انڈین فلم فیسٹیول آف میلبورن (آئی ایف ایف ایم) ، جو۱۳؍ سے ۲۳؍ اگست ۲۰۲۶ءتک آسٹریلیا کے شہر میلبورن میں منعقد ہوگا، گزشتہ کئی برسوں سے ہندوستانی سنیما کے عالمی سطح پر سب سے معتبر اور نمایاں فلمی میلوں میں شمار کیا جاتا ہے۔

انڈین فلم فیسٹیول آف میلبورن (آئی ایف ایف ایم)  ، جو۱۳؍ سے ۲۳؍ اگست  ۲۰۲۶ءتک آسٹریلیا کے شہر میلبورن میں منعقد ہوگا، گزشتہ کئی برسوں سے ہندوستانی سنیما کے عالمی سطح پر سب سے معتبر اور نمایاں فلمی میلوں میں شمار کیا جاتا ہے۔ اس سال کے فیسٹیول میں بالی ووڈ کی معروف اداکارہ رانی مکھرجی کو لا ٹروب یونیورسٹی (La Trobe University)کی جانب سے باوقاراعزازی ڈاکٹر آف لیٹرز (Honorary Doctor of Letters) کی ڈگری سے نوازا جائے گا۔ یہ اعزاز ۱۴؍ اگست  ۲۰۲۶ء کو میلبورن کے  فیڈریشن اسکوائر میں ایک خصوصی تقریب کے دوران پیش کیا جائے گا۔ رانی مکھرجی کو یہ اعزاز ہندوستانی سنیما میں ان کی غیرمعمولی خدمات اور خواتین، بچوں اور معاشرے کے محروم طبقات کی فلاح کے لیے ان کی طویل سماجی وابستگی کے اعتراف میں دیا جا رہا ہے۔

یہ بھی پڑھئے:شیخ حسینہ کو واپس آ کر مقدمے کا سامنا کرنا چاہیے: وزیر اعظم کے مشیر

ہندوستانی سنیما کا عالمی جشن
انڈین فلم فیسٹیول آف میلبورن گزشتہ کئی برسوں سے ہندوستانی فلمی صنعت کے ممتاز فنکاروں، ہدایت کاروں اور فلم سازوں کو ایک پلیٹ فارم پر جمع کرتا آ رہا ہے۔ یہ فیسٹیول نہ صرف ہندوستان اور آسٹریلیا کے درمیان ثقافتی تعلقات کو مضبوط بناتا ہے بلکہ ان کہانیوں اور فنکاروں کو بھی خراجِ تحسین پیش کرتا ہے جنہوں نے دنیا بھر کے ناظرین پر گہرا اثر چھوڑا ہے۔
تقریباً تین دہائیوں پر محیط شاندار کریئر
رانی مکھرجی گزشتہ تقریباً ۳۰؍ برسوں  سے ہندوستانی فلم انڈسٹری کی صفِ اول کی اداکاراؤں میں شمار ہوتی ہیں۔ انہوں نے ’’بلیک‘‘  ، ’’نو ون کلڈ جیسیکا‘‘  ، ’’ہچکی‘‘  ، ’’مردانی‘‘ سیریز اور ’’مسز چٹرجی ورسز ناروے‘‘ جیسی فلموں میں اپنی شاندار اداکاری کے ذریعے خواتین کے حقوق، صنفی انصاف، خصوصی افراد کی شمولیت اور سماجی تبدیلی جیسے اہم موضوعات کو مرکزی دھارے کے سنیما تک پہنچانے میں اہم کردار ادا کیا ہے۔
سماجی خدمات میں بھی سرگرم
فلمی کریئر کے علاوہ رانی مکھرجی بچوں کی صحت، تعلیم اور کمیونٹی کی ترقی سے متعلق مختلف فلاحی منصوبوں کی بھی حمایت کرتی رہی ہیں، جو معاشرے میں مثبت تبدیلی لانے کے لیے ان کے عزم کی عکاسی کرتا ہے۔

As Rani Mukerji celebrates 30 remarkable years in Indian cinema, the Indian Film Festival of Melbourne is honoured to celebrate another defining milestone in her illustrious journey. At IFFM 2026, she will be conferred an Honorary Doctorate by La Trobe University, pic.twitter.com/9MGv3CuBpv

— Indian Film Festival of Melbourne (@IFFMelb) July 15, 2026

رانی مکھرجی کا اظہارِ تشکر
اعزاز ملنے پر رانی مکھرجی نے کہا’’لا ٹروب یونیورسٹی کی جانب سے اعزازی ڈاکٹر آف لیٹرز کی ڈگری ملنا میرے لیے انتہائی اعزاز اور انکساری کی بات ہے۔ میری زندگی کے سفر میں سنیما میرا سب سے بڑا استاد رہا ہے  اور میں ہمیشہ یہ یقین رکھتی ہوں کہ کہانیاں لوگوں میں ہمدردی پیدا کرتی ہیں، اہم موضوعات پر گفتگو کو جنم دیتی ہیں اور مثبت تبدیلی لانے کی طاقت رکھتی ہیں۔ 
 انہوں نے مزید کہاکہ ’’انڈین فلم فیسٹیول آف میلبورن کے دوران یہ اعزاز حاصل کرنا میرے لیے اسے مزید خاص بنا دیتا ہے کیونکہ یہ فیسٹیول مسلسل عالمی سطح پر ہندوستانی سنیما کا جشن مناتا رہا ہے۔ میں لا ٹروب یونیورسٹی اور آئی ایف ایف ایم کی تہہ دل سے شکر گزار ہوں کہ انہوں نے مجھے اس قابلِ قدر اعزاز سے نوازا۔  رانی نے کہا کہ انہیں اپنے کریئر میں ایسی متعدد متاثر کن فلموں میں کام کرنے کا موقع ملا، جن کے ذریعے وہ انسانی حوصلے، جذبے اور ہر مشکل کے خلاف ڈٹ جانے والی کہانیاں دنیا کے سامنے لا سکیں۔

یہ بھی پڑھئے:ارشد وارثی ۱۷؍ سال کی عمر میں گلی گلی جاکر کاسمیٹکس کا سامان فروخت کرتے تھے

انہوں نے مزید کہا’’انسانی کہانیاں ہمیشہ مجھے متاثر کرتی رہی ہیں اور میں سنیما کی بدولت اپنی زندگی میں بے شمار مختلف کردار جینے کا موقع پا سکی ہوں۔ میں آسٹریلیا اور آئی ایف ایف ایم کی جانب سے ملنے والا یہ خصوصی اعزاز اپنے وطن ہندوستان اور دنیا بھر کے ان تمام لوگوں کے نام کرتی ہوں، جن کی محبت نے مجھے ایک اداکارہ بننے کی طاقت دی اور میری زندگی کو اتنا خوبصورت بنایا۔