تہواروں اور شادی کے موسم میں قیمتی دھات کی طلب میں اضافہ ہونے سے اس کے دام اور بھی بڑھیں گے۔ دہلی میں ۱۰؍گرام سونے کی قیمت ۶۲؍ہزار روپے کے قریب

ملک بھر میں بدھ کو سونے کی قیمت میں اضافہ جاری ہے۔ ۲۴؍ کیرٹ سونے کی قیمت۱۰۰؍ روپے اضافے سے ۲۰۰؍ روپے ہوگئی۔ اس کے ساتھ ہی۲۲؍ کیرٹ سونے کی قیمت میں۱۰۰؍ سے۱۵۰؍ روپے کا اضافہ دیکھا  گیا۔ دہلی میں۲۴؍ کیرٹ ۱۰؍ گرام سونے کی قیمت۶۲؍ ہزار روپے کی سطح سے صرف۵۰؍ روپے دور ہے۔ تہواروں  کے موسم میں سونے کی طلب میں اضافے کی وجہ سے قیمت بھی بڑھ رہی ہے۔  
   دوسری طرف بدھ یعنی۲۵؍اکتوبر ۲۰۲۳ء کو ممبئی میں سونے کی قیمتوں میں کمی دیکھی گئی۔ انڈیا بلین اینڈ جیولرس اسوسی ایشن (آئی بی جے اے) کی ویب سائٹ کے مطابق، بلین مارکیٹ میں۲۴؍ کیرٹ سونے کی قیمت۹۶؍ روپے بڑھ کر ۶۰۶۰۶؍ روپے فی۱۰؍ گرام ہو گئی ہے جبکہ ۱۸؍ کیرٹ سونے کی قیمت ۴۵؍ ہزار۴۵۲؍ روپے ہوگئی۔ اس کے ساتھ ہی  بدھ کو چاندی کی قیمت میں بھی کمی دیکھی گئی ہے۔ یہ۵۶۴؍ روپے گر کر ۷۱۵۳۰؍  روپے فی کلو پر آ گیا ہے۔ پہلے یہ ۷۲۰۹۴؍ روپے پر تھا۔
  اکتوبر کے مہینے میں اب تک سونے اور چاندی کی قیمتوں میں زبردست اضافہ دیکھنے میں آیا ہے۔ اس ماہ اب تک سونے کی قیمت میں ۲۸۸۷؍  روپے کا اضافہ دیکھا گیا ہے۔ اس مہینے کے آغاز میں یعنی یکم اکتوبر کو یہ۵۷۷۱۹؍ روپے فی۱۰؍گرام پر تھا جو کہ اب۶۰۶۹۸؍ روپے ہے۔ اس ماہ چاندی کی قیمت میں معمولی کمی آئی ہے اور یہ۷۱۶۰۳؍  روپے فی کلو سے کم ہو کر۷۱۵۳۰؍  روپے پر آ گئی ہے۔
  بین الاقوامی اور مقامی مارکیٹس میں بھی سونے اورچاندی کی قیمتوں میں اضافہ جاری رہنے کی توقع ہے۔ ایچ ڈی ایف سی سیکیورٹیز کے کموڈٹی اور کرنسی کے سربراہ انوج گپتا نے کہا کہ بین الاقوامی مارکیٹ میں بانڈ کی پیداوار کم ہو رہی ہے اور ڈالر کمزور ہو رہا ہے۔ یہ سونے کی حمایت جاری رکھے گا۔اس کے علاوہ مقامی مارکیٹ میں تہواروں کی مانگ بڑھے گی۔ اس کے بعد شادیوں کا سیزن شروع ہو جائے گا۔ ایسے میں مانگ بڑھنے سے قیمتیں متاثر ہوں گی۔ اس کی وجہ سے دیوالی تک سونا۶۲؍ ہزار اور چاندی۷۵؍ ہزار تک جا سکتا ہے۔
 سونے کی قیمت زیادہ تر مارکیٹ میں سونے کی طلب اور رسد کی بنیاد پر طے کی جاتی ہے۔ اگر سونے کی مانگ بڑھی تو شرح بھی بڑھے گی۔ سونے کی سپلائی بڑھی تو قیمت کم ہو جائے گی۔ سونے کی قیمت عالمی اقتصادی حالات سے بھی متاثر ہوتی ہے۔ مثال کے طور پر، اگر بین الاقوامی معیشت خراب کارکردگی کا مظاہرہ کر رہی ہے تو سرمایہ کار ایک محفوظ سرمایہ کاری کےمتبادل  کے طور پر سونے کی طرف دیکھیں گے۔ اس سے سونے کی قیمت بڑھے گی۔