مرکزی وزیر نے کہا ’’۲۰۔۳۰؍سال سے محنت کرنے والے کارکنان کو نظر انداز کرکے وزیروں کی بیویوں کو ٹکٹ دیئے جا رہے ہیں‘‘

مرکزی وزیر نتن گڈکری نے ایک بار پھر اپنی پارٹی کے خلاف محاذ کھولا ہے۔ انہوں نے بی جے پی پر اقرباپروری کا الزام لگاتے ہوئے کہا ’’ جو کارکنان ۲۰؍ ۔ ۳۰؍ سال سے پارٹی کیلئے محنت کرنے والا کارکن جب الیکشن کے وقت ٹکٹ مانگنے جاتا ہے تو اسے نظر انداز کرکے کسی وزیر کی بیوی کو ٹکٹ دیدیا جاتا ہے۔ ‘‘ گڈکری نے یہاں تک کہہ دیا کہ ’’ حیرانی کی بات یہ ہے کہ عوام انہیں ووٹ بھی دیتے ہیں۔ عوام کو چاہئے کہ ایسے امیدواروں کو ووٹ نہ دیں تاکہ انہیں سبق ملے۔‘‘ یاد رہے کہ نتن گڈکری نے گزشتہ ۲؍ یا ۳؍ ماہ  میں تیسری مرتبہ اس طرح کھل کر اپنی پارٹی پر تنقید کی ہے۔
    بے روک ٹوک بات کرنے کے عادی نتن گڈکری ایک ٹی وی چینل کو انٹرویو دے رہے تھے ۔ اس دوران ان سے پارٹی پر اقربا پروری کا الزام لگانے کے تعلق سے سوال کیا گیا تو انہوں نے کہا’’ مجھے بہت برا لگتا ہے جب ۲۰؍۔ ۳۰؍ سال تک پارٹی کیلئے کام کرنے والا کارکن ٹکٹ مانگنے آتا ہے ، اسی وقت کوئی وزیر کہہ دیتا ہے کہ میری بیوی کو یا میری بیٹی کو ٹکٹ دیجئے، اس بے چارے کاٹکٹ چلا جاتا ہے۔ یہ بہت افسوس ناک بات ہے۔ لیکن اس کیلئے عوام ذمہ دار ہے۔ ‘‘ انہوں نے کہا ’’کسی بھی پارٹی کے وراثت دار امیدوار کےکھڑے ہونے پرعوام انہیں شکست دیدیں تو پارٹیاں انہیں کھڑا ہی نہیں کریں گی۔ عوام کو اس پر رد عمل ظاہر کرنا چاہئے لیکن عوام ہی انہیں منتخب کرتے ہیں جس کی وجہ سے وہ قبول کئے جاتے ہیں۔‘‘
 یاد رہے کہ حالیہ میونسپل الیکشن میں بی جے پی نے صدر بلدیہ کے عہدے کیلئے زیادہ وزیروں کی اہل خانہ ہی کو امیدوار بنایا ہے۔ جلگائوں کے جامنیر میں گریش مہاجن کی اہلیہ کو ٹکٹ دیا گیا جو بلا مقابلہ صدربلدیہ منتخب ہو گئیں، وڈائچہ میں جے کمار روال کی ماں کو ٹکٹ دیا گیا وہ بھی بلا مقابلہ منتخب ہو گئیں، جبکہ رکن اسمبلی منگیش چوہان کی بیوی پرتبھا چوہان کو ٹکٹ دیا گیا تھا۔ ایوت محل میں اشوک یوکے کی بیٹی پریہ درشنی کو صدر بلدیہ کا ٹکٹ دیا گیا ۔ حتیٰ کہ خود گڈکری کے ضلع ناگپور میں دیویندر فرنویس کے ماموں زاد بھائی کو ٹکٹ دیا گیا جو بلا مقابلہ الیکشن جیت گئے۔ 
 نتن گڈکری نے کہا کہ سیاسی پارٹیاں کتنا ہی اقربا پروری کے خلاف بیان دیں لیکن الیکشن میں لیڈران کے خاندان کے کسی فرد یا رشتہ ہی کو ٹکٹ دیا جاتا ہے۔ بی جے پی میں بھی پارلیمانی الیکشن، پھر اسمبلی الیکشن اور میونسپل الیکشن کے دوران اس طرح کی مثالیں سامنے آئی ہیں۔ یاد رہے کہ نتن گڈکری نے اس سے قبل ناگپور میں ایک تقریب کے دوران وزیر برائے محصول چندر شیکھر باونکولے کی موجودگی میں ان کا نام لے کر کہا تھا کہ پارٹی میں اقربا پروری عروج پر ہے۔ ان کا کہنا تھا کہ اس کیلئے آپ ذمہ دار ہیں جو برسوں سے محنت کرنے والے کارکنان کو ٹکٹ نہیں دیتے یا انہیں کسی مناسب مقام پر ’ ایڈجسٹ‘ نہیں کرتے۔  اہم بات یہ ہے کہ نتن گڈکری کے اس بیان پر چندر شیکھر باونکولے نے کوئی رد عمل ظاہر نہیں کیا تھا نہ ہی پارٹی نے ان سے کوئی باز پرس کی تھی۔ 
  اب کی بار نتن گڈکری نے اور بڑے پیمانے پر یعنی ایک ٹی وی چینل پر بیٹھ کر اس طرح کا بیان دیا ہے حالانکہ انہوں نے کسی لیڈر کا نام نہیں لیکن بی جے پی کو ذکرضرور کیا۔ اطلاع کے مطابق نتن گڈکری اس بات سے ناراض ہیں کہ ناگپور میں ان کے قریبی کئی پارٹی لیڈران اور کارکنان کو کنارے لگا کر دیویندر فرنویس اور چندر شیکھر باونکولے نے اپنے قریبی افراد کو موقع دیا ہے۔ اس سے قبل دو مرتبہ نتن گڈکری نے بھرے جلسے میں بی جے پی کی اقربا پروری پر تنقید کی تھی۔ حالانکہ خود گڈکری پر بھی اپنے بیٹوں کی کمپنیوں کو فائدہ پہنچانے کیلئے ایتھنال سے متعلق قانون منظور کرنے کا الزام لگا ہے۔