کسان لیڈر راکیش ٹکیت نے کہا کہ ایم ایس پی کیلئے کمیٹی بنانے کا وعدہ کیا گیا تھا لیکن اب تک کوئی پیش رفت نہیں ہوئی، اس لئے دوبارہ احتجاج ہو گا

کسانوں کے قد آور لیڈر راکیش ٹکیت نے  ایم ایس پی پر کمیٹی بنانے کے معاملے میںمودی سرکار کی وعدہ خلافی پر سخت برہمی ظاہر کرتے ہوئے دوبارہ آندولن شروع کرنے کا  انتباہ دیا ہے۔ انہوں نے پورے ملک کے کسانوں سے اپیل کی کہ وہ ۳۱؍ جنوری کو اپنے اپنے اضلاع میںضلع کلکٹر یا مجسٹریٹ کے دفاتر کے سامنے جمع ہوں اور احتجاج کریں۔ٹکیت کے مطابق کسان کا احتجاج ختم کرواتے  وقت حکومت نے وعدہ کیا تھا کہ وہ  چند روز میں ہی  ایم ایس پی کے لئے کمیٹی بنادے گی لیکن اب تک اس تعلق سے کوئی پیش رفت نہیں ہوئی اور نہ حکومت کی جانب سے کوئی جواب دیا جارہا ہے۔ اسی لئے ہم نے اپنے کسان بھائیوں سے اپیل کی ہے کہ وہ ۳۱؍ جنوری کو سرکاری دفاتر پر جمع ہوں اور احتجاج کا اعلان کریں ۔
 راکیش ٹکیت نے کسانوں پر درج مقدموں کے سلسلے میں بھی آواز اٹھائی اور کہا کہ کیس واپس لینے کا وعدہ بھی ہوا تھا لیکن اس پر بھی سرکاریں وعدہ خلافی سے کام لے رہی ہیں ۔ اسی لئے ضروری ہے کہ ایک مرتبہ پھر ان حکومتوں کو بتایا جائے کہ کسانوں نے اپنا آندولن صرف ملتوی کیا ہے ، وہ جب چاہیں واپس آسکتے ہیں۔واضح رہے کہ اس سے قبل کسانوں نے بھی اعلان کیا تھا کہ وہ ۳۱؍ جنور ی کو پورے ملک میں ’ وشواس گھات ‘ دن منائیں گے اور حکومت کے خلاف احتجاج کریں گے ۔ اسی احتجاج کو راکیش ٹکیت نے آندولن کی شروعات قرار دیا ہے۔ ٹکیت نے میڈیا سے گفتگو میں ایک مرتبہ پھر واضح طور پر کہا کہ ہم نے اتنابڑا آندولن کیا اور اتنے کسان بھائیوں کی قربانی دی ۔ کیا اب بھی کسانوں کو یا ووٹروں کو یہ بتانے کی ضرورت ہے کہ کسے ووٹ نہیں دینا ہے۔