مشہور شیف سنجیو کپور نے انکشاف کیا ہے کہ انہوں نے ’’ماسٹر شیف انڈیا‘‘ کے پہلے سیزن میں جج بننے کی پیشکش اس لیے مسترد کر دی تھی کیونکہ انہوں نے شرط رکھی تھی کہ انہیں اکشے کمار سے ایک روپیہ زیادہ معاوضہ دیا جائے۔ ان کے مطابق یہ ذاتی انا کا معاملہ نہیں بلکہ اپنے شعبے میں پیشہ ورانہ شناخت کا سوال تھا۔

ہندوستان میں فوڈ ٹیلی ویژن کی دنیا کو نئی شناخت دینے والے معروف شیف سنجیو کپور نے انکشاف کیا ہے کہ انہوں نے ابتدا میں ’’ماسٹر شیف انڈیا‘‘ میں جج بننے کی پیشکش مسترد کر دی تھی کیونکہ ان کی ایک خاص شرط کو تسلیم نہیں کیا گیا تھا۔ سنجیو کپور کے مطابق وہ چاہتے تھے کہ انہیں شو کے پہلے سیزن کے میزبان اور جج اکشے کمار سے ایک روپیہ زیادہ معاوضہ دیا جائے۔کلنری کلچر کے ساتھ ایک حالیہ گفتگو میں سنجیو کپور نے بتایا کہ ۲۰۱۰ء میں ’’ماسٹر شیف انڈیا‘‘ کے آغاز سے قبل پروڈیوسرز نے انہیں اکشے کمار کے ساتھ بطور جج شامل کرنے کی کوشش کی تھی، تاہم وہ اپنی شرط پر قائم رہے۔

انہوں نے کہا کہ ’’جب وہ پہلی بار میرے پاس آئے تو وہ میری شرط پر پورا نہیں اترے۔ میری شرط یہ تھی کہ مجھے اکشے کمار سے زیادہ معاوضہ دیا جائے، صرف ایک روپیہ۔ یہ پہلا سیزن تھا، اور میرے علاوہ کوئی اور ایسا نہیں کر سکتا تھا۔ یہ بالکل واضح تھا، لیکن جب وہ میرے پاس آئے تو میں نے کہا، ’ایک شرط ہے۔‘ وہ نہیں مانے، اور میں سمجھوتہ نہیں کرنا چاہتا تھا۔ میں اپنے فیصلے سے خوش تھا۔‘‘ سنجیو کپور نے بتایا کہ بعد میں بھی شو کے پروڈیوسرز نے انہیں مہمان کے طور پر شامل کرنے کی کوشش کی، مگر انہوں نے اس پیشکش کو بھی قبول نہیں کیا۔ انہوں نے یاد کرتے ہوئے کہا کہ ’’مجھے پھر بھی احساس تھا۔ وہ کہیں گے، ’سر، براہ کرم ایک ایپی سوڈ کے لیے آئیں۔‘‘ میں نے کہا، ’نہیں، میں ایسا نہیں کروں گا۔‘‘

یہ بھی پڑھئے: فیفا ورلڈکپ:کروشیا نےناک آؤٹ مرحلے میں رسائی کی امید برقرار رکھی

شیف سنجیو کپور کے مطابق ماسٹر شیف انڈیا کے ابتدائی دو سیزن وہ کامیابی حاصل نہیں کر سکے جس کی توقع کی جا رہی تھی۔ یہی وجہ تھی کہ تیسرے سیزن سے قبل شو کے میکرز ایک بار پھر ان کے پاس پہنچے۔ انہوں نے بتایا کہ ’’تیسرے سیزن تک، انہوں نے دراصل کہا، سر، یہ کام نہیں کر رہا ہے۔ ہمیں آپ کی ضرورت ہے۔ آپ کے خیال میں ہمیں کیا کرنا چاہیے؟ میں نے کہا،مجھے نہیں لگتا کہ میں کر سکتا ہوں…انہوں نے جواب دیا، نہیں، ہم وہی کریں گے جو آپ کہیں گے، اور پھر یہ سب کچھ ہوگیا۔‘‘ اس کے بعد سنجیو کپور ۲۰۱۳ء میں ماسٹر شیف انڈیا کے تیسرے سیزن کا حصہ بن گئے۔

