انتخابی کمیشن میں بے ضابطگیوں، تینوں  کمشنروں میں اختلاف اور چیف الیکشن کمشنر گیانیش کمار  پر من مانی کے الزامات کےبیچ ملک گیر احتجاج کے دوران پیر کو کانگریس نے براہ راست وزیراعظم مودی کو نشانہ بنایا ۔ پارٹی نے ۲۰۲۴ء میں  بنارس پارلیمانی حلقے سے ان کی فتح پر سوالیہ نشان کھڑے کرتے ہوئے مذکورہ الیکشن میں بدعنوانی اور دھاندلی کا الزام  عائد کیا ۔اتر پردیش کانگریس کے صدر اجے رائے  جو مودی کے مدمقابل تھے، نے الزام لگایا کہ۲۰۲۴ءکے  بنارس انتخابات میں بے ضابطگیاں ہوئی تھیں اور گیانیش کمار نے مبینہ طور پر بی جے پی کی کامیابی میں مدد کی تھی۔ انہوں نے مطالبہ کیا کہ بنارس کا  انتخاب منسوخ کرکے دوبارہ ووٹنگ کرائی جائے۔یہ الیکشن  مودی نےایک لاکھ ۵۲؍ہزار ووٹوں کے معمولی فرق سے جیتا تھا جبکہ گنتی کے دوران کئی مرحلوں تک کانگریس کے امیدوار اجے  رائے آگے چل رہے تھے۔