اداکار منوج باجپئی نے حال ہی میں اس بات پر اپنے خیالات کا اظہار کیا ہے کہ فلموں کے بھاری بجٹ کو سوشل میڈیا پر موضوعِ بحث بنانا دراصل فلموں کی تشہیر کا ایک ذریعہ بن چکا ہے۔

گزشتہ چند برسوں میں بڑے بجٹ والی فلموں کے بارے میں بحث میں نمایاں اضافہ ہوا ہے اور منوج باجپئی کا ماننا ہے کہ فلموں کی بھاری لاگت کو عوام کے سامنے اجاگر کرنا اب ان کی تشہیر کا ایک مؤثر طریقہ بن چکا ہے۔ نتیش تیواری  کی فلم ’’رامائن‘‘، جس میں  رنبیر کپور مرکزی کردار ادا کر رہے ہیں اورایس ایس راجامولی کی وارانسی، جس میں مہیش بابو اورپرینکا چوپڑا شامل ہیں، کے بارے میں بڑھتی ہوئی دلچسپی کے درمیان باجپئی کا یہ بیان سوشل میڈیا پر نئی بحث کا سبب بن گیا ہے۔
 بڑے بجٹ والی فلموں پر منوج باجپئی کی رائے
اپنی آنے والی فلم ’’گورنر‘‘ کی تشہیر کے سلسلے میں ایک یوٹیوب چینل  پر گفتگو کرتے ہوئے، باجپئی سے پوچھا گیا کہ فلموں کے مالی حجم پر اتنی زیادہ بات کیوں کی جاتی ہے۔اس کے جواب میں انہوں نے کہا’’یہ ایک پی آر کا ذریعہ ہوتا ہے کیونکہ اس قسم کی باتیں پچھلے ۱۵؍برسوں  سے ہو رہی ہیں۔‘‘
انہوں نے مزید کہا’’یہ رجحان اتنا عام ہو چکا ہے کہ کبھی کبھی ہوائی اڈے پر مجھ سے ملنے والے لوگ بھی فلموں کے اعداد و شمار اور کمائی کی باتیں کرنے لگتے ہیں۔ میں اکثر انہیں کہتا ہوں کہ یہ پیسہ آپ کے بینک اکاؤنٹ میں تو نہیں جا رہا۔ اگر جا رہا ہوتا تو آپ باکس آفس نمبروں پر بات کرتے۔ آپ کو اس بات پر گفتگو کرنی چاہیے کہ آپ کو فلم پسند آئی یا نہیں۔‘‘
ناظرین کے لیے مشورہ
منوج باجپئی نے زور دیا کہ ناظرین کو فلم کا جائزہ اپنی ذاتی پسند اور تجربے کی بنیاد پر لینا چاہیے۔انہوں نے کہا’’جن ۵۰۰؍ یا ۶۰۰؍ کروڑ روپے کی بات کی جاتی ہے، ان میں سے ایک روپیہ بھی آپ کو نہیں ملتا۔ اس لیے ناظرین کو سمجھنا چاہیے کہ ان کا فلم سے تعلق صرف اس بات تک محدود ہے کہ انہیں فلم پسند آئی یا نہیں۔ باقی چیزوں سے انہیں فرق نہیں پڑنا چاہیے۔ فلم کا کاروبار صرف پروڈیوسر کا معاملہ ہے۔‘‘

یہ بھی پڑھئے:راج کپور نے اپنی فلموں کے ذریعہ بالی ووڈ پر راج کیا

وارانسی کے بارے میں
ایس ایس راجامولی کی ہدایت کاری میں بننے والی وارانسی حالیہ عرصے کی سب سے زیادہ زیرِ بحث آنے والی فلموں میں شامل ہے۔ مختلف رپورٹس کے مطابق اس فلم کا بجٹ تقریباً ۱۴۰۰؍کروڑ روپے بتایا جا رہا ہے۔ یہ فلم پرینکا چوپڑاکی ہندوستانی سنیما میں واپسی بھی ثابت ہوگی۔

یہ بھی پڑھئے:فیفا کا یوٹرن: شائقین پر ’’ری یوز ایبل واٹر بوٹل‘‘ لانے پر پابندی

 رامائن کے بارے میں
دوسری جانب رنبیر کپور کی  رامائن دو حصوں میں ریلیز کی جائے گی۔ رپورٹس کے مطابق دونوں حصوں کا مجموعی بجٹ تقریباً ۴؍ہزار کروڑ روپے ہے۔