویش کو سنجیدگی سے لینے کے بجائے انہیں بدنام کرنے کی کوشش کر رہی ہے۔
  کھرگے نے بدھ کے روز سوشل میڈیا پلیٹ فارم ایکس پر ایک پوسٹ میں کہا کہ ملک میں۹۰؍ پیپر لیک ہوئے ہیں اوراس باعث کئی خاندان متاثر ہوئے ہیں۔ انہوں نے الزام لگایا کہ دھرمیندر پردھان طلبہ کی آواز کودہشت گردبتا رہے ہیں۔انہوں نے کہا کہ جو بھی حکومت سے سوال کرتا ہے، اسے غدار یا ملک مخالف قرار دینے کی کوشش کی جاتی ہے۔ کانگریس صدر نے کہا کہ ’چھاتروں کی گونج‘ پورے ملک میں بلند ہوگی اور کانگریس طلبہ اور نوجوانوں کے مفادات کی لڑائی جاری رکھے گی۔ انہوں نے دعویٰ کیا کہ طلبہ میں بڑھتے ہوئے غصے کے پیشِ نظر وزیرِ تعلیم دھرمیندر پردھان کو استعفیٰ دینا پڑے گا۔
 عام آدمی پارٹی کے قومی کنوینر اروند کیجریوال نے الزام لگایا ہے کہ پیپر لیک کے خلاف احتجاج کرنے والے طلبہ کو بدنام کیا جا رہا ہے۔ انہوں نے کہا کہ ملک کی مختلف ریاستوں سے دہلی آنے والے وہ طلبہ، جنہوں نے جنتَر منتر پر پیپر لیک کے خلاف مظاہرہ کیا، انہیں نشانہ بنایا جا رہا ہے۔ افسوس کی بات یہ ہے کہ انہیں ملک کو ٹکڑے ٹکڑے کرنے والا قرار دیا جا رہا ہے۔ انہوں نے کہا کہ طلبہ کی تحریک کو کمزور اور بدنام کرنے کے لیے انہیں ملک دشمن قرار دینے کا سلسلہ جاری ہے۔ مرکزی وزیرِ تعلیم دھرمیندر پردھان کی جانب سے ان طلبہ کو ’’ملک کے ٹکڑے ٹکڑے کرنے والے‘‘کہنے کے بیان پر اروند کیجریوال نے سخت اعتراض کرتے ہوئے جواب دیا ہے۔کیجریوال نے ایکس پوسٹ میں  کہا’’’’اتنا غرور؟ پیپر لیک کے خلاف احتجاج کرنے والے معصوم بچے ملک کے ٹکڑے ٹکڑے کرنا چاہتے ہیں، اور آپ ان کا مستقبل برباد کرکے ملک کو بچا رہے ہیں؟ انہوں نے کہا کہ عام آدمی پارٹی پیپر لیک کے خلاف احتجاج کرنے والے طلبہ کی حمایت میں کھڑی ہے۔ انہوں نے کہاکہ پیپر لیک اربوں اور کھربوں روپے کا کاروبار بن چکا ہے ۔