بالی ووڈمیں اسرانی ایک ایسے اداکار کے طورپرجانےجاتے ہیں جنہوں نے اپنی مزاحیہ اداکاری سے ۵؍ دہائیوں تک سنیما شائقین کو اپنا دیوانہ بنا رکھا ہے۔

 ممبئی : بالی ووڈمیں اسرانی ایک ایسے اداکار کے طورپرجانےجاتے ہیں جنہوں نے اپنی مزاحیہ اداکاری سے ۵؍ دہائیوں تک سنیما شائقین کو اپنا دیوانہ بنایا ہوا ہے۔ یکم جنوری ۱۹۴۱ءکو جےپور میں پیدا ہوئے گوورددھن اسرانی بچپن سےہی اداکاربننے کا خواب دیکھا کرتے تھے۔ ۱۹۶۳ء میں اداکار بننے کاخواب لیے اسرانی ممبئی آ گئےجہاں ان کی ملاقات کشور ساہو اور رشی  کیش مکھرجی جیسے فلم سازوں سے ہوئی اور ان کے کہنے پر اسرانی نے فلم اینڈ ٹیلی ویژن انسٹی ٹیوٹ آف انڈیا (ایف ٹی آئی آئی) پونے میں داخلہ لے لیا۔
  پونے کے فلم انسٹی ٹیوٹ سے اداکاری کی تعلیم مکمل کرنے کے بعد اسرانی ممبئی آ گئے۔انہوں نے اپنےفلمی کریئرکا آغاز۱۹۶۷ ءمیں ریلیز فلم  ’ہرے کانچ کی چوڑیاں‘ سےکیا۔ اسی درمیان اسرانی نے کچھ گجراتی فلموں میں بھی کام کیا۔۱۹۷۱ءمیںآئی فلم ’میرے اپنے‘ کے ذریعے اسرانی کسی حد تک اپنی شناخت بنانے میں کامیاب رہے۔ ۱۹۷۳ءمیں رشی کیش مکھرجی کی ہدایت میںبنی فلم ’ابھیمان‘ میں اسرانی نے امیتابھ بچن کے دوست کاکردارنبھایاتھا۔اس فلم میں اپنی بااثر اداکاری کیلئے اسرانی بہترین معاون اداکار کے فلم فیئر ایوارڈ کے لیے نامزد بھی کئے گئے تھے۔ 

 فلم ’شعلے‘ اسرانی کے فلمی کرئیر کے لئےمیل کاپتھرثابت ہوئی۔ رمیش سپی کی ہدایت میں بنی فلم شعلےمیں انہوں نے جیلر کا کردار نبھایا تھا اور ان کا بولا گیا ڈائیلاگ ’ہم انگریزوں کے زمانے کے جیلر ہیں...‘ آج بھی ناظرین نہیں بھول پائے ہیں۔ 
میں اسرانی نےفلم ’چلا مراری ہیرو بننے‘ کے ذریعہ ہدایت کاری کےمیدان میں قدم رکھا اور فلم میں انہوں نے مرکزی کردار نبھایاتھا۔اس فلم میں ان کے مدمقابل بندیا گو سوامی تھیں۔ کامیڈی سے بھرپور اس فلم کو شائقین نے بہت پسند کیا تھا۔ 
 اسرانی نے فلم ’چلا مراری ہیرو بننے‘ کی کامیابی کے بعد سلام میم صاحب، ہم نہیں سدھریں گے، دل ہی تو ہے اور اڑان جیسی فلموں میں ہدایت کاری کی ۔ اپنے فلمی کرئیر میں وہ ۲؍مرتبہ سرفہرست مزاحیہ اداکار کے فلم فیئر ایوارڈ سےنوازے گئے۔ انہوں نے اپنے زمانے کے تمام عظیم  فنکاروںکے ساتھ کام کیا۔ اس کے علاوہ سپر اسٹار راجیش کھنہ کے ساتھ ۲۵؍فلموں میں اداکاری کے جوہر دکھائے۔ انہوں نے بالی ووڈ کے سپر اسٹار امیتابھ بچن کے ساتھ بھی متعدد فلموں میں کام کیا ہے۔ 
 اسرانی نے اپنے فلمی کریئرمیں تقریباً ۴۰۰؍فلموں میںاپنی اداکاری کے جوہر دکھائےہیںاورآج بھی اسی جوش وخروش کے ساتھ فلم انڈسٹری میں سرگرم ہیں۔