Updated: July 16, 2026, 3:13 PM IST
| Kohima
جموں کشمیر کے ضلع پونچھ کے سرحدی گاؤں کلر میں اس وقت سوگ کی فضا قائم ہے کیونکہ ہندوستانی فوج کے حوالدار محمد اقبال ناگالینڈ کے ضلع چوموکیڈیما میں ایک دہشت گرد حملے میں شہید ہوگئے۔ پیر کو آسام رائفلز کی گاڑی کو مشتبہ آئی ای ڈی دھماکے کا نشانہ بنایا گیا، جس میں حوالدار اقبال جاں بحق جبکہ چار سیکوریٹی اہلکاروں اور ایک شہری سمیت پانچ افراد زخمی ہوئے۔ چند روز قبل ہی چھٹی گزار کر واپس ڈیوٹی پر جانے والے شہید نے اہل خانہ سے ستمبر میں دوبارہ گھر آنے کا وعدہ کیا تھا، مگر اب ان کا جسدِ خاکی آبائی گاؤں پہنچنے کا انتظار کیا جا رہا ہے۔
حولدار محمد اقبال۔ تصویر: ایکس
جموں کشمیر کے ضلع پونچھ کے سرحدی گاؤں کلر میں غم کی لہر دوڑ گئی ہے، جہاں ہندوستانی فوج کے حوالدار محمد اقبال کی ناگالینڈ میں دہشت گرد حملے میں شہادت پر اہل خانہ، رشتہ دار اور مقامی لوگ سوگوار ہیں۔ حوالدار محمد اقبال، جو ہندوستانی فوج میں ڈرائیور کی حیثیت سے خدمات انجام دے رہے تھے، حال ہی میں مختصر رخصت گزار کر اپنے خاندان سے ملنے کے بعد دوبارہ ڈیوٹی پر واپس گئے تھے۔ اہل خانہ کے مطابق انہوں نے وعدہ کیا تھا کہ ستمبر میں گھاس کاٹنے کے سالانہ موسم کے دوران گھر واپس آکر خاندان کا ہاتھ بٹائیں گے، لیکن اب ان کے اہل خانہ ان کی آخری رسومات کی تیاری کر رہے ہیں۔
یہ حملہ پیر کو ناگالینڈ کے چوموکیڈیما ضلع کے شوخووی علاقے کے قریب اس وقت پیش آیا جب آسام رائفلز کی ایک گاڑی معمول کی آپریشنل نقل و حرکت کے دوران مشتبہ دیسی ساختہ دھماکہ خیز مواد (IED) کی زد میں آ گئی۔ دھماکے میں حوالدار محمد اقبال موقع پر شہید ہوگئے، جبکہ چار سیکوریٹی اہلکاروں اور ایک شہری سمیت مجموعی طور پر پانچ افراد زخمی ہوئے، جنہیں فوری طور پر طبی امداد کے لیے منتقل کیا گیا۔ شہید حوالدار کے والد چوہدری کالو نے میڈیا سے گفتگو کرتے ہوئے کہا کہ پورا خاندان ان کی واپسی کا بے چینی سے انتظار کر رہا تھا، لیکن قسمت کو کچھ اور ہی منظور تھا۔ انہوں نے اپنے بیٹے کو یاد کرتے ہوئے کہا کہ وہ ہر بار چھٹی ختم ہونے پر یہی کہتے تھے کہ جلد واپس آئیں گے اور گھر کے کاموں میں ہاتھ بٹائیں گے، مگر اس مرتبہ ان کی واپسی شہادت کی صورت میں ہو رہی ہے۔
شہید کے بیٹے نے بھی میڈیا سے گفتگو کرتے ہوئے اپنے والد کی قربانی پر فخر کا اظہار کیا، تاہم ان کی جدائی کو خاندان کے لیے ناقابلِ تلافی نقصان قرار دیا۔ ادھر بھارتیہ جنتا پارٹی (بی جے پی) کے لیڈر رویندر رائنا نے ایکس پر شہید حوالدار محمد اقبال کو خراجِ عقیدت پیش کرتے ہوئے ایک ویڈیو بھی شیئر کی۔ رویندر رائنا نے اپنے پیغام میں کہا کہ ’’حب الوطنی کے گہرے جذبے سے سرشار حوالدار محمد اقبال نے مادرِ وطن کی خدمت میں اپنی جان قربان کر دی۔ پوری قوم انہیں سلام پیش کرتی ہے۔ وہ اس پورے خطے کے لیے ہمیشہ ہمت، بہادری اور فرض شناسی کی علامت رہیں گے اور لوگوں کے دلوں میں ہمیشہ زندہ رہیں گے۔‘‘
یہ بھی پڑھئے: ناندیڑ: کلکٹر کی عوام سے ایس آئی آر فارم جمع کروانے کی اپیل
حملے کے بعد سیکوریٹی فورسیز نے علاقے میں سرچ آپریشن شروع کر دیا ہے تاکہ حملے میں ملوث عناصر کا سراغ لگایا جا سکے، جبکہ واقعے کی مزید تحقیقات بھی جاری ہیں۔ حوالدار محمد اقبال کی شہادت پر پونچھ اور گردونواح میں افسوس کی لہر دوڑ گئی ہے، جہاں مقامی لوگوں نے انہیں ایک فرض شناس، بہادر اور خوش اخلاق شخصیت قرار دیتے ہوئے ان کی قربانی کو سلام پیش کیا۔
