فرانسیسی صدر میکرون نے ایک بیان میں کہا کہ یورپ کو جغرافیائی سیاسی طاقت بننا سیکھنا چاہئے، یہی درست وقت ہے، انہوں نے یورپ کے زوال کے دعوؤں کو مسترد کر دیا اور مغربی ممالک کو متاثر کرنے والی غلط معلومات سے نمٹنے کی کوششوں کا دفاع کیا۔

فرانس کے صدر نے کہا ہے کہ یورپ کو اپنی توجہ طویل المدتی حکمت عملی پر مرکوز کرنی چاہیے، جس میں گہرائی تک حملہ کرنے کی صلاحیتیں پیدا کرنا اور یہ جائزہ لینا شامل ہے کہ فرانس کی نیوکلیئر ڈیٹرنس (جوہری صلاحیت  بلاک کے مستقبل کےحفاظتی ڈھانچے میں کس طرح فٹ ہو سکتی ہے۔جمعہ کو میونخ سیکیورٹی کانفرنس سے خطاب کرتے ہوئے، صدر ایمینوئل میکرون نے ان الزامات کو مسترد کر دیا کہ یورپ زوال پذیر ہے ساتھ ہی انہوں نے مغربی ممالک کو نقصان پہنچانے والی غلط معلومات اور سوشل میڈیا کی زیادتیوں سے نمٹنے کے لیے اپنی کوششوں کا دفاع کیا۔میکرون نے کہا، ’’یہ بے باکی کا صحیح وقت ہے۔ یہ ایک مضبوط یورپ کا صحیح وقت ہے۔ یورپ کو جغرافیائی سیاسی طاقت بننا سیکھنا ہوگا۔ یہ ہمارے ڈی این اے کا حصہ نہیں تھا۔‘‘
بعد ازاں یورپ کے تئیں امریکی تجارت اور خارجہ پالیسی پر واضح طنز کرتے ہوئے، میکرون نے کہا کہ یورپیوں کو دنیا کو اپنے مفادات کے دفاع کے لیے اپنا غیر متزلزل عزم دکھانا چاہیے۔انہوں نے مزید کہا، یہ یقیناً یوکرین کے لیے اپنی حمایت جاری رکھنے سے شروع ہوتا ہے، لیکن یہ غیر منصفانہ ٹیرف کو مسترد کرنے اور یورپی سرزمین پر غیر منصفانہ دعوؤں کو شائستگی سے مسترد کرنے کے ساتھ بخوبی آگے بڑھ سکتا ہے۔ ہم نے یہی کیا ہے اور ہم یہی کرتے رہیں گے۔فرانسیسی صدر نے مزید کہا کہ یورپیوں کو یہ کام اپنی سوچ اور اپنے مفادات کے تحت شروع کرنا چاہیے۔انہوں نے کہا،’’ اس لیے آج میری تجویز یہ ہے کہ اس اہم مسئلے پر مشاورت کا ایک سلسلہ شروع کیا جائے، جسے ہم نے اپنے برطانوی اور جرمن ساتھیوں کے ساتھ مل کر تشکیل دینا شروع کیا ہے۔
واضح رہے کہ میکرون، جو اس ماہ کے آخر میں اس بارے میںبیان دینے والے ہیں کہ وہ یورپ کے اندر فرانس کے جوہری کردار کو کیسے دیکھتے ہیں، نے کہا کہ انہوں نے یہ مشاورت شروع کر دی ہے۔ انہوں نے کہا، ’’ہمیں یورپ میں اپنے سلامتی کے ڈھانچے کو نئے سرے سے ترتیب دینا اور تنظیم نو کرنا ہے۔ کیونکہ سلامتی کا پرانا ڈھانچہ مکمل طور پر سرد جنگ کے دور میں ترتیب اور تشکیل دیا گیا تھا۔ اس لیے یہ اب موزوں نہیں رہا۔‘‘انہوں نے کہا کہ ،’’اس نقطہ نظر میں ہمیں جوہری صلاحیت کو نئے سرے سے مربوط کرنا ہوگا۔‘‘