ہیری پوٹر سیریز سے شہرت حاصل کرنے والی معروف ہالی ووڈ اداکارہ ایماواٹسن کا کہنا ہے کہ ۳۰؍ سال کی ہونے پر ضروری نہیں کہ آپ شادی شدہ یا مالی طور پرمستحکم ہوں۔

پیرس : ہیری پوٹر سیریز سے شہرت حاصل کرنے والی معروف ہالی ووڈ اداکارہ ایماواٹسن کاکہنا ہے کہ ۳۰؍ سال کی ہونے پر ضروری نہیں کہ آپ شادی شدہ یا مالی طور پرمستحکم ہوں۔
 ذرائع کے مطابق ہالی ووڈ اداکارہ ایماواٹسن نے کہا ہے کہ انہیں اپنی ۳۰؍ ویں سالگرہ سے پہلے ذاتی زندگی میں دباؤ کے باعث پریشانی اوربے چینی کا سامنا کرنا پڑرہاہے۔
 ایماواٹسن فی الحال ۲۹؍سال کی ہیں اور اگلے سال اپریل میں ۳۰؍ سال کی ہوجائیں گی۔ ایما نے اس بابت کہا کہ ’’۳۰؍ سال کی ہونے سے قبل میرے ذہن میں کئی خدشات ہیں اور میں خود سے پوچھتی ہوں کہ مجھے اس عمر تک کیا کچھ حاصل کرلینا چاہئے تھا۔‘‘ ایک انٹرویو کے دوران ایمانے کہا کہ اگر ۳۰؍ سال کی عمر تک آپ کی شادی نہیں ہوئی تو آپ کے بچے نہیں ہوں گے اور یہ سوچ کر ناقابل یقین حد تک اضطراب اور بے چینی بڑھ جاتی ہے۔ تاہم ایما نے کہا کہ وہ اپنی زندگی میں اکیلی ہی خوش ہیں اور اپنی پارٹنر خود ہی ہیں۔
 ایما نے اپنی زندگی کے بارے میں بات کرتے ہوئے کہا کہ وہ ماضی میں کبھی اس بات پر یقین نہیں کرتی تھیں کہ زندگی میں آپ اکیلے خوش رہ سکتے ہیں۔ انہوں نے کہا ’’میں اکثر سوچتی تھی کہ ہر کوئی ۳۰؍ ویں سالگرہ پر اتنا شور کیوں مچاتا ہے؟ یہ کوئی اتنی بڑی بات تو نہیں۔ لیکن اگر آپ ۳۰؍ سال کے قریب ہیں اور آپ نے گھر نہیں بنایا، آپ کا شوہر نہیں ہے، اولاد نہیں اور مالی طور پر مستحکم بھی نہیں ہیں تو یہ سوچ کر ہی بے چینی بڑھ جاتی ہے۔ لیکن میرا خیال ہے کہ اب میں تنہا ہی خوش ہوں۔‘‘
 واضح رہے کہ ایماواٹسن اقوام متحدہ کی خواتین کیلئے خیرسگالی کی سفیر ہیں اور ’’ہی فارشی‘‘نامی مہم کا حصہ بھی رہ چکی ہیں جس میں عالمی صنفی مساوات کیلئے آواز اٹھائی گئی تھی۔