عامر خان نے ۹۰؍ کی دہائی کی رومانوی فلموں کو یاد کرتے ہوئے کہا کہ اس دور میں محبت کی کہانیاں زیادہ مضبوط اور اثر انگیز تھیں۔ انہوں نے انکشاف کیا کہ شاہ رخ خان کی ’’کچھ کچھ ہوتا ہے‘‘ دیکھتے ہوئے وہ بہت روئے تھے۔ عامر نے بتایا کہ انہیں آج بھی خالص رومانوی فلمیں پسند ہیں اور ان کی آنے والی فلم ’’ایک دن‘‘ اسی جذبے کی عکاسی کرتی ہے، جو یکم مئی ۲۰۲۶ء کو ریلیز ہوگی۔

بالی ووڈ کے مسٹر پرفیکشنسٹ عامر خان نے حالیہ گفتگو میں ۹۰؍ کی دہائی کے رومانوی سنیما کے بارے میں اپنی گہری محبت کا اظہار کیا ہے۔ انہوں نے اس دور کو یاد کرتے ہوئے کہا کہ اس زمانے میں رومانوی فلموں کی بھرمار تھی، جنہوں نے ناظرین کے دلوں پر گہرا اثر چھوڑا۔ عامر خان نے خاص طور پر شاہ رخ خان اور سلمان خان کے کام کو سراہتے ہوئے کہا کہ دونوں نے اس دور میں کئی یادگار محبت کی کہانیاں پیش کیں۔ انہوں نے ’’دل والے دلہنیا لے جائیں گے‘‘ جیسی فلموں کا حوالہ دیتے ہوئے اس کے موسیقی اور جذباتی اپیل کو نمایاں قرار دیا۔

یہ بھی پڑھئے: ریحنہ دو سال بعد کام کے سلسلے میں ہندوستان آئیں

عامر نے ایک دلچسپ ذاتی واقعہ بھی شیئر کیا۔ عامر نے کہا کہ جب انہوں نے ’’کچھ کچھ ہوتا ہے‘‘ دیکھی تو بہت روئے تھے۔ اس فلم کے ہدایتکار کرن جوہر تھے جبکہ شاہ رخ خان، کاجول اور رانی مکھرجی نے مرکزی کردار ادا کئے تھے۔ عامر نے بتایا کہ وہ فلم دیکھ کر اتنا روئے کہ انہوں نے اپنے آنسو پونچھنے کے لیے اپنی اہلیہ کا دوپٹہ استعمال کیا، جس سے ان کے چہرے پر خراشیں بھی آ گئیں۔ انہوں نے کہا کہ وہ فطری طور پر جذباتی ہیں اور رومانوی فلمیں دیکھتے ہوئے اکثر رو پڑتے ہیں۔ ان کے مطابق، خالص رومانس آج کے سنیما میں کم نظر آتا ہے، لیکن وہ اب بھی اس صنف کے بڑے مداح ہیں۔

یہ بھی پڑھئے: اکشے کمار گھریلو خواتین کو ’گھر کا سپر اسٹار‘ مانتے ہیں، ان کی زندگی پر فلم بنانے کا ارادہ

اگرچہ عامر خان نے خود نسبتاً کم رومانوی فلمیں کیں، لیکن ’’فنا‘‘ جیسی فلموں میں ان کی پرفارمنس کو کافی سراہا گیا۔ انہوں نے کہا کہ وہ ہمیشہ ایسی کہانیوں کی طرف مائل ہوتے ہیں جو جذباتی طور پر مضبوط ہوں۔ عامر خان کی نئی پروڈکشن ’’ایک دن‘‘ بھی ایک رومانوی کہانی پر مبنی ہے، جس میں ان کے بیٹے جنید خان اور سائی پلوی مرکزی کردار ادا کر رہے ہیں۔ فلم کی ہدایت کاری سنیل پانڈے کی ہے اور اسے عامر خان، منصور اور اپرنا پروہت نے پروڈیوس کیا ہے۔ یہ فلم یکم مئی ۲۰۲۶ء کو سنیما گھروں میں ریلیز ہوگی۔