علی فضل نے انکشاف کیا ہے کہ جب انہیں ویب سیریز ’’مرزاپور‘‘ کی پیشکش ہوئی تو کئی فلم سازوں نے انہیں او ٹی ٹی پروجیکٹ کرنے سے منع کیا تھا اور صرف فلموں پر توجہ دینے کا مشورہ دیا تھا۔ تاہم انہوں نے خطرہ مول لینے کا فیصلہ کیا، جو ان کے کریئر کا اہم موڑ ثابت ہوا۔ اب ’’مرزاپور: دی مووی‘‘ کی ریلیز کی تیاریاں جاری ہیں، جسے علی فضل نے ہندوستانی تفریحی صنعت کے لیے ایک ’’قومی سطح کا تجربہ‘‘ قرار دیا ہے۔

اداکار علی فضل کا کہنا ہے کہ ان کے کریئر میں کئی اہم کردار آئے، لیکن مرزاپور میں ’’گڈو بھیا‘‘ کا کردار ان کی شناخت بن گیا۔ اب جب یہ مقبول ویب سیریز فلمی شکل اختیار کر رہی ہے تو علی فضل نے انکشاف کیا ہے کہ ایک وقت ایسا بھی تھا جب انہیں اس منصوبے سے دور رہنے کا مشورہ دیا گیا تھا۔ پی ٹی آئی کو دیے گئے ایک انٹرویو میں علی فضل نے بتایا کہ جب مرزاپور کی پیشکش ہوئی تو او ٹی ٹی پلیٹ فارم ہندوستان میں ابتدائی مرحلے میں تھا اور کسی کو اندازہ نہیں تھا کہ اس کا مستقبل کیا ہوگا۔ انہوں نے کہا کہ ’’یہ ہندوستان میں پہلی بار ہو رہا ہے کہ ایک ویب سیریز کو فلم میں تبدیل کیا جا رہا ہے۔ یہ ایک قومی سطح کا تجربہ ہے۔ کہانی اور کردار دونوں مضبوط ہیں، اسی لیے ہم فلم کے ہر نئے پروموشنل مواد کو شائقین کے ساتھ شیئر کرنے کے لیے پرجوش ہیں۔‘‘

یہ بھی پڑھئے: ’’سپر گرل‘‘ باکس آفس پر ناکام، پہلے ویک اینڈ پر ۸ء۶؍ کروڑ ڈالر کا بزنس

علی فضل نے اعتراف کیا کہ ابتدا میں وہ خود بھی اس فیصلے سے خوفزدہ تھے۔ انہوں نے کہا کہ ’’میں اس وقت ڈرا ہوا تھا۔ مجھے معلوم نہیں تھا کہ یہ فارمیٹ کس طرح کام کرے گا۔ اس وقت ہندوستان میں چند ہی ویب شوز بن رہے تھے۔ کئی فلم ساز مجھے کہہ رہے تھے کہ تم کیا کر رہے ہو، فلمیں کرو، او ٹی ٹی کی طرف کیوں جا رہے ہو۔‘‘ انہوں نے مزید کہا کہ انہیں محسوس ہوا تھا کہ تفریحی صنعت ایک نئے دور میں داخل ہونے والی ہے۔ انہوں نے کہا کہ ’’مجھے لگا کہ ایک انقلاب آنے والا ہے۔ پنیت کرشنا نے جس انداز میں مرزاپور کی دنیا تخلیق کی، وہ واقعی قابلِ تعریف تھا۔‘‘

علی فضل نے یہ بھی انکشاف کیا کہ بعد میں انہیں معلوم ہوا کہ ’’فقرے‘‘ کے ہدایت کار مرگ دیپ سنگھ لمبا نے ہی ان کا نام ’’مرزاپور‘‘ کے لیے تجویز کیا تھا، جس کے بعد انہیں گڈو پنڈت کا کردار ملا۔ انہوں نے کہا کہ اگرچہ اس وقت کئی لوگوں نے انہیں صرف فلموں پر توجہ دینے کا مشورہ دیا، لیکن انہوں نے او ٹی ٹی پر اعتماد کرتے ہوئے یہ خطرہ مول لیا، جو بعد میں ان کے کریئر کا سب سے کامیاب فیصلہ ثابت ہوا۔

یہ بھی پڑھئے: نمرت کور اہلووالیا نے اپنے یادگار لمحے کو یاد کیا

’’مرزاپور‘‘ نہ صرف ناظرین میں غیر معمولی مقبول ہوئی بلکہ اسے ہندوستان میں او ٹی ٹی مواد کے لیے ایک اہم سنگ میل بھی قرار دیا جاتا ہے۔ اس سیریز نے کرائم ڈرامہ کی نئی روایت قائم کی اور متعدد ہندی ویب سیریز کے لیے راہ ہموار کی۔ اب یہی فرنچائز ’’مرزاپور: دی مووی‘‘ کے ذریعے بڑے پردے پر آنے والی ہے۔ چند روز قبل جاری کیے گئے آفیشل ٹیزر میں پنکج ترپاٹھی، علی فضل اور دیویندو کی واپسی کی تصدیق کی گئی، جبکہ فلم میں کئی دیگر معروف کردار بھی دوبارہ نظر آئیں گے۔ ٹیزر کے بعد شائقین میں فلم کے لیے جوش و خروش مزید بڑھ گیا ہے۔ علی فضل اس سے قبل بھی کہہ چکے ہیں کہ گڈو بھیا کے کردار نے ان کی پیشہ ورانہ زندگی بدل دی اور انہیں ایک نئی شناخت دی۔ ان کے مطابق، اس کردار کے ذریعے ناظرین نے انہیں ایک مختلف انداز میں قبول کیا، جس نے ان کے کریئر کو نئی سمت دی۔