راجستھان رائلز کے تیز گیند باز اویس خان کا خیال ہے کہ آئی پی ایل میچ میں دہلی کیپٹلس کے خلاف انہوں نے آخری اوور پھینکا تھا وہ شاید ڈیتھ اوورس میں ان کی بہترین کوشش تھی۔

راجستھان رائلز کے تیز گیند باز اویس خان کا خیال ہے کہ آئی پی ایل میچ میں دہلی کیپٹلس کے خلاف انہوں نے آخری اوور پھینکا تھا وہ شاید ڈیتھ اوورس میں ان کی بہترین کوشش تھی۔ ہندوستانی تیز گیند باز کو جمعرات کی رات آخری اوور میں ۱۷؍ رن کا دفاع کرنا پڑا اور وہ ایک کے بعد ایک یارکر پھینک کر آرام سے ایسا کرنے میں کامیاب رہے۔ 
 دہلی کیپٹلس ٹیم اس اوور میں صرف ۴؍ رن بنا سکی جس نے گھریلو ٹیم کی ۱۲؍ رن سے جیت یقینی بنائی۔ اس سیزن میں لکھنؤ سپر جائنٹس نے اویس کو رائلز میں منتقل کردیا تھا۔ اویس نے کہاکہ `یہ پہلا موقع نہیں ہے جب میں نے آخری اوور پھینکا ہو۔ پچھلے سال میں نے راجستھان کے خلاف دفاع کیا تھا۔ جب میں دہلی کے لئے کھیلتا تھا (وہاں آخری اوور بھی کیا تھا) تو یہ میرا بہترین اوور تھا۔ تمام گیندیں ایک جگہ تھیں۔ 
 ۲۷؍ سالہ نوجوان نے یہ بھی بتایا کہ جب وہ ایل ایس جی کے خلاف کھیلنے اترے تو گزشتہ سیزن کے مقابلے میں ان کا کردار کیسے تبدیل ہوا ہے۔ انہوں نے کہاکہ `لکھنؤ اور ڈی سی میں، پہلے میں پاور پلے میں ایک یا دو اوور کروایا کرتا تھا۔ یہاں میں پاور پلے کے بعد ۲؍ اوورس کرواتا ہوں اور مجھے ڈیتھ اوورس میں گیند کرنے کا موقع بھی ملتا ہے۔ ٹیم انتظامیہ اور سنجو (سیمسن) بولنگ کی آزادی دیتے ہیں۔ اس سے حکمت عملی کو نافذ کرنے میں مدد مل رہی ہے۔ سنجو گیند بازوں کے کپتان ہیں۔ 
 اویس نے کہاکہ آج رات شبنم نہیں گری تھی اور اس سے میری کافی مدد ہوئی ہے۔ شبنم بعض اوقات متاثر کر سکتی ہے۔ انہوں نے رائلز کے نئے نمبر۴؍ بلے باز ریان پراگ کو بھی کریڈٹ دیا جنہوں نے عام آغاز کے بعد۴۵؍ گیندوں پر ناٹ آؤٹ ۸۴؍ رن بنانے کے بعد اکیلے ہی اپنی ٹیم کو کھیل میں برقرار رکھا۔ اویس نے کہاکہ `یہ میچ بدلنے والی اننگز تھی کیونکہ ہم نے وکٹ جلد گنوائیں اور رن ریٹ بھی کم تھا۔ انہوں نے فائٹنگ اسکور بنانےمیں ہماری مدد کی۔ وہ اچھے فارم میں ہیں اور انہوں نے آخری میچ یہ ثابت کیا۔