جنوبی فلپائن میں پیر کو آنے والے ۸ء۷؍ شدت کے طاقتور زلزلے کے بعد بحرالکاہل کے کئی ممالک میں سونامی وارننگ اور ایڈوائزری جاری کر دی گئی۔ امریکی جیولوجیکل سروے کے مطابق زلزلے کے بعد ۱ء۶؍ شدت کا آفٹر شاک بھی ریکارڈ کیا گیا۔ ابتدائی اطلاعات کے مطابق ایک شخص عمارت گرنے سے ہلاک ہوا ہے۔ فلپائن، جاپان، انڈونیشیا اور تائیوان سمیت متعدد ممالک نے ساحلی علاقوں میں حفاظتی اقدامات شروع کر دیے ہیں، جبکہ بعض علاقوں میں انخلاء کے احکامات بھی جاری کیے گئے ہیں۔

جنوبی فلپائن میں پیر (۸؍جون) کو آنے والے ۸ء۷؍ شدت کے شدید زلزلے نے بحرالکاہل کے خطے میں تشویش کی لہر دوڑا دی، جس کے بعد کئی ممالک نے سونامی وارننگز، ایڈوائزریز اور انخلاء کے احکامات جاری کر دیے۔ امریکی جیولوجیکل سروے کے مطابق زلزلہ فلپائن کے جزیرہ منڈاناؤ میں صوبہ سارن گنی سے تقریباً ۲۴؍ کلومیٹر مغرب میں اور ۳۵؍ کلومیٹر گہرائی میں ریکارڈ کیا گیا۔ ابتدائی زلزلے کے کچھ ہی دیر بعد ۱ء۶؍ شدت کا ایک طاقتور آفٹر شاک بھی محسوس کیا گیا، جس نے مقامی آبادی میں مزید خوف و ہراس پیدا کر دیا۔ ابتدائی اطلاعات کے مطابق زلزلے کے نتیجے میں ایک عمارت گرنے سے کم از کم ایک شخص ہلاک ہو گیا، جبکہ حکام نقصانات اور متاثرین کے بارے میں مزید معلومات جمع کر رہے ہیں۔

پیسیفک سونامی وارننگ سینٹر نے خبردار کیا کہ زلزلے کے بعد سونامی کی لہریں فلپائن، انڈونیشیا، پلاؤ، تائیوان، یاپ اور پاپوا نیو گنی کے ساحلی علاقوں سے ٹکرا سکتی ہیں۔ ادارے کے مطابق، ’’سونامی کی لہریں اگلے تین گھنٹوں کے اندر متعدد ساحلی علاقوں تک پہنچ سکتی ہیں۔‘‘

7.8 magnitude earthquake strikes General Sanos City in the Philippines, causing extensive building collapses: pic.twitter.com/cUIBZ13qXp

— AlphaFox (@alphafox) June 8, 2026

فلپائن میں انخلاء کے احکامات
زلزلے کے بعد فلپائن کی حکومت نے ساحلی علاقوں میں ممکنہ سونامی کے خطرے کے پیش نظر انخلاء کے احکامات جاری کر دیے ہیں۔ مقامی حکام نے شہریوں کو ہدایت دی ہے کہ وہ ساحلوں اور نشیبی علاقوں سے فوری طور پر دور رہیں اور محفوظ مقامات کا رخ کریں۔

جاپان میں سونامی ایڈوائزری
جاپان کی موسمیاتی ایجنسی نے بحرالکاہل کے ساحلی علاقوں کے لیے سونامی ایڈوائزری جاری کی ہے۔ ادارے کے مطابق مختلف علاقوں میں ایک میٹر (تقریباً تین فٹ) بلند لہریں پہنچ سکتی ہیں۔ حکام نے ساحلی آبادی کو احتیاطی تدابیر اختیار کرنے کی ہدایت دی ہے۔

انڈونیشیا میں ہائی الرٹ
انڈونیشیا کی نیشنل ڈیزاسٹر ایجنسی نے شمالی انڈونیشیا کے کئی علاقوں میں سونامی وارننگ جاری کر دی ہے۔ ادارے کے مطابق شمالی سولاویسی کے دارالحکومت مناڈو، شمالی گورونتالو صوبے اور سانگیہ جزائر میں رہنے والے افراد کو فوری طور پر اونچی زمین کی طرف منتقل ہونے کی ہدایت دی گئی ہے۔ حکام نے کہا ہے کہ ’’متاثرہ علاقوں کے باشندوں کو منظم انداز میں فوری طور پر محفوظ اور بلند مقامات کی جانب منتقل کیا جائے۔‘‘

تائیوان اور امریکی علاقوں میں الرٹ
تائیوان کے لیے امریکی سونامی وارننگ سسٹم نے ممکنہ سونامی خطرے کا نوٹس جاری کیا ہے۔ اسی طرح امریکی علاقوں شمالی مرینا جزیرہ اور گوام کے لیے بھی سونامی ایڈوائزری نافذ کی گئی ہے۔ تاہم امریکی حکام کے مطابق اس وقت ہوائی اور امریکی سرزمین کے لیے کسی سونامی وارننگ کا اعلان نہیں کیا گیا۔

واضح رہے کہ فلپائن بحرالکاہل کے ’’رِنگ آف فائر‘‘ نامی زلزلہ خیز خطے میں واقع ہے، جہاں زمینی پلیٹوں کی مسلسل حرکت کے باعث اکثر شدید زلزلے اور آتش فشانی سرگرمیاں ریکارڈ کی جاتی ہیں۔ یہی وجہ ہے کہ ملک دنیا کے ان خطوں میں شمار ہوتا ہے جہاں قدرتی آفات کا خطرہ نسبتاً زیادہ رہتا ہے۔ ماہرین کا کہنا ہے کہ زلزلے کے بعد آنے والی سونامی لہروں کی شدت اور اثرات کا حتمی اندازہ اگلے چند گھنٹوں میں سامنے آئے گا۔ اس دوران متعلقہ ممالک کی حکومتیں صورتحال پر مسلسل نظر رکھے ہوئے ہیں اور شہریوں کو سرکاری ہدایات پر عمل کرنے کی تاکید کی جا رہی ہے۔