انہوں نے واضح کیا کہ شو میں شامل ہونے کا ان کا فیصلہ مالی مفاد سے زیادہ ہندوستان میں فوڈ انٹرٹینمنٹ انڈسٹری کے مستقبل سے جڑا ہوا تھا۔ سنجیو کپور نے کہا کہ ’’اس وقت، ہم فوڈ فوڈ کے نام سے ایک ٹی وی چینل چلا رہے تھے۔ میں نے اسے شروع کیا تھا، اور میں دوسرے شیف کو بھی مقبول بنانے کی کوشش کر رہا تھا۔ یہ اس بات سے نہیں ہے کہ آپ کو ذاتی طور پر کیا ملے گا۔ آپ کو یہ یقینی بنانا ہوگا کہ پورا ماحول بہتر ہو۔‘‘ انہوں نے مزید کہا کہ ’’میں نے محسوس کیا کہ اگر ماسٹر شیف اس ملک میں ناکام ہو گئے تو ہم برباد ہو جائیں گے۔ کھانے کی تفریح ​​کے کاروبار کے لیے یہ اچھا نہیں ہوگا۔ میں نے فیصلہ کیا کہ جو کچھ بھی ہو میں نے اس میں شامل ہونے کی کوشش کی۔ آج، میں محسوس کرتا ہوں کہ کھانے کی جگہ میں جو بھی کچھ بھی کر رہا ہے اسے چاہیے کہ ایسے پلیٹ فارمز کامیاب ہوں۔‘‘

یہ بھی پڑھئے: فیفا ورلڈ کپ: گھانا کے خلاف بغیر گول کے ڈرا نے انگلینڈ کی تشویش بڑھائی

جب ان سے پوچھا گیا کہ آیا آخرکار انہیں اکشے کمار سے زیادہ معاوضہ ملا تو انہوں نے مسکراتے ہوئے جواب دیا کہ ’’اوہ، ظاہر ہے، انہوں نے ایسا کیا۔‘‘ یاد رہے کہ اس سے قبل بھی سنجیو کپور نے سدھارتھ کنن کے ساتھ ایک انٹرویو میں اسی واقعے کا ذکر کیا تھا۔ انہوں نے اکشے کمار کی تعریف کرتے ہوئے کہا کہ ’’اکشے ایک پیارے دوست، ایک شاندار آدمی اور ایک بہترین پیشہ ور ہیں۔‘‘ انہوں نے مزید کہا کہ ’’جب انہوں نے شو کے لیے مجھ سے رابطہ کیا تو میں نے کہا، بہت اچھا، میں بہت خوش ہوں، لیکن میری صرف ایک شرط ہے، آپ انہیںجو بھی معاوضہ دیں گے، میں ایک روپیہ زیادہ وصول کروں گا۔‘‘ اپنی شرط کی وجہ بیان کرتے ہوئے سنجیو کپور نے مختصر جواب دیا کہ ’’یہ میرا میدان ہے۔‘‘ اسی شرط کی وجہ سے وہ ماسٹر شیف انڈیا کے پہلے دو سیزن میں شامل نہیں ہوئے۔ ان سیزنز میں اکشے کمار کے ساتھ شیف کنال کپور اور شیف اجے چوپڑا ججوں کے پینل کا حصہ تھے۔

بعد ازاں تیسرے سیزن میں اکشے کمار شو سے الگ ہو گئے اور سنجیو کپور نے اپنی شرائط پر پروگرام جوائن کیا۔ انہوں نے یاد کرتے ہوئے کہا کہ ’’انہوں نے اکشے کمار کی جگہ لینے کا فیصلہ کیا۔ میں نے اپنی شرائط پر شو سائن کیا۔‘‘ تاہم کئی سیزنز تک شو کا حصہ رہنے کے بعد انہوں نے فرنچائز سے کنارہ کشی اختیار کر لی۔ اس بارے میں سنجیو کپور کا کہنا تھا کہ ’’میں نے کچھ سیزن کیے، لیکن آخر کار میں جس وقت اور محنت میں لگا رہا تھا اور جو منافع مجھے مل رہا تھا، اس کا تناسب مماثل نہیں تھا۔‘‘ واضح رہے کہ ماسٹر شیف انڈیا حال ہی میں اپنے نویں سیزن کے اختتام تک پہنچا ہے، جس میں شیف وکاس کھنہ، رنویر برار اور کنال کپور بطور جج شامل تھے۔