’’دی سپر ماریو گیلکسی مووی‘‘The Super Mario Galaxy Movie نے ریلیز کے صرف ۱۲؍ دنوں میں عالمی باکس آفس پر ۶۲۹؍ ملین ڈالر کما کر ریکارڈ قائم کر دیا ہے۔ اس اینی میٹڈ فلم نے نہ صرف ۲۰۲۶ء کی سب سے بڑی ہالی ووڈ ریلیز کا اعزاز حاصل کیا بلکہ عالمی باکس آفس میں بھی سرفہرست فلموں میں شامل ہو گئی ہے۔

ہالی ووڈ کی اینی میٹڈ فلم The Super Mario Galaxy Movie نے ریلیز کے محض ۱۲؍ دنوں میں عالمی باکس آفس پر شاندار کامیابی حاصل کرتے ہوئے خود کو ۲۰۲۶ء کی سب سے بڑی بلاک بسٹر فلم کے طور پر منوا لیا ہے۔ یونیورسل پکچرز اور اِلومینیشن کی مشترکہ پیشکش اس فلم نے نہ صرف اوپننگ کے دوران ریکارڈ قائم کیے بلکہ دوسرے ہفتے میں بھی اپنی مضبوط گرفت برقرار رکھی۔ فلم نے اپنے ابتدائی پانچ دنوں میں شمالی امریکہ میں ۸ء۱۹۰؍ ملین ڈالر کی زبردست کمائی کی، جس کے بعد یہ تاریخ کی چوتھی بڑی پانچ روزہ اوپننگ فلم بن گئی، جہاں اس سے آگے ’’موآنا ۲‘‘، ’’دی سپر ماریو بروز مووی‘‘ اور ’’ٹرانسفارمز: ریوینج آف دی فالین‘‘ جیسی فلمیں موجود ہیں۔

یہ بھی پڑھئے: اکشے کمار کا اسرانی کو خراج عقیدت، ’’بھوت بنگلہ‘‘ میرے لئے فلم نہیں، ایک یاد ہے

دوسرے ویک اینڈ میں بھی فلم نے غیر معمولی کارکردگی دکھاتے ہوئے ۴۲۸۴؍ تھیٹروں سے ۶۹؍ ملین ڈالر کا بزنس کیا، جو پہلے ہفتے کے مقابلے میں صرف ۴۸؍ فیصد کمی ہے۔ ماہرین کے مطابق اس سطح کی کمی کسی بھی بڑے بلاک بسٹر کے لیے ’’مضبوط ہولڈ‘‘ سمجھی جاتی ہے، جو اس بات کی علامت ہے کہ فلم کو مسلسل عوامی پذیرائی حاصل ہو رہی ہے۔ فلم کا بجٹ تقریباً ۱۱۰؍ ملین ڈالر بتایا جا رہا ہے، جس کے مقابلے میں اس کی کمائی کئی گنا زیادہ ہو چکی ہے، جو اسے تجارتی لحاظ سے انتہائی کامیاب بناتی ہے۔ ۱۲؍ اپریل ۲۰۲۶ء تک کے اعداد و شمار کے مطابق، فلم نے امریکہ اور کنیڈا میں ۳۰۸؍ ملین ڈالر جبکہ بین الاقوامی مارکیٹس میں ۳۲۱؍ ملین ڈالر کمائے، جس کے ساتھ اس کی مجموعی عالمی کمائی ۶۲۹؍ ملین ڈالر تک پہنچ گئی ہے۔ بین الاقوامی سطح پر میکسیکو ۳ء۴۸؍ ملین ڈالر کے ساتھ سرفہرست رہا، جبکہ اسپین، آسٹریلیا اور چین بھی نمایاں مارکیٹس میں شامل ہیں۔

دلچسپ بات یہ ہے کہ یہ فلم اس وقت عالمی سطح پر صرف ’’پیگاسس ۳‘‘ سے تھوڑی پیچھے ہے، جس نے ۱ء۶۴؍ ملین ڈالر کمائے ہیں۔ اس کے باوجود، یہ امریکی اسٹوڈیو کی جانب سے ۲۰۲۶ء کی سب سے زیادہ کمائی کرنے والی فلم بن چکی ہے۔ فلم نے کئی اہم ریکارڈز بھی اپنے نام کیے ہیں۔ یہ پہلی اینی میٹڈ فرنچائز ہے جس کی دو فلموں نے عالمی سطح پر ۳۵۰؍ ملین ڈالر سے زائد اوپننگ حاصل کی، جبکہ یہ اب تک کی پانچویں بڑی عالمی اوپننگ رکھنے والی اینی میٹڈ فلم بھی بن گئی ہے۔ مزید برآں، ایسٹر ویک اینڈ کے دوران اس کی اوپننگ چوتھی بڑی اوپننگ کے طور پر ریکارڈ کی گئی۔

یہ بھی پڑھئے: سنیما کون ۲۶ء: نمِت ملہوترا نےرامائن، ڈُون، اوڈیسی میں مماثلت بتائی، ٹرول

اس فلم کی کامیابی نے نہ صرف خود باکس آفس پر اثر ڈالا بلکہ پوری فلمی صنعت کو بھی تقویت دی ہے۔ کم اسکور کے مطابق ۸؍ اپریل ۲۰۲۶ء تک امریکی باکس آفس ۱۱۳ء۲؍ بلین ڈالر تک پہنچ چکا ہے، جو گزشتہ سال کے مقابلے میں ۵ء۲۳؍ فیصد زیادہ ہے۔ یہ فلم ۲۰۲۶ء کی پہلی ایسی ریلیز بن گئی ہے جس نے ۳۰۰؍ ملین ڈالر کا گھریلو سنگ میل عبور کیا، جو اس بات کا ثبوت ہے کہ عالمی سطح پر اینی میٹڈ فلموں کی مقبولیت میں مسلسل اضافہ ہو رہا ہے۔