دور جدید میں ڈجیٹل اسکلز قیمتی اثاثہ بن چکی ہیں۔طلبہ اگر ان ڈجیٹل مہارتوں پر توجہ دیں تو نہ صرف وہ تعلیمی سفر کو بہتر بنا سکتے ہیں بلکہ مستقبل میں بھی کریئر اور ترقی کے بے شمار مواقع حاصل کر سکتے ہیں۔ تصویر: آئی این این 

انٹرنیٹ نیویگیشن(Internet Navigation)
درست معلومات تلاش کرنے کیلئے سرچ انجنزجیسےگوگل کا صحیح استعمال کرنا، اور صرف مستند و معتبر ویب سائٹس پر انحصار کرنا۔ آن لائن لرننگ پلیٹ فارمز، ای بکس اور تعلیمی ویڈیوز کے ذریعے علم حاصل کرنا۔ سوشل میڈیا اور انٹرنیٹ کا استعمال مثبت اور تعمیری مقصد کیلئے کرنا۔

ای میل اور آن لائن کمیونی کیشن(Email and online communication)
مؤثر انداز میں ڈجیٹل رابطہ قائم کرنا، جیسے ای میل بھیجنا، میٹنگز کیلئے زوم یا گوگل میٹ استعمال کرنا۔ پروفیشنل انداز میں پیغام رسانی اور ای میل کا صحیح فارمیٹ اس کا اہم حصہ ہے۔طلبہ کیلئے یہ مہارت ضروری ہے تاکہ وہ اساتذہ، اداروں اور کمپنیوں سے مؤثر رابطہ رکھ سکیں۔

 ڈاکیومینٹ کریئشن(Document creation)
اس کا مطلب ہے مائیکروسافٹ ورڈ اور گوگل ڈاکس جیسے ٹولز میں تحریری مواد تیار کرنا۔ اس میں رپورٹس، اسائنمنٹس، سی وی اور خطوط وغیرہ کو فارمیٹ کرنا، ترمیم کرنا اور محفوظ کرنا شامل ہے۔یہ اسکل طلبہ کو تعلیمی و پیشہ ورانہ کاموں میں مؤثراور منظم انداز میں لکھنے میں مدد دیتی ہے۔

ڈجیٹل سیفٹی اور سیکوریٹی (Digital safety and security)
اپنی آن لائن معلومات کو محفوظ رکھنا اور انٹرنیٹ پر محفوظ طریقے سے کام کرنا۔ اس میں مضبوط پاسورڈز کا استعمال، مشکوک لنکس یا فشنگ سے بچاؤ اور پرائیویسی سیٹنگز کا درست استعمال شامل ہے۔طلبہ کیلئے یہ مہارت ضروری ہے تاکہ وہ ہیکنگ، فراڈ اور آن لائن خطرات سے محفوظ رہ سکیں۔

کوڈنگ اور پروگرامنگ(Coding and programming)
کوڈنگ اور پروگرامنگ وہ مہارت ہے جس کے ذریعے کمپیوٹر سافٹ ویئر، ویب سائٹس یا ایپس تیار کی جاتی ہیں۔ اس میں سی ایس ایس،جاوا،ایچ ٹی ایم ایل اور جاوا اسکرپٹ جیسی زبانوں کا استعمال سیکھا جاتا ہے۔طلبہ کیلئے یہ مہارت ٹیکنالوجی سے جڑے کریئرز کیلئے مفید ہے۔

ڈیٹا اینالیسز اور وِزولائزیشن(Data Analysis and Visualization)
اس کا مطلب ہے بڑی مقدار میں ڈیٹا کا تجزیہ کرنا اور اسے گراف یا چارٹس کی صورت میں پیش کرنا۔اس کیلئے ایکسل، گوگل شیٹس یا پاور بی آئی جیسے ٹولز استعمال کئے جاتے ہیں۔ طلبہ اس مہارت سے تحقیق، منصوبہ بندی اور فیصلے کرنے میں بہتر کارکردگی دکھا سکتے ہیں۔

گرافک ڈیزائن اور ویڈیو ایڈیٹنگ(Graphic design and video editing)
اس کا مطلب ہے تصاویر، پوسٹرز، ویڈیوز اور بصری مواد کو تخلیقی انداز میں تیار کرنا۔اس کیلئےایڈوب فوٹوشاپ، کینوا اور پریمیئر پرو جیسے سافٹ ویئرز استعمال کئے جاتے ہیں۔یہ مہارت طلبہ کو تعلیمی، سوشل میڈیا اور پیشہ ورانہ منصوبوں میں پرکشش مواد بنانے میں مدد دیتی ہے۔

ڈجیٹل مارکیٹنگ(Digital Marketing)
ڈجیٹل مارکیٹنگ کا مطلب ہے انٹرنیٹ کے ذریعے مصنوعات یا خدمات کی تشہیر اور فروغ کرنا۔اس میں سوشل میڈیا مینجمنٹ، گوگل ایڈس، ایس ای او اور ای میل مارکیٹنگ جیسے طریقے شامل ہوتے ہیں۔ طلبہ اس ہنر سے آن لائن بزنس، فری لانسنگ یا مارکیٹنگ کے شعبے میں کریئر بنا سکتے ہیں۔

ملٹی میڈیا کنٹینٹ بنانا(Creating Multimedia Content)
اس کا مطلب ہے ویڈیوز، آڈیو، تصاویر، اینیمیشنز اور متن کو ملا کر معلوماتی یا تفریحی مواد تیار کرنا۔اس کیلئے پاور پوائنٹ،کینوا یا اوڈاسٹی جیسے ٹولز استعمال کئے جاتے ہیں۔یہ مہارت طلبہ کو تعلیمی پریزنٹیشنز، یوٹیوب چینلز یا آن لائن کورسیز بنانے میں مدد فراہم کرتی ہے۔

ای کامرس اور سوشل سیلنگ(E-commerce and Social Selling)
انٹرنیٹ کے ذریعے مصنوعات یا خدمات کی خرید و فروخت کرنا۔اس میں امیزون، فلپ کارٹ یا شاپی فائے جیسے پلیٹ فارمز کا استعمال شامل ہے۔ یہ مہارت طلبہ کو اپنا آن لائن کاروبار شروع کرنے یا ڈجیٹل مارکیٹ میں کام کرنے کے قابل بناتی ہے۔

ڈجیٹل  پورٹ فولیو بنانا(Creating digital portfolio)
اس میں اپنی مہارتوں، پروجیکٹس اور کامیابیوں کو آن لائن منظم انداز میں پیش کرنا شامل ہے۔اس کیلئے ویب سائٹس، بلاگز یا لنکڈ اِن جیسے پلیٹ فارمز استعمال کئے جاتے ہیں۔یہ مہارت طلبہ کو اسکالرشپ یا فری لانس مواقع کیلئے خود کو نمایاں کرنے میں مدد دیتی ہے۔

ڈجیٹل اخلاقیات (Digital Ethics)
اس کا مطلب ہے انٹرنیٹ اور ٹیکنالوجی کے استعمال میں اخلاقی اور ذمہ دار رویہ اختیار کرنا۔اس میں کاپی رائٹ کا احترام، دوسروں کی رازداری کا خیال رکھنا اور جھوٹی یا مضرمعلومات سے گریز شامل ہے۔ یہ مہارت طلبہ کو ایک باشعور، مہذب اور محفوظ ڈجیٹل شہری بننے میں مدد دیتی ہے۔