دنیا بھر میں ایندھن کے متبادل ذرائع کے استعمال میں اضافہ ہو رہا ہے، اور کمپریسڈ نیچرل گیس (CNG) بھی ایک محفوظ، سستا اور ماحول دوست ایندھن سمجھا جاتا ہے۔

دنیا بھر میں ایندھن کے متبادل ذرائع کے استعمال میں اضافہ ہو رہا ہے، اور کمپریسڈ نیچرل گیس (CNG) بھی ایک محفوظ، سستا اور ماحول دوست ایندھن سمجھا جاتا ہے۔ ہندوستان جیسے ممالک میں سی این جی کو کاروں، رکشوں اور بسوں میں بطور ایندھن استعمال کرنے کا رجحان عام ہو چکا ہے۔ کیا آپ نے کبھی غور کیا کہ زیادہ تر ڈرائیور یا مسافر سی این جی بھرتے وقت گاڑی سے اُتر جاتے ہیں، کیوں؟
سی این جی بھرنے کے دوران گاڑی سے باہر نکلنا کیوں ضروری ہے؟
 جب آپ سی این جی گاڑی میں گیس بھرتے ہیں تو عموماً لوگ گاڑی سے باہر نکلتے ہیں۔ ایسا اس لئے ہوتا ہے کیونکہ سی این جی بھرتے وقت پائپ میں۲۰۰؍ سے۲۵۰؍ بار کا پریشر ہوتا ہے۔ اس ہائی پریشر کی وجہ سے گاڑی میں زیادہ پریشر ہو سکتا ہے جس کی وجہ سے ٹینک یا پائپ لائن میں دراڑ یا رساؤ ہو سکتا ہے۔ لہٰذا، حفاظت کے نقطہ نظر سے، گاڑی سے باہر رہنا بہتر خیال کیا جاتا ہے۔
گیس کے اخراج کی روک تھام
 سی این جی گیس سلنڈر میں ہائی پریشر پر بھری جاتی ہے۔ اگر اس دوران کہیں سے گیس لیک ہو جائے تو یہ خطرناک ثابت ہو سکتی ہے۔ گیس کا اخراج آگ یا دھماکے کا سبب بن سکتا ہے۔ لہٰذا، گیس بھرنے کے دوران محتاط رہنا بہت ضروری ہے۔ گاڑی سے باہر نکلنا ایک ایسا قدم ہے جو حادثے کے امکانات کو کافی حد تک کم کر دیتا ہے۔
 میٹر کی نگرانی 
 سی این جی کار کا میٹر پیٹرول یا ڈیزل کار سے مختلف ہوتا ہے۔ اس لئے جب بھی آپ گیس بھریں، اس بات کو یقینی بنائیں کہ میٹر ٹھیک کام کر رہا ہے اور گیس کی مقدار درست طریقے سے ناپی جا رہی ہے۔ اس سے آپ کو اوور فلنگ یا انڈر فلنگ سے بچنے میں مدد ملے گی اور آپ کی گاڑی کو صحیح مائلیج ملے گا۔
 گیس کی بو اور صحت کے مسائل
 کچھ لوگوں کو سی این جی گیس کی ہلکی بو کی وجہ سے سر درد، چکر آنا یا قے کی شکایت ہو سکتی ہے۔ اگر ایسا کوئی مسئلہ درپیش ہے تو فلنگ کے دوران گاڑی سے باہر اور کھلے ماحول میں رہنا ضروری ہے تاکہ صحت کے خطرات میں کمی کو یقینی بنایا جاسکے۔
زیادہ گیس بھرنے سے گریز کریں 
 سی این جی ٹینک کو فُل کرنا خطرناک ہو سکتا ہے۔ اس سے ٹینک کے اندر دباؤ بڑھ جاتا ہے اور رِساؤ یا پھٹنے کا خطرہ ہوتا ہے۔اس لئے حد سے زیادہ گیس نہ بھری جائے۔