سنیچر کو زیادہ تر خواتین میزبانوں نے طالبان کے اس حکم کو مسترد کردیا تھا اور بغیر نقاب کے ہی ٹی وی پر نظر آئی تھیں،طالبان نے انتباہ دیا تھا

طالبان کے حکم کے مطابق افغانستان کے ٹی وی چینلوں کی خواتین میزبان نقاب پہن کر ٹی وی پر نظر آئیں۔حالانکہ سنیچر کو افغانستان کے نمایاں ٹی وی چلینز میں کام کرنے والی خواتین میزبان طالبان کے حکم کی نفی کرتے ہوئےچہرے ڈھانپے بغیر ٹی وی پرنظر آئی تھیں۔  اے ایف پی کی خبرکے مطابق پچھلےسال اقتدار میں واپس آنے کے بعد سے طالبان نےسول سوسائٹی پر بہت سی پابندیاں عائد کر دی ہیں، جن میںسےاکثر کا مرکز خواتین اور لڑکیوں کے حقوق کو محصور کرنے پر ہے۔ رواں ماہ افغانستان کے سپریم لیڈر ہیبت اللہ اخونزادہ نے ایک حکم نامہ جاری کیا تھا کہ خواتین عوامی مقامات پر روایتی برقعے سے اپنا چہرہ ڈھانپ کر نکلیں۔وزارت برائے فروغِ فضیلت اور برائی کی روک تھام نے خواتین ٹی وی میزبانوں کو سنیچرسےاس کی پیروی کرنےکاحکم دیا تھا، اس سے پہلے انہیں صرف سر پر اسکارف پہننا لازم تھا۔مگر افغانستان کے ٹی وی چینلز طلوع نیوز، شمشاد ٹی وی اور ون ٹی وی نے گزشتہ روز خواتین کے چہرے ڈھانپے بغیر پروگرام براہ راست نشر کیے۔ لیکن اتوار کے روز طلوع نیوز چینل کی اینکروں کو نقاب پہن کر ٹی وی پروگرام نشر کرتے ہوئے دیکھا گیا۔ وزارت برائے فروغِ فضیلت اور برائی کی روک تھام کےترجمان محمد صادق عاکف مہاجر نے کہا کہ خواتین میزبان طالبان کی ہدایت کی خلاف ورزی کر رہی ہیں، انہوںنےکہا کہ اگر وہ تعمیل نہیں کرتی ہیں تو ہم میزبانوں کے منیجرز اور سرپرستوں سے بات کریں گے۔انہوں نےکہا کہ جو بھی کسی خاص نظام اور حکومت کے تحت رہتا ہے اسے اس نظام کے قوانین اور احکامات کی پابندی کرنی ہوتی ہے، اس لیے انہیں اس حکم پر عمل درآمد کرنا چاہیے۔ طالبان نے مطالبہ کیا ہے کہ اگر خواتین سرکاری ملازمین نئےڈریس کوڈ پر عمل کرنے میں ناکام رہیں تو انہیں نوکری سے نکال دیا جائے، نہ صرف یہ بلکہ اگر حکومتی اداروں میں کام کرنے والے مردوں کی بیویاں یا بیٹیاں اس حکم کی تعمیل کرنے میں ناکام رہیں تو ان کو نوکری سے فارغ ہونے کا خطرہ ہے۔ محمد صادق عاکف مہاجر نے کہا کہ اگر حکم کی تعمیل نہ کی گئی تو میڈیامنیجرز اور منحرف خواتین میزبانوں کے مرد سرپرست بھی جرمانے کے ذمہ دار ہوں گے۔ افغانستان میں امریکی قیادت کی۲؍دہائیوں کی فوجی مداخلت کے دوران خواتین اور لڑکیوںنےسخت پدر شاہی ملک میں معمولی فوائد حاصل کیے تھے۔