بالی ووڈ کی معروف اداکارہ سوناکشی سنہا نے انکشاف کیا ہے کہ انہیں اپنے کریئر میں ایک فلم کی پیشکش کو ٹھکرانے پر افسوس ہے۔

بالی ووڈ کی معروف اداکارہ سوناکشی سنہا نے انکشاف کیا ہے کہ انہیں اپنے کریئر میں ایک فلم کی پیشکش کو ٹھکرانے پر افسوس ہے۔سوناکشی سنہا نے اپنے ایک انٹرویو کے دوران بتایا کہ فلم’اُڑتا پنجاب‘ میں جو کردار کرینہ کپور نے ادا کیا ہے، اس کی پیشکش پہلے مجھے کی گئی تھی لیکن میں نے انکار کردیا تھا۔اُنہوں نے اس فلم کا حصّہ نہ بننے کے باوجود بھی کہا کہ مجھے یہ فلم بہت پسند آئی اور میں نے ہدایتکار ابھیشیک چوبے اور ٹیم کے باقی ممبرس کو بھی فلم کی ریلیز کے بعد ان کے کام کی تعریف کرنے کے لئے فون کیا۔صرف اتنا ہی نہیں بلکہ سینسر بورڈ کی جانب سے ۲۰۱۶ء میں جب یہ فلم تنازع کا شکار ہوئی تبھی سوناکشی سنہا نے اس فلم کی حمایت میں اپنی آواز اُٹھائی۔ اُنہوں نے فلم کی حمایت میں ٹویٹ کیا کہ مجھے بالکل سمجھ نہیں آرہا کہ فلم ’اُڑتا پنجاب‘ کا نام اگر بدلا جائے تو کیا نام ہونا چاہئے لیکن سینسر بورڈ یقینی طور پر اس فلم کےلئے’اُڑتا مذاق‘ جیسے نام پر غور کر سکتا ہے۔ سوناکشی سنہا نے بے شک فلم’اُڑتا پنجاب‘ کی پیشکش کو مسترد کرنے پر افسوس کا اظہار کیا لیکن کچھ سوشل میڈیا صارفین کا خیال ہے کہ یہ کردار کرینہ کپور سے بہتر کوئی اور اداکارہ ادا نہیں کر سکتی تھی۔واضح رہے کہ فلمساز انوراگ کشیپ کی فلم ’اُڑتا پنجاب‘میں کرینہ کپور ایک ڈاکٹر اور بحالی مرکزچلانے والی کارکن کا کردار ادا کرتے نظر آئیں۔