’’دھرندھر ۲‘‘ نے پہلے ہفتے میں ۶۸۳؍ کروڑ روپے کمائے مگر ’’پروجیکٹ ہیل میری‘‘ نے ہالی ووڈ میں ریکارڈ اوپننگ کی۔

گزشتہ ویک اینڈ عالمی باکس آفس کے لیے غیر معمولی ثابت ہوا، جہاں ایک طرف ’’دھرندھر: دی ریوینج‘‘ نے ۶۸۳؍ کروڑ روپے کما کر تہلکہ مچا دیا، وہیں دوسری جانب ہالی ووڈ کی فلم Project Hail Mary نے تاریخ رقم کرتے ہوئے نئی بلندیوں کو چھو لیا۔ رنویر سنگھ، ارجن رامپال، اور سنجے دت کی اداکاری سے سجی ’’دھرندھر: دی ریوینج‘‘ نہ صرف ہندوستان بلکہ عالمی سطح پر بھی زبردست بزنس کر رہی ہے۔ فلم نے اپنے ابتدائی دنوں میں ہی بڑے ریکارڈز توڑ دیے اور باکس آفس پر اپنی مضبوط گرفت برقرار رکھی ہے۔

یہ بھی پڑھئے: رتیک روشن اور راین گوزلنگ کی ’’پروجیکٹ ہیل میری‘‘ پر گفتگو

دوسری طرف راین گوزلنگ کی فلم ’’پروجیکٹ ہیل میری‘‘ نے امریکی باکس آفس پر ۸۰؍ ملین ڈالر کی شاندار اوپننگ کے ساتھ ہالی ووڈ میں نئی تاریخ رقم کی۔ یہ کسی بھی نان فرنچائز فلم کے لیے دوسری سب سے بڑی اوپننگ ہے، اور پہلے نمبر پر ’’اوپن ہائیمر‘‘ ہے۔ ہدایتکار جوڑی فل لورڈ اور کرسٹوفر ملر کی اس سائنس فکشن فلم کو ناقدین اور ناظرین دونوں کی جانب سے بھرپور پذیرائی ملی ہے۔ روٹن ٹومیٹوز پر ۹۵؍  فیصد ریٹنگ کے ساتھ یہ راین گوزلنگ کے کریئر کی سب سے زیادہ تعریف پانے والی فلم بن گئی ہے۔
عالمی سطح پر بھی ’’پروجیکٹ ہیل میری‘‘ نے ۱۴۱؍ ملین ڈالر کما کر یہ ثابت کر دیا کہ نان فرنچائز فلمیں بھی بڑے پیمانے پر کامیابی حاصل کر سکتی ہیں۔ دلچسپ بات یہ ہے کہ یہ فلم مارچ کے مہینے میں کسی بھی نان فرنچائز فلم کی سب سے بڑی اوپننگ بھی بن گئی ہے جبکہ امیزون ایم جی ام اسٹوڈیوز کے لیے بھی یہ اب تک کی سب سے بڑی شروعات ہے۔ اگرچہ ہالی ووڈ میں ’’پروجیکٹ ہیل میری‘‘ سرفہرست رہی، ’’دھرندھر: دی ریوینج‘‘ نے امریکی مارکیٹ میں بھی قابل ذکر کارکردگی دکھائی اور تیسرے نمبر پر جگہ بنائی، جہاں اس نے کئی بڑی فلموں کو پیچھے چھوڑ دیا۔

یہ بھی پڑھئے: رنویر سنگھ کی فلم ’’دُھرندھر۲‘‘ پر پابندی لگانے کا مطالبہ

ٹاپ ۵؍ یو ایس باکس آفس (ویک اینڈ)
(۱) پروجیکٹ ہیل میری: ۸۰؍ ملین ڈالر
(۲) ہوپرس: ۱۸؍ ملین ڈالر
(۳) دھرندھر: دی ریوینج: ۵۰ء۹؍ ملین ڈالر
(۴) ریڈی اور ناٹ ۲: ۱۰ء۹؍ ملین ڈالر
(۵) اٹس ریمیمبرنس: ۸؍ ملین ڈالر
یہ بھی قابل ذکر ہے کہ ’’پروجیکٹ ہیل میری‘‘ تقریباً ۲۴۸؍ ملین ڈالر کے بھاری بجٹ پر تیار کی گئی ہے اور یہ ۲۶؍ مارچ ۲۰۲۶ء کو ہندوستان میں ریلیز ہونے جا رہی ہے، جہاں اس کی ’’دھرندھر ۲‘‘ کے ساتھ براہ راست مقابلے کی توقع ہے۔ فلمی ماہرین کے مطابق، یہ ویک اینڈ اس بات کا ثبوت ہے کہ عالمی باکس آفس اب مکمل طور پر متنوع ہو چکا ہے، جہاں ایک طرف بالی ووڈ کی بڑے پیمانے کی ایکشن فلمیں کامیابی حاصل کر رہی ہیں، وہیں اصل کہانیوں پر مبنی ہالی ووڈ فلمیں بھی ناظرین کو اپنی جانب کھینچ رہی ہیں۔ موجودہ رجحانات یہ ظاہر کرتے ہیں کہ آنے والے مہینوں میں باکس آفس پر مختلف اصناف اور زبانوں کی فلموں کے درمیان مقابلہ مزید سخت ہونے والا ہے، جو عالمی سنیما کے لیے ایک دلچسپ دور کی نشاندہی کرتا ہے۔