کپتان نے کہا کہ ۶؍ وکٹیں حاصل کرنے سے پُرجوش محمد سراج مزید گیندبازی کرنا چاہتے تھے لیکن ٹرینر کے مشورے پر ان کے اسپیل کو محدود کرنا پڑا

 ایشیا کپ میں ہندوستان کی تیز گیند بازی سے کافی مطمئن کپتان روہت شرما نے کہا کہ سری لنکا کے ۶؍ وکٹیں حاصل کرنے سے پرجوش محمد سراج لگاتار ۷؍ اووَر کرنے کے بعد مزید گیندبازی کرنا چاہتے تھے لیکن  ٹرینر کے مشورے  پر ان کے اسپیل کو  محدود کرنا پڑا۔
 ایشیا کپ فائنل میں تاریخی جیت کے بعد روہت نے اپنے تیز گیند بازوں کی تعریف کی۔ سراج اتوار کو اچھے فارم میں تھے اور انہوں نے اپنی خطرناک گیندبازی  سے سری لنکا کے ٹاپ آرڈر بلے بازوں کو زبردست دھچکا دیا اور صرف۱۶؍ گیندوں میں ۵؍ وکٹیں حاصل کیں۔ روہت شرما نے میچ کے بعد پریس کانفرنس میں کہا’’سراج نے  اپنےاسپیل میں ۷؍ اوور کرائے اور مجھے ٹرینر کی طرف سے پیغام ملا کہ ہمیں سراج کو اب روکنا ہوگا۔ وہ گیندبازی کے لئے کافی بےتاب تھے۔ انہوں نے ۷؍ اوور کئے جو کافی ہے۔ سراج کی پوزیشن  ترویندرم میں سری لنکا کے خلاف بھی ایسی ہی تھی اور انہوں نے لگاتار ۹-۸؍اوور پھینکے تھے۔سراج نے جس طرح گیند بازی کی وہ دیکھنا بہت خوشگوار تھا۔
 سراج کے علاوہ جسپریت بمراہ نے ابتدائی اووَر میں ایک وکٹ لے کر سری لنکا کو پہلا دھچکا دیا جبکہ ہاردک پانڈیا نے۱۴؍ گیندوں میں ۳؍ وکٹیں لے کر سری لنکا کی اننگز کا جلد خاتمہ کر دیا۔ تیز گیند بازوں کی تعریف کرتے ہوئے روہت نے کہا کہ وہ تیز گیند بازوں کی اچھی کارکردگی سے بہت مطمئن ہیں۔
 فائنل کے دن صرف تیز گیند باز ہی سرخیوں میں رہے لیکن۱۱ء۴۴؍کے اوسط سے۹؍ وکٹ لے کر ٹورنامنٹ کا اختتام کرنے والے کلدیپ یادو کو پلیئر آف دی ٹورنامنٹ کا ایوارڈ ملا۔ روہت نے کہا’’کلدیپ نے دباؤ میں بہت اچھی کارکردگی کا مظاہرہ کیا۔ انہوں نے سپر فور کے میچ میں سری لنکا کے خلاف اچھی گیند بازی کی اور چھوٹا اسکور بنانے کے باوجود کامیابی حاصل کی۔ پچھلے ۲؍ سال سے  ان کا اعتماد بڑھ رہا ہے۔ہندوستان اب ورلڈ کپ سے قبل گھر پر تین میچوں کی دو طرفہ سیریز میں آسٹریلیا کا سامنا کرے گا اور اگر وہ وہاں سیریز جیت لیتا ہے تو اس کے پاس تینوں فارمیٹس میں آئی سی سی مردوں کی ٹیم کی درجہ بندی میں سرفہرست بننےکا موقع ہوگا۔