انواع و اقسام کے کھانوں سے مہمانوں کی تواضع کی جا رہی تھی۔ ذیبی کا حسن تو ممتا کے نور سے اور نکھر آیا تھا۔ مَیں اور حیدر مہمانوں کے استقبال میں لگے ہوئے تھے اور تمہارے نانا نانی کی آمد کے منتظر بھی تھے۔ وہ دونوں اس تقریب میں شرکت کیلئے شہر سے روانہ ہوچکے تھے۔ ذیبی گاؤں کی سہیلیوں کے درمیان گھری ہوئی خوشی سے پھولی نہ سمار ہی تھی مگر کاتب تقدیر کے نوشتے کو کون جان سکتا ہے۔ شہر سے مجھے اور حیدر کے کانوں میں سیسہ انڈیلنے والی خبر ہرکارے کے ذریعہ ہم تک پہنچی کہ ذیبی کے والدین کی کار شہر سے گاؤں آتے ہوئے بہت برے حادثے کا شکار ہوگئی اور وہ دونوں موقع واردات پر ہی فوت ہوگئے۔ ہم دونوں پر سکتہ طاری ہوگیا مگر ہمت سے کام لے کر ہم نے اس خبر کو راز ہی رکھا۔ تقریب کی گہماگہمی ختم ہوئی۔ مہمانوں کو رخصت کرکے حیدر نے اور مَیں نے یہ تہیہ کیا کہ ذیبی کو نہ بتاتے ہوئے تم کو اور ذیبی کو نانا نانی سے ملانے شہر چلا جائے۔ ذیبی نے تو خواب میں بھی اس حادثے کا تصور نہیں کیا تھا۔ ہاں البتہ ماں باپ کے نہ آنے کا تردّد ضرور تھا۔ بہرحال اس راز کو سینے میں دبائے ہم ذیبی کو لے کر شہر روانہ ہوگئے۔ ذیبی کا گھر لوگوں سے بھرا ہوا تھا۔ تم میری گود میں تھیں۔ ذیبی حیران پریشان گھر کے اندر دوڑی چلی گئی۔ اس سے پہلے کہ حیدر لپکیں ماں باپ دونوں کی کفن میں لپٹی میتوں کو دیکھ کر ذیبی ایک چیخ مار، بیہوش ہو کر گر پڑی۔ اُسے ہوش میں لانے کی کوشش کی گئی۔ شہر کے مشہور ڈاکٹر بلائے گئے مگر اسے ہوش میں لانے کی کوئی تدبیر کارگر نہ ہوئی۔ مجبور ہو کر تدفین کر دی گئی۔ ڈاکٹروں کی انتھک کوششوں سے چند دنوں بعد جب اسے ہوش آیا تو وہ چلانے لگی ’’دیکھو وہ مجھے بلا رہے ہیں۔ چھوڑو، چھوڑو مجھے جانے دو۔‘‘ لاکھ علاج کے بعد بھی اس کی وہ ہذیانی کیفیت ختم نہیں ہوئی ہے۔ وہ لمحہ اس کی زندگی کی اذیت بن گیا۔ وہ اسی لمحے میں جی رہی ہے۔ وہ پاگل نہیں ہے احساس کے مظلوم لمحوں کا شکار ہے۔

دادی نے ایک آہ بھری۔ اُن کی آنکھیں ڈبڈبا رہی تھیں۔ ڈاکٹر صبا کی آنکھوں سے بہتے ہوئے آنسو اس کے گالوں کو بھگو رہے تھے۔ دادی نے صبا کے گالوں سے آنسو پونچھ کر اسے گلے لگا کر کہا ’’اب ہماری بٹیا رانی پڑھ لکھ کر بڑی ڈاکٹر بنے گی اور ماں کا علاج کرے گی ہے نا میری لاڈو؟‘‘ صبا دادی کی گود میں سمٹ کر سکیاں بھرتے ہوئے بول پڑی ’’جی ہاں دادی! مَیں ڈاکٹر بن کر ماں کا علاج کروں گی اور ان کو لمحوں کی اذیت سے باہر نکالوں گی۔‘‘ ’’ان شاء اللہ میری گڑیا رانی، اب چپ چاپ کھانا کھا لو۔‘‘ دادی مسکرا کر بولی۔

اس دن کے بعد سے صبا اکثر ماں کے پاس بیٹھی رہتی۔ اس کو چومتی۔ اس کے ہاتھوں کو سہلاتی۔ اس کی بے نور آنکھوں کو دیکھتی۔ اپنی جیب سے چاکلیٹ نکال کر اسے کھلاتی۔ ماں کی ممتا کو جگانے کی ناکام کوشش کرتی۔ مایوس ہو کر پھر دادی کی محبتوں میں گم ہو جاتی۔

