غزہ کے شہریوں کو علاقے سے جانے کی ہدایت دی لیکن حماس انہیں جانے سے روک رہی ہے۔

اسرائیلی وزیراعظم نیتن یاہو کا کہنا ہے کہ اسرائیل غزہ میں فوجی جارحیت جاری رکھے گا، غزہ کے شہریوں کو علاقے سے جانے کی ہدایت دی  لیکن حماس انہیں جانے سے روک رہی ہے۔ 
 غیر ملکی خبر رساں ادارے کی رپورٹ کے مطابق اسرائیلی وزیر اعظم نیتن یاہو کا کہنا تھا کہ ۷؍ اکتوبر۲۰۲۳ء کے حماس کے حملے سے حاصل ہونے والے اسباق نے ایک آزادانہ ہتھیار ساز صنعت قائم کرنے کی ضرورت ثابت کردی ہے تاکہ بین الاقوامی پابندیوں کے سامنے بھی  اسرائیلی فوج ثابت قدم رہ سکے۔ 
 اسرائیلی وزیر اعظم نے کہا کہ وہ اس ماہ امریکہ جائیں گے جہاں وہ جنرل اسمبلی میں اپنی تقریر کے بعد صدر ٹرمپ سے ملاقات کریں گے۔ اُن کا کہنا تھا کہ امریکی صدر نے مجھے وہائٹ ہاؤس کی دعوت دی ہے۔ میں اقوام متحدہ میں اپنی تقریر کے بعد ان سے ملوں گا۔ 
 رپورٹس کے مطابق اسرائیلی وزیر اعظم نے اس سے قبل کہا تھا کہ فوج غزہ شہر میں دشمن کو ختم کرنے اور اسی دوران شہری آبادی کو خالی کروانے کے لئے کام کر رہی ہے۔ 
 نیتن یاہو کا کہنا تھا کہ ہماری حکومت اہل غزہ کو تیزی سے نکالنے کے لئے اضافی گزرگاہیں کھولنے کی کوششوں میں مصروف ہے تاکہ عام شہریوں کو جنگجوؤں سے علاحدہ کیا جا سکے ۔ 
 اسرائیلی فوج کا کہنا ہے کہ وہ جنگ کے اہداف حاصل کرنے تک اپنے آپریشنز جاری رکھے گی اور حماس کی حملہ کرنے کی صلاحیت کا خاتمہ کرے گی۔ اسرائیلی قابض فوج نے گزشتہ روز اعلان کیا تھا کہ غزہ کے سب سے بڑے اور تباہ حال شہر میں زمینی کارروائی شروع ہو گئی ہے۔ ایک اسرائیلی فوجی اہلکار کا کہنا تھا کہ شہر میں تقریباً ۳؍ہزار حماس کے جنگجو موجود ہو سکتے ہیں۔ اسرائیلی فوج کا کہنا تھا کہ زمینی دستے شہر کے اندر داخل ہو رہے ہیں اور وسطی شہر کی طرف پیش قدمی میں مصروف ہیں۔