فلمساز شیکھر کپور کا کہنا ہے کہ مصنوعی ذہانت (اے آئی)مستقبل میں فلمی صنعت کی معاشیات بدل سکتی ہے اور ایسے اے آئی اداکار سامنے آ سکتے ہیں جو نہ بیمار ہوں گے، نہ فیس بڑھانے کا مطالبہ کریں گے۔ انہوں نے دعویٰ کیا کہ اے آئی تخلیقی عمل کو عام لوگوں تک بھی پہنچا رہا ہے۔

معروف فلمساز شیکھر کپور نے نے حالیہ گفتگو میں کہا کہ اگر اے آئی تخلیقی اسٹار بن گیا تو وہ کبھی بیمار نہیں ہوگا، شوٹنگ پر آنے سے انکار نہیں کرے گا اور نہ ہی فیس میں اضافے کا مطالبہ کرے گا، کیونکہ اس کا مکمل کنٹرول اسٹوڈیو کے پاس ہوگا۔ ٹائمز ناؤ سے بات کرتے ہوئے انہوں نے کہا کہ ٹیکنالوجی فلم سازی کے بجٹ اور نظام الاوقات کو یکسر بدل سکتی ہے۔ ان کے مطابق اے آئی محض ایک ٹول نہیں بلکہ ’’نئے ہندوستان کی شروعات‘‘ ہے۔

یہ بھی پڑھئے: کینیڈی پر سینسر بورڈ کی قینچی، ڈونالڈ ٹرمپ کو’پمپ ٹرمپ‘، داؤد ابراہیم کو’پاکستان ڈان‘ سے بدلا

’’مسٹر انڈیا ۲‘‘ اور چیٹ جی پی ٹی کا حوالہ
شیکھر کپور نے ایک دلچسپ واقعہ بیان کیا کہ ان کے باورچی نے ان کے سامنے ’’مسٹر انڈیا‘‘ کے سیکوئل کا اسکرپٹ پیش کیا۔ جب انہوں نے پوچھا کہ یہ اتنا اچھا کیسے لکھا گیا، تو جواب ملا کہ اسے چیٹ جی پی ٹی نے تیار کیا ہے۔
یاد رہے کہ ۱۹۸۷ء کی کلاسک فلم میں انیل کپور، شری دیوی اور امریش پوری نے مرکزی کردار ادا کیے تھے۔ کپور کے مطابق اے آئی نے تخلیقی صلاحیت کو صرف صنعت تک محدود نہیں رکھا بلکہ عام لوگوں کے لیے بھی قابلِ رسائی بنا دیا ہے۔ انہوں نے کہا کہ بڑے بجٹ کی فلمیں اب اے آئی کی مدد سے بہت کم لاگت میں ممکن ہو سکتی ہیں۔

یہ بھی پڑھئے: عامر خان نے ’’او رومیو‘‘کی کہانی بدل دی ، ویلن کو مارنے کا پلان وشال نے بتا دیا

ڈجیٹل انفلوئنسرز پر دعویٰ
کپور نے یہ بھی دعویٰ کیا کہ دنیا بھر میں تقریباً ۵۰؍ فیصد خواتین ڈجیٹل انفلوئنسرز حقیقت میں اے آئی سے تخلیق کردہ ہو سکتی ہیں۔ ان کے مطابق اے آئی کے لیے خواتین کے چہرے تخلیق کرنا آسان ہے کیونکہ میک اپ کے ذریعے جلد کی تفصیلات زیادہ حقیقت پسندانہ بنائی جا سکتی ہیں۔
خیال رہے کہ شیکھر کپور کے بیانات نے فلمی صنعت میں اے آئی کے کردار پر نئی بحث چھیڑ دی ہے۔ اگرچہ اے آئی اداکاروں کا تصور پرکشش بھی ہے اور متنازع بھی، لیکن یہ واضح ہے کہ ٹیکنالوجی تخلیقی دنیا کی حدود کو تیزی سے بدل رہی ہے۔