آئی سی سی مینز ٹی ۲۰؍ ورلڈ کپ ۲۰۲۶ء کے گروپ بی میں پیر کی شام ایک انتہائی اہم مقابلہ ہونے جا رہا ہے، جہاں آسٹریلیا اور میزبان سری لنکا کی ٹیمیں پلے کیلے انٹرنیشنل کرکٹ اسٹیڈیم میں ٹکرائیں گی۔

 آئی سی سی مینز ٹی ۲۰؍ ورلڈ کپ ۲۰۲۶ء کے گروپ بی میں پیر کی شام ایک انتہائی اہم مقابلہ ہونے جا رہا ہے، جہاں آسٹریلیا اور میزبان سری لنکا کی ٹیمیں پلے کیلے انٹرنیشنل کرکٹ اسٹیڈیم میں ٹکرائیں گی۔ یہ میچ آسٹریلیا کے لیے کرو یا مروکی صورتحال اختیار کر چکا ہے، جبکہ سری لنکا کے پاس سپر ۸؍ مرحلے میں جگہ پکی کرنے کا سنہرا موقع ہے۔
ٹورنامنٹ کے آغاز میں فیورٹ قرار دی جانے والی آسٹریلیائی  ٹیم زمبابوے کے ہاتھوں اپ سیٹ شکست کے بعد باہر ہونے کے دہانے پر کھڑی ہے۔ ٹریوس ہیڈ کی قیادت میں ٹیم کو اب اپنی غلطیوں کی کوئی گنجائش نہیں ہے۔ٹریوس ہیڈ، جوش انگلس اور گلین میکسویل جیسے دھواں دھار بلے بازوں پر مشتمل لائن اپ اب تک توقعات پر پورا نہیں اتر سکی۔ ٹیم کو مڈل آرڈر میں کیمرون گرین اور ٹم ڈیوڈ سے بڑی اننگز کی امید ہے۔آسٹریلوی بولرس کو بھی اہم مواقع پر وکٹیں حاصل کرنے کے لیے اپنی کارکردگی بہتر کرنی ہوگی۔
سری لنکا کی ٹیم اس وقت بھرپور فارم اور اعتماد میں ہے۔ لگاتار دو فتوحات نے داسن شناکا کی ٹیم کو گروپ میں سرفہرست پہنچا دیا ہے۔  کوسل مینڈس صلاحیت  کے ساتھ بیٹنگ کر رہے ہیں جبکہ پتھم نسانکا تسلسل کے ساتھ رنز بنا رہے ہیں۔ مہیش تھیکشنا کی اسپن بولنگ  پلے کیلے کی پچ پر آسٹریلوی بلے بازوں کے لیے بڑا خطرہ ثابت ہو سکتی ہے، جہاں گیند کے گرپ ہونے کی امید ہے۔

یہ بھی پڑھئے:بارش کی وجہ سے ہند-پاکستان میچ نہ ہونے پر سب سے زیادہ نقصان کس کا ہوگا؟

ٹی ۲۰؍ ورلڈ کپ: انگلینڈ کے لیے اٹلی کا چیلنج 
 آئی سی سی مینز ٹی ۲۰؍ ورلڈ کپ کے گروپ سی میں پیر کے روز انگلینڈ اور اٹلی کی ٹیمیں مدمقابل ہوں گی۔ انگلینڈ کی نظریں اس میچ میں فتح حاصل کر کے کوارٹر فائنل (آخری آٹھ) میں اپنی جگہ یقینی بنانے پر مرکوز ہیں، جبکہ اٹلی کی ٹیم نیپال کے خلاف تاریخی جیت کے بعد ایک اور بڑے اپ سیٹ کے ارادے سے میدان میں اترے گی۔ انگلینڈ کا ورلڈ کپ میں اب تک کا سفر کافی کٹھن رہا ہے۔ نیپال کے خلاف مشکل مقابلے اور ویسٹ انڈیز کے ہاتھوں شکست کے بعد، انگلینڈ نے اسکاٹ لینڈ کو ہرا کر ٹورنامنٹ میں واپسی کی ہے۔ اگرچہ اسکاٹ لینڈ کے خلاف جیت نے انگلش ٹیم کے حوصلے بلند کیے ہیں، لیکن ٹاپ آرڈر کی بیٹنگ میں اب بھی بہتری کی گنجائش موجود ہے۔ ہیری بروک کی قیادت میں ٹیم اب ایک مکمل اور جاندار کارکردگی پیش کرنے کے لیے پرعزم ہے۔

یہ بھی پڑھئے:سنجے لیلا بھنسالی کی فلم ’’لَو اینڈ وار‘‘ کی ریلیز کی تاریخ آگے بڑھی

دوسری جانب اٹلی نے اپنی کارکردگی سے سب کو حیران کر دیا ہے۔ اپنے پہلے میچ میں عبرتناک شکست کے بعد، اٹلی نے نیپال کو۱۰؍ وکٹوں سے ہرا کر ورلڈ کپ کی اپنی پہلی تاریخی فتح حاصل کی۔ اٹلی کے بولرس  نے نظم و ضبط اور بلے بازوں نے بہترین اعتماد کا مظاہرہ کیا ہے۔ ہیری میننٹی کی قیادت میں اٹلی کی ٹیم اب انگلینڈ جیسی مضبوط ٹیم کے خلاف خود کو ثابت کرنے اور ٹورنامنٹ میں ایک اور بڑا سرپرائز دینے کے لیے تیار ہے۔انگلینڈ کے لیے یہ میچ جیتنا اس لیے ضروری ہے تاکہ وہ کسی بھی قسم کے خطرے سے بچ کر سپر ۸؍ مرحلے کے لیے کوالیفائی کر سکے۔ اٹلی کے پاس کھونے کے لیے کچھ نہیں ہے، اس لیے وہ بغیر کسی دباؤ کے جارحانہ کرکٹ کھیل کر انگلینڈ کا راستہ روکنے کی کوشش کرے گی۔