مغربی بنگال کے بردھمان دُرگا پور انتخابی حلقے سے ترنمول کانگریس کے امیدوار کیرتی آزاد نے ۹۰ء کی دہائی میں جب سیاست میں قدم رکھا تھا تو انہوں نے انتخابات میں جیت کے ساتھ شروعات کی تھی۔ وہ ۳؍ بار رکن پارلیمنٹ رہ چکے ہیں۔

مغربی بنگال کے بردھمان دُرگا پور انتخابی حلقے سے ترنمول کانگریس کے امیدوار کیرتی آزاد نے ۹۰ء کی دہائی میں جب سیاست میں قدم رکھا تھا تو انہوں نے انتخابات میں جیت کے ساتھ شروعات کی تھی۔ وہ ۳؍ بار رکن پارلیمنٹ رہ چکے ہیں۔ انہیں پہلی جیت ۱۹۹۳ء کے دہلی اسمبلی انتخابات میں ملی تھی جب انہوں نے گول مارکیٹ انتخابی حلقے میں کانگریس کے امیدوار برج موہن بھاما کو ہرایا تھا۔۱۹۹۸ء میں وہ اسی سیٹ سے شیلا دکشت سے ہار گئے تھے ۔ اس کے بعد ہی شیلا دکشت دہلی کی وزیر اعلیٰ بنی تھیں اور۳؍ میعادیں مکمل کی تھیں۔ ۱۹۹۹ء میں انہوں نے پہلی بار بہار کے دربھنگہ سے پارلیمانی الیکشن لڑا اور فتحیاب رہے۔ اسی حلقے سے اور بی جے پی کے ہی ٹکٹ پر انہوں نے ۲۰۰۹ء اور ۲۰۱۴ء میں بھی الیکشن جیتا تھا۔ ۲۰۱۵ء میں ڈی ڈی سی اے میں کرپشن کے معاملے میں ارون جیٹلی  پر تنقید کرنے کی پاداش میں انہیں بی جےپی نے معطل کردیا تھا حالانکہ اس وقت عام آدمی پارٹی اور کانگریس دونوں نے ہی ان کی حمایت کی تھی۔۲۶؍ سال بی جے پی میں رہنے کے بعد فروری ۲۰۱۹ء میں وہ کانگریس میں شامل ہوئے تھے اور اسے ’گھر واپسی‘ قراردیا تھا۔ کانگریس نے جھارکھنڈ کی دھنباد لوک سبھا سیٹ سے انہیں اتارا تھا لیکن وہ بی جے پی کے پشوپتی ناتھ سنگھ سے ہار گئے تھے۔ ۲۰۲۱ء میں وہ ترنمول کانگریس میں شامل ہو گئے۔ دیکھا گیا ہے کہ کیرتی آزاد کو الیکشن میں جیت اسی وقت ملی ہے جب وہ بی جے پی امیدوار کی حیثیت سے لڑے۔ کانگریس ان کو راس نہیں آئی حالانکہ انکے والد اور بہار کے سابق وزیر اعلیٰ بھگوت جھا آزاد کانگریس کے بڑے لیڈر تھے۔ اب جبکہ کیرتی آزاد ترنمول کانگریس کے امیدوار ہیں تو یہ دیکھنا اہم ہے کہ وہ بی جے پی کے قد آور لیڈردلیپ گھوش کو کتنی ٹکر دے سکتے ہیں جن کا مقامی سیاست میں کافی اثر ورسوخ ہے اور جن کا۲۰۱۹ء میں مغربی بنگال میں بی جے پی کو ۴۲؍ میں سے ۱۸؍ سیٹیں جتانے میں اہم کرداررہا ہے۔