اداکاری کے میدان سے سیاست میں قدم رکھنے والی اسمرتی ایرانی اپنے سپر ہٹ شو ’’کیونکہ ساس بھی کبھی بہو تھی‘‘ کے سیزن ۲؍ سے ایک مرتبہ پھر ٹی وی کی دنیا میں لوٹ رہی ہیں۔

’’کیونکہ ساس بھی کبھی بہو تھی‘‘ ٹیلی ویژن کا مشہور سیریل مبینہ طور پر شاندار واپسی کیلئے تیار ہے۔ اطلاعات کے مطابق ایکتا کپور اپنی پسندیدہ سیریز کو بحال کرنے پر کام کر رہی ہیں جس کا باضابطہ اعلان جون ۲۰۲۵ء میں متوقع ہے۔ افواہوں کا بازار گرم ہے کہ اس میں اصل ستارے اسمرتی ایرانی اور امر اپادھیائے، تلسی اور مہیر کے طور پر اپنے مشہور کرداروں کو دوبارہ ادا کر سکتے ہیں۔انڈیا فورمز کی ایک حالیہ رپورٹ میں دعویٰ کیا گیا ہے کہ اسمرتی ایرانی نے ’’کیونکہ ساس بھی کبھی بہو تھی‘‘ سیزن ۲؍ کی شوٹنگ شروع کر دی ہے۔ ذرائع نے انکشاف کیا ہے کہ انہیں سیٹ پر زیڈ پلس سیکوریٹی فراہم کی گئی ہے۔ اس پیش رفت نے مداحوں میں جوش و خروش کو جنم دیا ہے، جو شو کی واپسی کا بے صبری سے انتظار کر رہے ہیں۔
ذرائع نے بتایا کہ اداکارہ سے سیاستداں بننے والی اسمرتی ایرانی سخت حفاظتی پروٹوکول کے ساتھ شوٹنگ کررہی ہیں جس میں فون کو ’ٹیپ‘ کیا جانا اور شو کے سیٹس کے قریب فٹ فال پر پابندی ہے۔ سیٹ پر موجود ہر کسی کے موبائل فون ٹیپ کئے جائیں گے۔ کچھ ہفتے پہلے، اداکار ہیتن تیجوانی، جنہوں نے اصل سیریز میں کرن ویرانی کا کردار ادا کیا تھا، نے ممکنہ ریبوٹ کے بارے میں کھل کر بات کی۔ ہندوستان ٹائمز کے ساتھ ایک انٹرویو میں، ہیتن نے انکشاف کیا کہ شو کی واپسی کا خیال سنسنی خیز ہے، یہ تسلیم کرتے ہوئے کہ ابھی تک ان سے رابطہ نہیں کیا گیا ہے۔
ہیتن نے یہ بھی انکشاف کیا کہ یہ پہلی بار نہیں ہے کہ بحالی پر بات کی گئی ہو۔ مجھے یقین ہے کہ چھ یا سات سال پہلے، اسے واپس لانے کیلئے بات چیت ہوئی تھی، لیکن اسمرتی اس وقت مصروف تھیں، اور اس پر کام نہیں ہوسکا۔ مزید برآں ’’کیونکہ ساس بھی کبھی بہو تھی‘‘ ۲۰۰۰ء سے ۲۰۰۸ء تک ٹی وی پر نشر ہونے والے سب سے بڑٓ شو سمجھا جاتا تھا۔