شاہ رخ خان کی فلم ’’پٹھان‘‘ کی تاریخی کامیابی کے بعد یش راج فلمز اسپائی یونیورس کو بڑی امیدوں سے دیکھا جا رہا تھا، تاہم ’’ٹائیگر ۳‘‘  اور ’’وار ۲‘‘ کی کمزور کارکردگی نے منصوبوں کو متاثر کیا ہے۔ اطلاعات ہیں کہ ’’ٹائیگر ورسیز پٹھان‘‘ کو بجٹ اور اسٹار فیس کے باعث روک دیا گیا ہے۔

بالی ووڈ میں یش راج فلمز کی اسپائی فرنچائز کو ایک وقت میں ہندوستانی سنیما کی سب سے بڑی فلمی کائنات قرار دیا جا رہا تھا۔ خاص طور پر ’’پٹھان‘‘ کی ریکارڈ توڑ کامیابی کے بعد یہ تاثر مزید مضبوط ہو گیا تھا کہ یش راج فلمز کا اسپائی یونیورس طویل عرصے تک باکس آفس پر راج کرے گا۔ شاہ رخ خان کی اداکاری سے مزین ’’پٹھان‘‘ نے عالمی سطح پر شاندار کمائی کی اور فرنچائز کے لیے نئی راہیں کھول دیں۔ اس کامیابی کے بعد یہ خبریں سامنے آئیں کہ یش راج فلمز اپنے دو بڑے سپر اسٹارز، شاہ رخ خان اور سلمان خان کو ایک ہی فلم میں آمنے سامنے لانے کی تیاری کر رہا ہے۔ مجوزہ فلم’’ٹائیگر ورسیز پٹھان‘‘ کو ہندوستانی سنیما کا ایک بڑا ایونٹ قرار دیا جا رہا تھا۔

یہ بھی پڑھئے: چیک باؤنس کیس: راج پال یادو کو دہلی ہائی کورٹ سے عبوری ضمانت

تاہم یہ جشن زیادہ دیر برقرار نہ رہ سکا۔ ’’پٹھان‘‘ کے بعد آنے والی فلمیں، خصوصاً ’’ٹائیگر ۳‘‘ اور ’’وار ۲‘‘ باکس آفس پر توقعات کے مطابق کارکردگی نہ دکھا سکیں۔ ’’ٹائیگر ۳‘‘ نے دنیا بھر میں تقریباً ۴۶۶؍ کروڑ روپے کمائے، جو اگرچہ ایک بڑی رقم ہے، مگر اسے فرنچائز کی سابقہ کامیابیوں کے مقابلے میں کم سمجھا گیا۔ اسی طرح ’’وار ۲‘‘ کی عالمی کمائی تقریباً ۳۰۳؍ کروڑ روپے رہی، جس نے تجارتی حلقوں کو مایوس کیا۔ ان نتائج کے بعد اسپائی یونیورس کے مستقبل پر سوالات اٹھنے لگے۔ رپورٹس کے مطابق، ’’ٹائیگر ۳‘‘ اور ’’وار ۲‘‘ کی کارکردگی نے یش راج فلمز کو اپنی حکمت عملی پر نظرِ ثانی پر مجبور کیا ہے۔ مزید برآں، ’’الفا‘‘ جس میں عالیہ بھٹ اور بوبی دیول اہم کردار ادا کر رہے ہیں، کی مسلسل تاخیر نے بھی فرنچائز کے تسلسل کو متاثر کیا ہے۔

یہ بھی پڑھئے: پرینکا چوپڑہ کی ششی تھرور سے ملاقات، کانگریسی لیڈر نے اداکارہ کی تعریف کی

ڈیکن کرونیکل کی ایک رپورٹ کے مطابق، یش راج فلمز کیلئے دو بڑے خان ستاروں کی فیس برداشت کرنا ایک چیلنج بن گیا ہے۔ بتایا جا رہا ہے کہ شاہ رخ خان اور سلمان خان کی مشترکہ فیس تقریباً ۱۰۰؍  کروڑ روپے سے زائد ہو سکتی ہے، جو مجموعی بجٹ پر بھاری پڑ رہی ہے۔ ایک ذریعے کے مطابق، اگر دونوں اداکار فیس میں رعایت پر آمادہ ہو جاتے تو ’’ٹائیگر ورسیز پٹھان‘‘ کو ممکن بنایا جا سکتا تھا، مگر موجودہ حالات میں پروجیکٹ کو روک دیا گیا ہے۔ تجارتی ماہرین کا کہنا ہے کہ بڑی فرنچائزز کے لیے صرف ستاروں کی موجودگی کافی نہیں ہوتی، بلکہ مضبوط اسکرپٹ، مستقل مزاجی اور درست وقت پر ریلیز بھی اہم کردار ادا کرتے ہیں۔ اگر ’’الفا‘‘ جیسی آئندہ فلمیں باکس آفس پر کامیاب رہتی ہیں تو اسپائی یونیورس کو نئی توانائی مل سکتی ہے۔
فی الحال یش راج فلمز کی جانب سے کوئی باضابطہ اعلان سامنے نہیں آیا، تاہم قیاس آرائیوں کا بازار گرم ہے۔ مداح اب اس بات کے منتظر ہیں کہ آیا ’’ٹائیگر ورسیز پٹھان‘‘ حقیقت کا روپ دھارے گی یا اسپائی یونیورس اپنی حکمت عملی میں بڑی تبدیلیاں کرے گا۔