رنویر سنگھ کی فلم ’’دُھرندھر۲‘‘ کا ٹریلر جاری کر دیا گیا ہے۔ مداحوں کا انتظار ختم ہو گیا ہے اور ایک بار پھر شاندار سنیما تجربے کے لیے لوگ پرجوش ہو گئے ہیں۔ فلم کے ٹریلر میں پہلے حصے سے شہرت حاصل کرنے والی اداکارہ سارہ ارجن کی جھلک بھی نظر آئی ہے۔ اداکارہ کے آنے والے پروجیکٹس کے بارے میں بھی کافی باتیں ہو رہی تھیں جن پر اب کاسٹنگ ڈائریکٹر مکیش چھابڑا نے ردِعمل دیا ہے۔

 رنویر سنگھ کی فلم ’’دُھرندھر۲‘‘ نے ۲۰۲۵ء میں زبردست کامیابی حاصل کی تھی۔ یہ فلم نہ صرف ہندی سنیما کی پہلی ۱۳۰۰؍کروڑ روپے  کمانے والی فلم بنی بلکہ او ٹی ٹی پلیٹ فارم پر بھی دنیا بھر میں مقبول ہوئی۔ اب اس کے دوسرے حصے کا ٹریلر طوفان کی طرح آیا ہے جس نے مداحوں کی دلچسپی اور بڑھا دی ہے۔ ٹریلر میں رنویر سنگھ ہر طرف چھائے ہوئے ہیں اور ان کے دونوں کرداروں کو مداحوں کی جانب سے مثبت ردِعمل ملا ہے۔ دوسری طرف پہلے حصے کی مرکزی اداکارہ  سارہ  ارجن  اس بار بھی فلم میں نظر آئیں گی اور ٹریلر سے واضح ہو گیا ہے کہ اس دفعہ ان کا کردار پہلے سے زیادہ طاقتور اور سنجیدہ ہوگا۔
اداکارہ کے آنے والے پروجیکٹس کے بارے میں ایک ایسی خبر سامنے آئی ہے جو ان کے مداحوں کو مایوس کر سکتی ہے۔ فلم انڈسٹری کے مشہور کاسٹنگ ڈائریکٹر  مکیش چھابڑا  نے سارہ ارجن کے اگلے پروجیکٹ کے بارے میں انکشاف کیا ہے۔ اس سے پہلے دعویٰ کیا جا رہا تھا کہ سارہ  ارجن کی اگلی فلم امتیاز علی کی فلم ہیر رانجھا ہوگی، مگر فی الحال ایسا ہوتا نظر نہیں آ رہا۔ آئیے جانتے ہیں کہ مکیش چھابڑا نے اس بارے میں کیا کہا۔

یہ بھی پڑھئے:رونالڈو کی غیر موجودگی میں سیماکان کا جادو، النصر ٹاپ پر قابض

مکیش چھابڑا نے کیا کہا؟
مکیش چھابڑا نے سارہ  ارجن کے بارے میں کہا کہ   ’’سارہ  ارجن نے ابھی تک کوئی نئی فلم سائن نہیں کی۔ فی الحال ہم سب ’’دُھرندھر ۲‘‘ کا انتظار کر رہے ہیں۔ سارہ  نے نہ تو کوئی فلم سائن کی ہے اور نہ ہی کسی نئے پروجیکٹ کے سلسلے میں کسی سے ملاقات کی ہے۔ اس لیے آپ سب پرسکون رہیں۔ میں خود آپ کو سارہ  کے اگلے پروجیکٹ کے بارے میں اطلاع دوں گا۔ ابھی جو کچھ بھی سننے میں آ رہا ہے وہ صرف افواہیں ہیں۔‘‘

یہ بھی پڑھئے:’’رامائن‘‘ پر مغربی ایشیا جنگ کا اثر، رنبیر کپور کی فلم کی اہم تقریب ملتوی

تیلگو فلم میں نظر آئیں گی سارہ  ارجن
اس سے پہلے مداح اس بات پر خوش تھے کہ اداکارہ امتیاز علی کی رومانوی فلم میں نظر آئیں گی، لیکن مکیش چھابڑا کے بیان نے ان افواہوں کو ختم کر دیا ہے۔ تاہم سارہ  ارجن ایک  تیلگو فلم’’یوفوریا‘‘ میں نظر آئیں گی جو جلد او ٹی ٹی پلیٹ فارم پر ریلیز ہونے والی ہے۔ جہاں تک ’’دُھرندھر۲‘‘ کی بات ہے تو اس بار فلم میں سارہ  کا کردار زیادہ سنجیدہ اور طاقتور ہوگا جو مداحوں کو مزید تفریح فراہم کرے گا۔