جو ڈیشیل انکوائری پر زور ، عدلیہ سے اپنا کردار ادا کرنے کی اپیل ، بھر پورتعاون کا وعدہ ، پاکستان میں جمہوریت ختم ہونے کا الزام
EPAPER
Updated: May 30, 2023, 11:07 AM IST | Islamabad
جو ڈیشیل انکوائری پر زور ، عدلیہ سے اپنا کردار ادا کرنے کی اپیل ، بھر پورتعاون کا وعدہ ، پاکستان میں جمہوریت ختم ہونے کا الزام
پاکستان تحریک انصاف ( پی ٹی آئی)کے سربراہ عمران خان نے اپنی خاتون کارکنوں کی رہائی کامطالبہ کیا اور اس میں عدلیہ سے اپنا کردار ادا کرنے پر زو ر دیا۔ پیر کو عمران خان نے ہیش ٹیگ ’قوم کی بیٹیاں غیرمحفوظ‘ کے ساتھ ٹویٹ کیا ، ’’عدلیہ سے از خود نوٹس کی اپیل کرتا ہوں کہ جن خواتین نے صرف پرامن احتجاج کیا، انہیں رہا کرایا جائے اور اس واقعہ کی مکمل جوڈیشیل انکوائری کروائی جائے، ہم اس میں بھرپور تعاون کریں گے۔ ‘‘
پی ٹی آئی سربراہ نے ایک اور ٹویٹ میں لکھا،’’تحریک انصاف وہ جماعت ہے جس میں ہر طبقہ فکر سے خواتین شامل ہو کر قومی سیاست میں شامل ہوئیں۔اس سے بڑا ظلم کیا ہوگا کہ آپ خوف پھیلا کر ملک کی آدھی آبادی کو سیاست سے دور کر دیں؟‘‘
دریں اثناء عمران خان نے عدلیہ سے جمہوریت کے تحفظ کی اپیل کی ۔ انہوں نے اپنےایک بیان میں کہا ، ’’پاکستان میں جس طرح کی چیزیں اب ہو رہی ہیں، اس کا تو کوئی تصور بھی نہیں کر سکتا تھا، ملک میں جمہوریت ختم ہوگئی ہے، اسلئے میں اپنی سپریم کورٹ کے۱۵؍ کے۱۵؍ ججز سے اپنے عوام کی طرف سے اپیل کرتا ہوں کہ تاریخ آپ کا کردار یاد رکھے گی، اب تک تو لگ رہا ہے کہ آپ اپنی طاقت، آزادی طاقتور کے سامنے ختم کرتے جا رہے ہیں لیکن جس طرح ہمارے بنیادی حقوق سلب کئے جا رہے ہیں، اس پر آپ کو اسٹینڈ لینا پڑے گا۔‘‘