ہندی اور بنگالی فلموں کے مشہور اداکار پردیپ کمار کو ایک ایسے اداکار کے طور پر یادکیاجاتا ہے جنہوں نے ۱۹۵۰ء اور۶۰ءکی دہائی میں اپنے تاریخی کرداروں کے ذریعہ ناظرین کو محظوظ کیا۔

ہندی اور بنگالی فلموں کے مشہور اداکار پردیپ کمار کو ایک ایسے اداکار کے طور پر یادکیاجاتا ہے جنہوں نے ۱۹۵۰ء اور۶۰ءکی دہائی میں اپنے تاریخی کرداروں کے ذریعہ ناظرین کو محظوظ کیا۔ اس زمانے میں فلمسازوں کو اپنی فلموں کے لئے جب بھی کسی بادشاہ، شہنشاہ، پرنس یا نواب کے کردار کی ضرورت ہوتی تھی تو صرف پردیپ کمار کا چہرہ ہی اس کردار کے لئےمناسب سمجھتےتھے۔ ان کی دلکش اداکاری سے آراستہ فلم انارکلی، تاج محل، بہو بیگم اور چترلیکھا جیسی بے شمار فلموں کو ناظرین آج بھی نہیں بھولے ہیں۔ 
مغربی بنگال میں ۴؍ جنوری ۱۹۲۵ءکو ایک برہمن خاندان میں شیتل بٹاولی عرف پردیپ کمار کی پیدائش ہوئی۔ وہ بچپن سے ہی فلموں میں اداکاری کرنے کا خواب دیکھا کرتے تھے۔ اپنے اسی خواب کو پورا کرنے کے لئے زندگی کے ابتدائی دور میں وہ تھیٹرسے وابستہ ہوگئے۔ حالانکہ اس بات کے لئے ان کےوالد راضی نہیں تھے۔ ۱۹۴۷ءمیں پردیپ کمارکی ملاقات ڈائریکٹر دیوکی بوس سے ہوئی اور جنہوں نے اپنی بنگلہ فلم ’الکھ نندا‘میں کام کرنے کا موقع دیا۔ فلم الکھ ننداکے ذریعے پردیپ کماراداکار کے طور پرشناخت بنانے میں بھلے ہی کامیاب نہ ہوئے، لیکن یہاں سے ان کےفلمی کریئرکا آغاز ضرور ہوگیا۔ اسی درمیان انہوں نے ایک اور بنگلہ فلم ’بھولی نائے‘میں اداکاری کی۔ یہ فلم کافی کامیاب رہی اوراس نے سلور جوبلی منائی جس کے بعد انہوں نے ہندی سنیماکی جانب رخ کیا اور اپنےخواب کو شرمندہ تعبیرکرنےکیلئے وہ ۱۹۴۹ءمیں ممبئی آگئے جہاں انہوں نے کیمرہ مین دھیرن ڈے کے معاون کے طور پر کام شروع کیا ۔ پردیپ کمار کو اداکار کا جنون اس حد تک تھا کہ انہوں نےہندی اور اردو زبان کی تعلیم حاصل کرنا شروع کردی۔ ۱۹۵۲ء میں انہیں فلم’آنند مٹھ‘میں ہیرو کا کردار ادا کرنے کا موقع ملا۔ حالانکہ اس فلم میں پرتھوی راج کپور جیسے عظیم اداکار بھی موجودتھے۔ اس فلم کی کامیابی کے بعد وہ ہندی فلموں میں بطور اداکار شناخت بنانے میں کامیاب رہے۔ اس کے اگلے ہی سال انہوں نے اداکارہ بینا رائے کے ساتھ فلم ’انارکلی‘میں کام کیا، جبکہ۱۹۵۴ءمیں ریلیز ہونے والی فلم ’ناگن‘میں انہوں نے وجینتی مالا کے مقابل مرکزی کردار نبھایا۔ پردیپ کمار نے اپنی فلمی زندگی میں کئی بار صرف، راج کمار، راجا اور مہاراجہ جیسے شاہانہ کردار ادا کیے۔ 
تقریباً۴؍دہائی تک اپنی بے مثال اداکاری سے ناظرین کے دلوں میں خاص شناخت بنانے والے پردیپ کمار ۲۷؍ اکتوبر ۲۰۰۱ء کو اس دنیا کو الوداع کہہ گئے۔