کانگریسی لیڈر پرینکا گاندھی نے وکیل حسن کے گھر پر انہدامی کارروائی کے بعد بی جے پی حکومت کو نشانہ بناتے ہوئے کہا کہ غریبوں کے گھروں کو منہدم کرنا اور ان کی توہین کرنا بی جے پی کے انیائے کال کی حقیقت ہے۔ وکیل حسن نے اپنی ٹیم کے ساتھ جان پر کھیل کر مزدورں کی جان بچائی۔ شہرت کیلئے، بی جے پی کے متعدد لیڈران ان کے ساتھ تصویریں نکالنے گئے تھے۔ اب جب شہرت ختم ہوگئی تو اسی وکیل حسن کے گھر کو منہدم کردیا گیا۔ ان کے بچوں کے سر سے چھت چھین لی گئی۔

کانگریسی لیڈر پرینکا گاندھی واڈرا نے بی جے پی کو اترکاشی سرنگ کے ریسکیوور وکیل حسن کے گھر کو منہدم کرنے کیلئے نشانہ بنایا اور کہا کہ غریبوں کے گھر منہدم کرنا اور ان کی توہین کرنا بی جے پی کے انیائے کال کی حقیقت ہے۔ خیال رہے کہ آج دہلی کے گاؤں کھاجوری کھاس میں وکیل حسن، جنہوں نے گزشتہ سال اپنی ٹیم کے ساتھ اترکاشی سرنگ میں پھنسے ۴۱؍ مزدوروں کو نکالنے کے بعد شہرت پائی ہے، کے گھر کے ساتھ ڈی ڈی اے نے اپنی انہدامی مہم میں دیگر گھروں پر بھی انہدامی کارروائی کی ہے۔ اس حوالے سے پرینکا گاندھی نے حسن کی اہلیہ کا ویڈیو اپنے ایکس پوسٹ پر شیئر کیا ہے جس میں وہ کہہ رہی ہیں کہ میرے شوہر اترکاشی کے حادثے میں ہیرو بن کے ابھرے تھے۔ ان کا سب احترام کرتے ہیں اور اس کے بدلے میں انہوں نے ہمارا گھر ہی ہم سے چھین لیا۔

“मेरे हसबैंड तो हीरो थे उत्तरकाशी के… 41 लोगों की जान बचाई थी उन्होंने… सब उन्हें सम्मान दे रहे थे। आज उस सम्मान के बदले मेरा मकान ले लिया!”

वकील हसन ने अपनी जान जोखिम में डालकर उत्तरकाशी सुरंग में फंसे मजदूरों की जान बचाई थी। तब अपने प्रचार के लिए भाजपा के बड़े-बड़े नेताओं… pic.twitter.com/7exJnU5F9f

— Priyanka Gandhi Vadra (@priyankagandhi) February 29, 2024

پرینکا گاندھی نے مزید کہا کہ حسن نے اپنی جان پر کھیل کر مزدورں کی جان بچائی۔ اس کے بعد، شہرت کیلئے، بی جے پی کے بہت سے لیڈران ان کے ساتھ تصویریں نکالنے کیلئے گئے تھے۔ اب جبکہ شہرت ختم ہو گئی ہے تو اسی وکیل حسن کو جیل میں بند جبکہ ان کے گھر کو منہدم کردیا۔ ان کے بچوں کے سر سے چھت چھین لی گئی ہے۔

یہ بھی پڑھئے: دہلی: ڈی ڈی اے نے اترکاشی سرنگ کے امدادی کارکن وکیل حسن کا گھر منہدم کردیا

انہوں نے بی جے پی کو نشانہ بناتے ہوئے کہا کہ غریبوں کے گھروں کو منہدم کرنا، انہیں تباہ کر دینا، انہیں ٹارچر کرنا اور ان کی توہین کرنا بی جے پی کے انیائے کال میں ہونے والی ناانصافی کی حقیقت ہے۔ عوام اس ناانصافی کا کھل کر جواب دیں گے۔
ڈی ڈی اے کا کہنا ہے کہ یہ انہدامی مہم اس زمین پر کی گئی ہے جو ترقیاتی پروجیکٹ کا حصہ تھی۔ پولیس نے کہا کہ غیر قانونی ڈھانچوں کو اس مہم میں منہدم کیا گیا ہے۔ وکیل حسن کا گھر منہدم کرنے کے بعد ڈی ڈی اے نے وکیل حسن اور ان کے گھر کو عارضی مکان میں منتقل ہونے کی پیشکش کی تھی جسے حسن نے ٹھکرا دیا۔ وکیل حسن نے خبررساں ایجنسی کو بتایا کہ انہیں گوندی پوری میں گھر کی پیشکش کی جارہی تھی جسے انہوں نے ٹھکرا دیا کیونکہ یہ صرف زبانی یقین دہانی تھی۔