پیومس ایک ہلکا پھلکا آتش فشانی پتھر ہے جو اس وقت بنتا ہے جب آتش فشاں سے نکلنے والا لاوا اچانک ٹھنڈا ہو جاتا ہے۔ یہ لاوا گیسوں سے بھرپور ہوتا ہے۔

آتش فشانی عمل کے نتیجے میں مختلف اقسام کے پتھر وجود میں آتے ہیں جن کی ساخت، وزن اور خصوصیات ایک دوسرے سے مختلف ہوتی ہیں۔ عام مشاہدہ یہ ہے کہ پتھر پانی میں فوراً ڈوب جاتے ہیں لیکن کیا آپ نے کبھی غور کیا کہ بعض آتش فشانی پتھر’’پیومس‘‘ اس کے برعکس سطح آب پر تیرتے رہتے ہیں، کیوں ؟
اس کی وجہ ساخت اور بننے کا طریقہ ہے
آتش فشانی پتھروں میں ایک خاص قسم کا پتھر ’’ پیومس‘‘(Pumice) کہلاتا ہے جو پانی پر تیرنے کی صلاحیت رکھتا ہے۔ عام طور پر پتھر بھاری ہوتے ہیں اور پانی میں ڈوب جاتے ہیں، لیکن اس اصول سے پیومس ایک دلچسپ استثنا ہے۔ اس کی وجہ اس کی منفرد ساخت اور بننے کا طریقہ ہے۔ 

یہ بھی پڑھئے: خراب یا پرانے انڈے پانی پرتیرتے ہیں، کیوں؟

یومس پتھر کیا ہے؟
پیومس ایک ہلکا پھلکا آتش فشانی پتھر ہے جو اس وقت بنتا ہے جب آتش فشاں سے نکلنے والا لاوا اچانک ٹھنڈا ہو جاتا ہے۔ یہ لاوا گیسوں سے بھرپور ہوتا ہے۔ جب لاوا زمین کی سطح پر پہنچتا ہے تو اس کے اندر موجود گیسیں تیزی سے خارج ہونے لگتی ہیں اور ان کے نکلنے سے بے شمار چھوٹے چھوٹے سوراخ بن جاتے ہیں۔ یہی سوراخ پیومس کو ایک جھاگ نما شکل دیتے ہیں۔ 
پتھر کے اندر موجود سوراخوں کا کردار
پیومس کے اندر ہزاروں بلکہ لاکھوں ننھے سوراخ ہوتے ہیں جن میں ہوا بھری ہوتی ہے۔ یہ سوراخ اس کے کل حجم کا ایک بڑا حصہ گھیر لیتے ہیں۔ چونکہ ہوا کا وزن بہت کم ہوتا ہے، اس لئے پورے پتھر کی اوسط کثافت کم ہو جاتی ہے۔ عام پتھروں میں مادّہ بہت زیادہ اور خالی جگہ نہ ہونے کے برابر ہوتی ہے، اس لیے ان کی کثافت پانی سے زیادہ ہوتی ہے اور وہ ڈوب جاتے ہیں۔ 

یہ بھی پڑھئے: تقریباً تمام عرب ممالک کے پرچموں کا رَنگ اورڈیزائن ایک جیسا ہے، کیوں؟

پیومس کیسے بنتا ہے؟
جب آتش فشاں پھٹتا ہے تو انتہائی گرم لاوا کے اندر تحلیل شدہ گیسیں موجود ہوتی ہیں۔ جیسے ہی لاوا سطح پر آتا ہے، دباؤ اچانک کم ہو جاتا ہے۔ اس تبدیلی کے نتیجے میں گیسیں تیزی سے پھیلتی ہیں اور لاوا میں بلبلے پیدا کرتی ہیں۔ بعد ازاں لاوا بہت جلد ٹھنڈا ہو جاتا ہے اور یہ بلبلے پتھر کے اندر مستقل سوراخوں کی شکل اختیار کر لیتے ہیں۔ 
کیا پیومس ہمیشہ تیرتا رہتا ہے؟ 
نہیں۔ اگرچہ تازہ پیومس پانی پر تیر سکتا ہے، لیکن وقت گزرنے کے ساتھ اس کے سوراخوں میں پانی داخل ہونے لگتا ہے۔ جب ہوا کی جگہ پانی بھر جاتا ہے تو پتھر کی کثافت بڑھ جاتی ہےاور پھر وہ آہستہ آہستہ ڈوب جاتا ہے۔ کچھ پیومس کے ٹکڑے چند دنوں تک تیرتے ہیں جبکہ بعض مہینوں یا حتیٰ کہ برسوں تک بھی پانی کی سطح پر رہ سکتے ہیں۔