کئی کھلاڑیوں کے پازیٹیو ہونے کے بعد بی سی سی آئی کو یہ فیصلہ کرنا پڑا، اس سے قبل ٹورنامنٹ کو ایک ہی شہر میں منعقد کرنے پرغور کیا جارہا تھا

بایو ببل میں کور ونا کے  بڑھتے معاملوں کے بعد انڈین پریمیر لیگ (آئی پی ایل)کو غیرمعینہ مدت کے لئے ملتوی کردیاگیا ہے۔تازہ واقعات میں سن رائزرس حیدرآباد کے ردھیمان ساہا اور دہلی کیپٹلز کے امیت مشرا کی کووڈرپورٹ پازیٹیو آئی ہیں۔ان س واقعات کی وجہ سے ٹورنامنٹ پر پوری طرح غور کیا گیا اور پھر اسے غیر معینہ مدت کے لئے ملتوی کرنے کا اعلان کردیا گیا۔ حالانکہ اس دوران  بھی بی سی سی آئی نے کوشش کی کہ یہ ٹورنامنٹ کسی ایک شہر میں مرکوز ہو جائے اور وہیں پر مکمل کیا جائے لیکن تاز ہ پازیٹیو معاملوں نے بی سی سی آئی  کے  پاس زیادہ سوچنے کے لئے کچھ نہیں چھوڑا۔ حالانکہ اس ٹورنامنٹ کے انعقاد پر پہلے دن سے ہی کافی شدید تنقیدیںہو رہی تھیں کیوں کہ یہ کورونا کی دوسری لہر کے شدیدتر ہوجانے کے درمیان جاری تھا ۔
  سمجھا جاتا ہے کہ کچھ آئی پی ایل حکام نے کچھ فرنچائیزی کو ٹورنامنٹ کے مستقبل پر ان کے خیالات جاننے کے لئے فون کئے اور ان میں سے کچھ کا خیال تھا کہ ٹورنامنٹ کو پوری طرح سے روک دیا جانا چاہئے جس کے بعد آئی پی ایل کے چیئرمین برجیش پٹیل نےفیصلے کی تصدیق کرتے ہوئے کہا یہ فیصلہ سبھی شیئرہولڈروں کی سیکوریٹی کو دیکھتے ہوئے کیا گیا ہے۔ آئی پی ایل نے ایک میڈیا بیان میں کہا کہ یہ فیصلہ ٹورنامنٹ کی گورننگ کونسل اور بی سی سی آئی کے اعلیٰ حکام نے اتفاق رائے سے کیا ہے۔ بی سی سی آئی کھلاڑیوں، اسپورٹس اسٹاف اور آئی پی ایل کے انعقاد میں شامل دیگر حصہ داروں کی سیکوریٹی پر کوئی سمجھوتہ نہیں کرنا چاہتی ہے۔ بیان کے مطابق یہ فیصلہ سبھی شیئرہولڈروں کے تحفظ، صحت اور ان کے مفاد کے پیش نظر کیا گیا ہے۔ یہ کافی مشکل وقت ہے، خاص طور پر ہندوستان میں اس لئے ہم اسے ملتوی کررہے ہیں۔