کیا آپ نے کبھی صابن کے بلبلوں کو دھوپ میں اڑتے دیکھا ہے؟ کبھی وہ نیلا چمکتے ہیں، کبھی سرخ، اور کبھی کئی رنگ ایک ساتھ۔ ایسا لگتا ہے جیسے چھوٹی سی اُڑتی دھنک! لیکن صابن کے بلبلوں میں یہ رنگ کہاں سے آتے ہیں ؟ ان میں دھنک بنتی ہے، کیوں ؟

کیا آپ نے کبھی صابن کے بلبلوں کو دھوپ میں اڑتے دیکھا ہے؟ کبھی وہ نیلا چمکتے ہیں، کبھی سرخ، اور کبھی کئی رنگ ایک ساتھ۔ ایسا لگتا ہے جیسے چھوٹی سی اُڑتی دھنک! لیکن صابن کے بلبلوں میں یہ رنگ کہاں سے آتے ہیں ؟ ان میں دھنک بنتی ہے، کیوں ؟
بلبلہ کیا ہوتا ہے؟
ایک صابن کا بلبلہ دراصل تین تہوں سے مل کر بنا ہوتا ہے:(۱) پانی کی ایک پتلی سی تہہ (۲) اس کے دونوں طرف صابن کی تہہ۔ یہ تینوں تہیں مل کر ایک بہت ہی پتلی فلم بناتی ہیں جو پھول کر گول بلبلے کی شکل بنا لیتی ہے۔ یہ فلم حیرت انگیز طور پر اتنی پتلی ہوتی ہے جتنی انسانی بال کی موٹائی کا ہزارواں حصہ!
رنگوں کا راز: روشنی کی جادوگری
جب سورج کی روشنی بلبلے پر پڑتی ہے تو ایک عجیب اور خوبصورت جادو ہوتا ہے۔ 
روشنی دراصل سات رنگوں کا مجموعہ ہے جنہیں ہم Rainbow (قوس قزح یا دھنک) میں دیکھتے ہیں۔ 
روشنی کے ساتھ بلبلہ کیا کرتا ہے؟
جب روشنی بلبلے کی پتلی فلم پر پڑتی ہے تو کچھ روشنی اوپر والی سطح سے واپس لوٹتی ہے۔ کچھ روشنی پانی کے اندر داخل ہو کر نیچے والی سطح سے واپس آتی ہے۔ جب یہ دونوں روشنی کی لہریں دوبارہ ملتی ہیں تو بعض رنگ تیز ہو جاتے ہیں اور بعض غائب ہو جاتے ہیں۔ اسی کھیل کو Interference (مداخلت) کہتے ہیں۔ یہی وجہ ہے کہ بلبلے پر مختلف زاویوں سے الگ الگ رنگ نظر آتے ہیں ! بالکل ایسے جیسے رنگ روشنی کی لہر پر ناچ رہے ہوں۔ 
رنگ بدلتے کیوں رہتے ہیں ؟
بلبلے کی فلم ہر لمحہ حرکت کرتی ہے، کھنچتی ہے اور پتلی اور موٹی ہوتی رہتی ہے۔ جب فلم کی موٹائی بدلتی ہے تو روشنی کے مکس ہونے کا انداز بھی بدل جاتا ہے۔ اور یوں رنگ بھی بدلتے جاتے ہیں ! اسی لئے بلبلہ کبھی نیلا، کبھی پیلا، کبھی جامنی نظر آتا ہے۔ 
بلبلہ پھٹنے سے پہلے سیاہ کیوں دکھائی دیتا ہے؟
ایک دلچسپ بات یہ ہے کہ بلبلہ پھٹنے سے ٹھیک پہلے کالا سا نظر آنے لگتا ہے۔ ایسا کیوں ہوتا ہے؟ کیونکہ اوپری پانی اتنا پتلا ہو جاتا ہے کہ وہاں سے روشنی صحیح طرح واپس نہیں آتی۔ اس لئے رنگ غائب ہو کر وہ حصہ سیاہ دکھائی دیتا ہے۔ یہ اس بات کی وارننگ ہوتی ہے کہ بلبلہ بس پھٹنے والا ہے! یاد رہے کہ صابن کے بلبلے رنگوں کی سائنس اور دھنک کی جادوگری کا شاندار مجموعہ ہیں ! اب اگلی بار جب آپ بلبلے بنائیں تو غور سے دیکھیں کون سا رنگ سب سے پہلے نظر آتا ہے؟ اور بلبلہ پھٹنے سے پہلے کیسی تبدیلی آتی ہے؟