اسپین کے اسٹار ٹینس کھلاڑی کارلوس الکاراز نے ابتدائی سیٹ میں پیچھے ہونے کے بعد شاندار واپسی کرتے ہوئے پرتگال کے جیمے فاریہ کو شکست دے کر یو ایس اوپن کے مردوں کے سنگلز کے تیسرے راؤنڈ میں جگہ بنا لی ہے۔

اسپین کے اسٹار ٹینس کھلاڑی کارلوس الکاراز نے ابتدائی سیٹ میں پیچھے ہونے  کے بعد شاندار واپسی کرتے ہوئے پرتگال کے جیمے فاریہ کو شکست دے کر یو ایس اوپن کے مردوں کے سنگلز کے تیسرے راؤنڈ میں جگہ بنا لی ہے۔بدھ کو کھیلے گئے مقابلے میں دفاعی چیمپئن الکاراز نے پہلا سیٹ ۴۔۶؍سے گنوانے کے بعد مسلسل آٹھ گیم جیت کر میچ پر گرفت مضبوط کی اور فاریہ کو۶۔۴، ۰۔۶، ۳۔۶، ۲۔۶؍ سے شکست دی۔ یہ مقابلہ دو گھنٹے   منٹ تک جاری رہا۔
۲۳؍سالہ الکاراز کی اس ٹورنامنٹ میں اب تک تین مرتبہ سروس ٹوٹی ہے، جن میں بدھ کی رات دو مواقع بھی شامل ہیں۔ اس کے مقابلے میں ۲۰۲۵ء کا خطاب جیتنے کے دوران ۱۰۱؍ سروس گیمز میں ان کی سروس صرف تین مرتبہ ٹوٹی تھی۔ الکاراز سے ۳؍ ماہ چھوٹے فاریہ نے پہلے سیٹ میں ۳۔۴؍ کی برتری حاصل کی اور برتری برقرار رکھنے کے لیے عمدہ سروس کا سہارا لیا۔ اپنی سروس گنوانے کے بعد الکاراز نے محسوس کیا کہ وہ بہت جلد بازی کر رہے تھے۔

یہ بھی پڑھئے:بیت المقدس: اگست میں مسجد الاقصیٰ پر ۵۲۰۹؍ اسرائیلی آبادکاروں کے حملے

الکاراز نے کہاکہ ’’سچ کہوں تو میں جلدی جیتنا چاہتا تھا، میں جھوٹ نہیں بولوں گا۔ لیکن بعد میں مجھے احساس ہوا کہ چار سیٹ کھیلنا میرے لیے جسمانی طور پر خود کو پرکھنے کے لیے بہت اچھا رہا۔ اپنے جسم کو آزمانا اور یہ دیکھنا کہ میں کیسا محسوس کر رہا ہوں، میرے لیے اہم تھا۔ ‘‘ انہوں نے کہاکہ اس کے بعد میں نے صرف توجہ مرکوز رکھنے اور پرسکون رہنے کی کوشش کی۔ مجھے لگتا ہے کہ آگے بھی سب کچھ اچھا رہے گا۔ 
پولینا ایاتسینکو کو شکست دے کر سبالینکا یو ایس اوپن کے تیسرے دور میں داخل
بیلاروس کی ٹینس کھلاڑی اور ٹاپ سیڈ آرینا سبالینکا نے روس کی پولینا ایاتسینکو کو راست سیٹوں میں شکست دے کر یو ایس اوپن خواتین کے سنگلز مقابلے کے تیسرے دور میں جگہ بنا لی ہے۔سبالینکا نے بدھ کی رات ۵۳؍ منٹ تک جاری رہنے والے مقابلے میں ایاتسینکو کو۱۔۶، ۱۔۶؍ سے شکست دی۔ انہوں نے جارحانہ اور طاقتور کھیل کا شاندار مظاہرہ کیا، جس سے محسوس ہوا کہ حالیہ مقابلوں میں درپیش مشکلات اب ماضی کا حصہ بن چکی ہیں۔

یہ بھی پڑھئے:ڈاکٹر نینے نے انوشکا شرما اوروراٹ کوہلی کے لندن منتقل ہونے کی وجہ بتائی

سبالینکا نے پہلے سیٹ میں اپنی پہلی سروس پر ۱۶؍ میں سے ۱۵؍ پوائنٹس حاصل کیے، جبکہ دوسرے سیٹ میں بھی ان کی کارکردگی مضبوط رہی۔ انہوں نے میچ میں پہلی سروس پر مجموعی طور پر ۲۸؍ میں سے ۲۱؍ پوائنٹس جیتے۔ ایاتسینکو اپنا پہلا گرینڈ سلیم ٹورنامنٹ کھیل رہی تھیں۔میچ کے بعد سبالینکا نے کہا کہ وہ اپنی کارکردگی، توجہ مرکوز رکھنے کے انداز اور میچ کامیابی سے مکمل کرنے پر خوش ہیں۔ تیسرے دور میں ان کا مقابلہ کامیلا راخیمووا سے ہوگا، جن کے خلاف سبالینکا کا ریکارڈ ۰۔۳؍ ہے۔ دونوں کا آمنا سامنا  ۲۰۲۵ء کے فرنچ اوپن میں ہوا تھا، جہاں سبالینکا نے ۱۔۶، ۰۔۶؍سے کامیابی حاصل کی تھی۔