ہندوستانی فلمی دنیامیں اگر چند ایسے نام تلاش کیے جائیں جنہوں نے پردے کے پیچھے رہ کر پورے بالی ووڈ کی سمت بدل دی، توآدتیہ چوپڑاان میں سرفہرست دکھائی دیتے ہیں۔ وہ نہ صرف ایک کامیاب ہدایت کار اور پروڈیوسر ہیں بلکہ جدید ہندی سنیما کے ان معماروں میں شمار کیے جاتے ہیں جنہوں نے رومانوی فلموں، بڑی پروڈکشن ویلیوز اور بین الاقوامی مارکیٹ کے تصور کو ایک نئی شکل دی۔ دلچسپ بات یہ ہے کہ اپنے والدیش چوپڑا کی طرح شہرت کے باوجود وہ ہمیشہ میڈیا سے دور رہے۔ ان کی تصاویر کم ہی منظر عام پر آتی ہیں، انٹرویوز نہ ہونے کے برابر ہیں، اور وہ چکاچوند سے دور رہ کر خاموشی سے فلمی دنیا کے سب سے طاقتور لوگوں میں شمار ہوتے ہیں۔

آدتیہ چوپڑاکی پیدائش۲۱؍مئی ۱۹۷۱ءکو ممبئی میںہوئی۔ وہ ایک ایسے گھرانے میں پیدا ہوئے جہاں فلم سازی محض پیشہ نہیں بلکہ زندگی کاحصہ تھی۔ ان کے والد یش چوپڑہ پہلے ہی ہندی سنیما میں اپنی شناخت بنا چکے تھے اور بعد میں انہوں نے اپنے بینر یش راج فلمزکوہندوستان کی سب سے بڑی فلمی کمپنیوں میں تبدیل کردیا۔ آدتیہ بچپن ہی سے فلمی ماحول میں پروان چڑھے۔ شوٹنگ سیٹس، اسکرپٹ میٹنگز، موسیقی کی بیٹھکیں اور فلمی بحثیں ان کی روزمرہ زندگی کا حصہ تھیں۔ یہی وجہ ہے کہ کم عمری میں ہی ان کے اندر کہانی سنانے کا شوق پیدا ہوگیا تھا۔

ہدایت کار کے طور پر ان کی پہلی فلم ’دل والے دلہنیا لے جائیں گےتھی‘ جسے بالی ووڈ کی تاریخ کی سب سے اہم فلموں میں شمار کیا جاتا ہے۔ ۱۹۹۵ءمیںریلیز ہونے والی اس فلم نے نہ صرف باکس آفس کےتمام ریکارڈ توڑ دیے بلکہ ہندی رومانوی سنیما کی تعریف ہی بدل ڈالی۔ فلم میں شاہ رخ خان اور کاجول کی جوڑی نے نوجوان نسل کے دل جیت لیے۔ یورپ کے حسین مناظر، پنجابی خاندانوں کی روایات، محبت اور خاندانی اقدار کا امتزاج اس انداز میں پیش کیا گیا کہ فلم ہر طبقے کے ناظرین کو پسند آئی۔

 

 

بطور پروڈیوسر آدتیہ چوپڑہ نے کئی یادگار فلمیں پیش کیں، جن میں محبتیں، ویر زارا،دھوم،بنٹی اور ببلی، رب نے بنادی جوڑی،ایک تھا ٹائیگر،پٹھان، ٹائیگر۳؍شامل ہیں۔ خاص طور پر’دھوم‘ سیریز اور بعد میں ’وائی آر ایف اسپائی یونیورس‘نے ہندوستانی ایکشن سنیما کو نئی جہت دی۔ آج یش راج فلمزکی جاسوسی فلمیں ہندوستانی سنیما کی سب سے بڑی فرنچائزمیں شمار ہوتی ہیں۔

 

 

آدتیہ چوپڑہ کی ایک اہم خوبی نئے ٹیلنٹ کو متعارف کرانا بھی ہے۔انہوں نے کئی اداکاروں، ہدایت کاروں اور موسیقاروں کو موقع دیا۔ انوشکا شرمانے ’رب نے بنادی جوڑی‘کے ذریعے آغاز کیا، جبکہ رنویر سنگھ کو’بینڈ باجا بارات‘سے بڑی پہچان ملی۔ اسی طرح کئی نوجوان ہدایت کاروں کو بھی یش راج بینر کے تحت کام کرنے کا موقع ملا۔

آج جب بالی ووڈ مسلسل تبدیلی کے دور سے گزر رہا ہے، او ٹی ٹی پلیٹ فارمز ابھر رہے ہیں، اور فلمی کاروبار کا انداز بدل رہا ہے، تب بھی آدتیہ چوپڑہ کا اثر کم نہیں ہوا۔ وہ ان لوگوں میں شامل ہیں جو سمجھتے ہیں کہ سنیما صرف تفریح نہیں بلکہ جذبات، ثقافت اور خوابوں کی دنیا ہے۔ ان کی فلموں میں محبت بھی ہے، روایت بھی، جدیدیت بھی اور کاروباری ذہانت بھی۔