Nadine Gordimerنےافریقی ادب اور عالمی ادب میں نسلی انصاف، انسانی وقار اور سماجی تبدیلی کے موضوعات کو ایک مضبوط اور متاثر کن آواز دی.

نادین گورڈیمرجنوبی افریقہ کی ایک مشہور ادیبہ، ناول نگار اور سیاسی کارکن تھیں۔انہیں۱۹۹۱ء میں ادب کا نوبیل انعام ملا تھا۔نادین کی پیدائش ۲۰؍ نومبر۱۹۲۳ء کوجوہانسبرگ کے قریب ایک چھوٹے سے شہر میں ہو ئی تھی ۔ ان کے والد ایک جرمن یہودی تاجر اور والدہ ایک انگلش نژاد خاتون تھیں، جس کی وجہ سے ان کی پرورش ایک متنوع ثقافتی ماحول میں ہوئی۔ گورڈیمَر نے ابتدائی تعلیم جوہانسبرگ میں حاصل کی اور اپنی نوجوانی میں ہی ادبی دنیا میں قدم رکھا۔ انہوں نے اپنی تحریریں زیادہ تر جنوبی افریقہ کے نسلی تعصبات، سماجی ناانصافی، اور اپارتھائیڈ (جنوبی افریقہ میں ایک سیاسی نظام تھا جو بیسویں صدی میں۱۹۴۰ء سے ۱۹۸۰ءتک نافذ رہا۔ اس نظام میں جنوبی افریقہ کے لوگوں کو نسلی اعتبار سے تقسیم کیا گیا۔ اگرچہ سیاہ فام لوگ ملک میں زیادہ تھے اس کے باوجود سفید فام لوگوں کی کم تر تعداد نے ان پر حکمرانی کی۔ یہ نسل پرست نظام ۱۹۹۴ء میں ختم کر دیا گیا) کے اثرات پر مرکوز کیں اور ان کی تحریریں مقامی اور بین الاقوامی سطح پر سیاسی اور سماجی بیداری پیدا کرنے کا اہم ذریعہ بنیں۔

یہ بھی پڑھئے: فریڈرک فروبل: ماڈرن پری اسکول اور نرسری ایجوکیشن کے بانی

نادین گورڈیمر کا ادبی کریئر۱۹۴۰ء کی دہائی میں شروع ہوا اور جلد ہی انہوں نے افریقی معاشرتی و سیاسی مسائل پر لکھنے کیلئے شہرت حاصل کرلی۔ ان کے مشہور ناولوں میں،’جولائز پیپل‘(July’s People)،’ برگز ڈاٹر‘(Burger’s Daughter) اور’ دی کنزرویشنسٹ‘(The Conservationist) شامل ہیں، جو نہ صرف ادب کی بلندیوں پر پہنچے بلکہ اپارتھائیڈ کے خلاف مزاحمت اور انسانی حقوق کی جدوجہد کی عکاسی بھی کرتے ہیں۔

نادین گورڈیمر صرف ایک ادیبہ نہیں تھیں بلکہ وہ ایک فعال سماجی کارکن بھی تھیں جنہوں نے جنوبی افریقہ میں نسلی امتیاز کے خاتمے، انسانی حقوق کی حفاظت، اور آزادی اظہار کیلئے کام کیا۔ انہوں نے اپنے ادبی کام کے ذریعے عالمی سطح پر اپارتھائیڈ کے خلاف آواز بلند کی جس کی وجہ سے انہیں۱۹۹۱ءمیں ادب کا نوبیل انعام دیا گیا ۔نوبیل سے قبل انہیں ۱۹۷۴ء میں بُکرپرائز سے بھی نوازا گیا ۔ ان کا کردار ادبی، سماجی اور انسانی حقوق کے فروغ میں نہایت اہم تھا۔

یہ بھی پڑھئے: جے کارٹی امریکی باسکٹ بال کھلاڑی، مصنف اور پبلک اسپیکر تھے

ان کے کام میں اخلاقی پیچیدگیاں، سیاسی شعور اور انسانی تعلقات کی نفسیاتی گہرائی نمایاںہیں، جو قاری کو نہ صرف افریقہ کی پیچیدہ تاریخ سے روشناس کراتی ہیں بلکہ عالمی سطح پر انسانی رویوں اور معاشرتی دھچکوں پر بھی غور و فکر کی دعوت دیتی ہیں۔ گورڈیمَر نے اپنے ادبی اور سماجی کردار کے ذریعے دکھایا کہ ادب صرف تفریح کا ذریعہ نہیں بلکہ تبدیلی، شعور اور مزاحمت کا طاقتور ہتھیار بھی ہو سکتا ہے۔ ان کی تحریریں آج بھی افریقہ اور دنیا کے دیگر حصوں میں نسلی مساوات اور اخلاقی شعور کیلئے ایک رہنمائی کے طور پر پڑھی جاتی ہیں۔ نادین گورڈیمر کا انتقال ۱۳؍ جولائی۲۰۱۴ء کو جنوبی افریقہ کے شہرجوہانسبرگ میں ہوا تھا۔ انتقال کے وقت ان کی عمر ۹۰؍ سال تھی۔