پھر دن مہینوں اور مہینے سالوں میں تبدیل ہوگئے۔ بیٹیاں تو یوں بھی بیل کی طرح بڑھتی ہیں۔ بہت جلد صبا نے اسکول کا امتحان نمایاں نمبروں سے پاس کیا۔ صبا پورے ڈسٹرکٹ میں اوّل نمبر سے کامیاب ہوئی۔ اور شہر کے بہترین کالج میں داخلے کی حقدار بھی۔ اگرچہ اپنی اکلوتی اولاد کو اسے اپنے سے جدا کرکے تعلیم حاصل کرنے کے لئے شہر بھیجنا حیدر کے لئے آسان نہ تھا مگر وہ آہنی ارادوں کا انسان تھا اور خود بھی تعلیم کی خاطر اپنوں سے دور رہا تھا۔ اسی لئے دل پر پتھر رکھ کر دونوں ماں بیٹے نے صبا کو شہر بھیجنے کی تیاری کر لی۔ جاتے ہوئے اس نے ماں کے گلے میں بانہیں ڈال کر بہت پیار کیا۔ ماں نے بھی پہلی دفعہ اپنے سینے سے چمٹایا اور رونے لگی ’’تو کہاں جا رہی ہے؟ مجھے چھوڑ کر نہ جا۔ مجھے لے چل۔ وہ مجھے بلا رہے ہیں....‘‘ ممتا کے لمس نے اپنے اچھوتے احساس سے دوچار کیا۔ اسے لگا کاش یہ لمحہ رُک جائے اور اس لمس کی سرشاری اس کے تن بدن میں مہکتی رہے۔ جذبات پر قابو پا کر وہ سب سے رخصت ہو کر اپنی منزل کی طرف چل پڑی۔

صبا کی ذہانت کا کرشمہ تھا کہ وہ کالج کے امتحان میں نمایاں کامیابی حاصل کرکے آل انڈیا میڈیکل طلبہ کی فہرست میں اول نمبر آگئی۔ میڈیکل کالج کے اساتذہ اس کی محنت، لگن اور خوش اخلاقی سے گرویدہ ہوگئے۔ آخرکار وہ دن آ ہی گیا جب اس کی محنتوں کا پھل اس کے فائنل رزلٹ کا منتظر تھا۔

گاؤں میں ذیبی کی ذہنی حالت دن بدن بگڑتی جا رہی تھی اس کی ہذیانی کیفیت میں اضافہ ہوگیا تھا۔ وہ روز بروز کمزور ہوتی جا رہی تھی۔ دادی سے بھی سنبھلتی نہیں تھی۔ خادماؤں کو کاٹنے دوڑتی تھی۔ سب کی گرفت سے نکل کر بھاگنے کی کوشش کرتی تھی۔ ایک دن سب کی گرفت سے چھوٹ کر دروازے کی طرف دوڑی۔ دیوار سے ٹکرائی۔ سَر پر چوٹ کھا کر بیہوش ہوگئی۔ گاؤں میں کوئی اسپتال نہیں تھا۔ ذیبی کو لے کر حیدر اور دادی شہر کی طرف دوڑے۔ اسپتال میں داخلے کے بعد اسے ہوش میں لانے کی ساری کوششیں نا کام ہوگئیں۔ دماغ پر گہری چوٹ تھی۔ خون بہت بہہ چکا تھا۔ زندگی اور موت کی کشمکش میں آخر کار موت جیت گئی اور ذیبی سب کو روتا بلکتا چھوڑ کر آخرکار وہاں چلی گئی جہاں وہ جانا چاہتی تھی۔ صبا کے لئے وہ لمحہ بہت اذیت ناک تھا کیونکہ ڈاکٹر بن کر بھی وہ ماں کو موت کے منہ سے بچا نہ پائی۔ کاش گاؤں میں بھی کوئی اسپتال ہوتا اور اُسی لمحے صبا نے عہد کیا کہ وہ گاؤں میں اسپتال کھول کر بے بس انسانوں کو اذیت ناک امراض سے نجات دلانے کے لئے اپنی زندگی وقف کر دے گی۔

ڈگری حاصل کرکے گاؤں میں آنے کے بعد اس نے اپنے والد اور دادی سے اپنی خواہش کا اظہار کیا۔ دونوں بہت خوش ہوئے۔

حیدر دل و جان سے اسپتال شروع کرنے میں جٹ گئے۔ بہترین مشینیں خریدی گئیں۔ جذبہ صادق ہو تو اللہ تعالیٰ کامیابی بھی عطا کرتے ہیں۔ اسپتال میں بہترین ڈاکٹروں کو یکجا کرکے بڑی شان سے ’’صبا اسپتال‘‘ شروع کیا گیا اور صبا ڈاکٹروں کی ٹیم کے ساتھ تن من اور دھن سے مریضوں کی خدمت میں جٹ گئی۔

’’بیٹا صبا! کھانا کھا لو۔ تم نے صبح سے کچھ نہیں کھایا۔‘‘ دادی کی میٹھی آواز صبا کو ماضی کے لمحوں سے باہر نکال لائی، ’’جی دادی! ابھی ایک مریضہ کو انجکشن دے کر کام پورا کرکے آتی ہوں۔‘‘ جواب دے کر ڈاکٹر صیا پھر اپنے مشن میں مشغول ہوگئی۔