ایسٹونیا میں فلم کی شوٹنگ جاری، آزادی سے پہلے کے دور پر مبنی تاریخی اور سیاسی ڈرامے میں اداکارہ کا کردار بالکل منفردہوگا ۔

اداکارہ سائی ایم مانجریکر کی آنے والی فلم’ ’دی انڈیا ہاؤس‘‘  سے ان کا پہلا لُک سامنے آگیا ہے، جس میں وہ اپنے سابقہ کرداروں سے بالکل مختلف اور پُرعزم انداز میں دکھائی دے رہی ہیں۔ رام چرن   کی پروڈکشن میں بننے والی یہ تاریخی فلم ہندوستان کی آزادی سے پہلے کے دور کے پس منظر میں تیار کی جارہی ہے۔ ان دنوں فلم کی شوٹنگ ایسٹونیا میں جاری ہے، جہاں سے سامنے آنے والی تصویر نے فلم کے موضوع اور سائی کے کردار کے حوالے سے شائقین کی دلچسپی بڑھا دی ہے۔ تصویر میں اداکارہ ہاتھ میں جلتی ہوئی مشعل اٹھائے نظر آتی ہیں، جبکہ پس منظر میں احتجاج سے متعلق ایک بینر بھی دکھائی دے رہا ہے۔ ان کا یہ انداز اس بات کا اشارہ دیتا ہے کہ فلم میں ان کا کردار اپنے نظریات پر قائم رہنے والی اور کسی بڑے مقصد کے لیے جدوجہد کرنے والی خاتون کا ہوسکتا ہے۔

یہ بھی پڑھئے:آہان پانڈے کی اگلی فلم’ ’بے پروا‘‘ کا اعلان، شروری کے ساتھ پہلی بار جوڑی بنائیں گے

سائی ایم مانجریکر کے اس نئے روپ میں سادگی، مضبوط ارادے اور تاریخی دور کی جھلک نمایاں ہے۔ انہوں نے سفید رنگ کا پوری آستینوں والا بلاؤز، زمین تک لمبی گہری مرون اسکرٹ، گہرے رنگ کی جرابیں اور سفید جوتے پہن رکھے ہیں۔ کھلے بالوں اور چہرے پر عزم کے تاثرات کے ساتھ ان کی شخصیت فلم کے تاریخی ماحول سے ہم آہنگ دکھائی دیتی ہے۔ ان کا یہ انداز ان کے پہلے کے نسبتاً گلیمرس کرداروں سے مختلف ہے اور اس بات کی طرف اشارہ کرتا ہے کہ وہ اپنی اداکاری میں ایک نئی جہت پیش کرنے کی کوشش کر رہی ہیں۔

یہ بھی پڑھئے:بھونیشور کو توقعات کے دباؤ سے باہر نکلنا ہوگا: مورکل

’’دی انڈیا ہاؤس‘‘ کو آزادی سے پہلے کے ہندوستان کے تاریخی اور سیاسی ماحول سے جڑی کہانی کے طور پر پیش کیا جارہا ہے۔ فلم سے جاری ہونے والی پہلی جھلک میں سائی کا کردار احتجاج اور جدوجہد کے ماحول سے جڑا دکھائی دیتا ہے، تاہم ان کے کردار کی مکمل تفصیلات ابھی سامنے نہیں آئی ہیں۔ فلم سے وابستہ ایک قریبی ذرائع کے مطابق، سائی کا کردار ان کے اب تک کے کرداروں سے خاصا مختلف ہے اور اس میں گہرائی، مضبوطی اور کسی بڑے مقصد کے لیے کھڑے ہونے کا جذبہ نمایاں ہوگا۔رام چرن کی پروڈکشن میں بننے والی اس فلم سے شائقین کو تاریخی دور کی ایک اہم کہانی پردے پر دیکھنے کی امید ہے۔ سائی ایم مانجریکر کے پہلے لُک نے فلم کے بارے میں تجسس بڑھا دیا ہے، اب شائقین کو انتظار ہے کہ فلم میں ان کا کردار کہانی کو کس سمت لے جاتا ہے اور اداکارہ اپنی اداکاری سے کس طرح متاثر کرتی ہیں۔