Max Perutz کی تحقیق نے پروٹین سائنس، جینیات اور نئی دواؤں کے بارے میں سائنسی تحقیق کو آگے بڑھایا۔

میکس فرڈیننڈ پیروٹز آسٹریوی نژاد برطانوی مالیکیولر بایولوجسٹ تھے جنہوں نے پروٹین کے سالماتی ڈھانچے کو سمجھنے کی بنیاد مضبوط کی۔ ان کی سب سے نمایاں کامیابی ہیموگلوبن کی سہ جہتی ساخت معلوم کرنا تھی۔ انہوں نے ایکس رے کرسٹل نگاری (X-ray crystallography) کو پیچیدہ حیاتیاتی سالمات کے مطالعےکیلئے مؤثر طریقے سے استعمال کیا۔ ۱۹۶۲ءمیں انہیں جان کینڈرو کے ساتھ کیمیا کا نوبیل انعام دیا گیا۔ 
پیدائش، ابتدائی زندگی اورکیمیا سے تحقیق کی طرف سفر
میکس پیروٹز۱۹؍ مئی۱۹۱۴ء کو آسٹریا کے شہر ویانا میں ایک خوش حال ٹیکسٹائل کاروباری خاندان میں پیدا ہوئے۔ ان کے والد ہیوگو پیروٹز اور والدہ ڈیلی گولڈشمٹ تھیں۔ ان کے خاندان کا تعلق ٹیکسٹائل کی صنعت سے تھا۔ پیروٹز نے ویانا کے معروف تھیریسیا نم اسکول میں تعلیم حاصل کی۔ ابتدا میں ان کے والدین چاہتے تھے کہ وہ قانون پڑھ کر خاندانی کاروبار میں شامل ہوں لیکن اسکول کے زمانے میں ہی انہیں کیمیا سے گہری دلچسپی پیدا ہوگئی۔ پیروٹز نے ۱۹۳۲ءمیں ویانا یونیورسٹی میں کیمیا کی تعلیم شروع کی اور۱۹۳۶ء میں اپنی ڈگری مکمل کی۔ اسی دوران انہیں کیمبرج میں ہونے والی جدید حیاتیاتی اور کیمیائی تحقیق کے بارے میں معلوم ہوا۔ وہ اسی سال برطانیہ چلے گئے اور کیمبرج یونیورسٹی کی کیونڈش لیبارٹری میں مشہورآئرش سائنسداں جے ڈی برنال کے ساتھ ڈاکٹریٹ کی تحقیق شروع کی۔ یہاں انہوں نے ایکس رے کرسٹل نگاری سیکھی، جو بعد میں ان کی پوری سائنسی زندگی کا بنیادی ذریعہ بن گئی۔ کیمبرج پہنچنے کے بعد پیروٹز نے ہیموگلوبن کی ساخت کا مطالعہ شروع کیا۔ انہوں نے تقریباً دو دہائیوں تک ہیموگلوبن پر مسلسل تحقیق کی۔ 
ایکس رے کرسٹل نگاری
میکس نے۱۹۵۳ء میں ہیموگلوبن کے کرسٹل میں بھاری دھاتی ایٹم شامل کرکے ایکس رے کرسٹل نگاری کے مرحلے کے مسئلے کو حل کرنے کا اہم طریقہ دریافت کیا جس سے پروٹین کی ساخت معلوم کرنا آسان ہوگیا۔

یہ بھی پڑھئے: جان آموس کومینیئس: فادر آف ماڈرن ایجوکیشن

ہیموگلوبن کی سہ جہتی ساخت
پیروٹز کی تحقیق بالآخر ہیموگلوبن کی سہ جہتی ساخت کو سمجھنے میں کامیاب ہوئی۔ ان کے ساتھی سائنسداں جان کینڈرو نے اسی دوران میوگلوبن کی ساخت معلوم کی۔ ان دونوں تحقیقات نے پہلی مرتبہ سائنسدانوں کو یہ سمجھنے کا موقع دیا کہ بڑے پروٹین سالمات کی ساخت کس طرح ان کے حیاتیاتی افعال سے وابستہ ہوتی ہے۔ یہی کام آگے چل کر ساختی حیاتیات (Structural Biology) کی ترقی کا اہم سنگِ بنیاد بنا۔ ۱۹۶۲ء میں میکس پیروٹز اور جان کینڈرو کو کیمیا کا نوبیل انعام مشترکہ طور پر پروٹینوں کی ساخت کے بارے میں ان کی تحقیقات پر دیا گیا۔ 
سائنسی خدمات اور وفات
میکس پیروٹز ایک اچھے سائنسی مصنف بھی تھے۔ انہوں نے عام قارئین کیلئے سائنس اور تحقیق کے طریقۂ کار پر مضامین اور کتابیں لکھیں۔ وہ ۶؍ فروری ۲۰۰۲ء کوبرطانیہ میں انتقال کر گئے۔