موسیقی کےعلاوہ ترپاٹھی نے اداکاری میں بھی ہاتھ آزمایا۔ انھیں اداکاری کا پہلا موقع فلم ’رام بھکت ہنومان ‘(۱۹۴۸ء) نامی فلم میں ملا۔

آنجہانی شری ناتھ ترپاٹھی کئی خصوصیات اور صلاحیتوں کے مالک تھے۔ بہت سے فنکاروں نےہندوستانی فلمی صنعت میں نام اور بے شمار شہرت حاصل کی ہے لیکن چند ایک ہی ایسےہیں جو اس قدرصلاحیتوں کے مالک تھے۔ ایسے ہی ایک فنکار ایس این ترپاٹھی تھے۔ وہ بطور موسیقار ہر جگہ جانے جاتے ہیں لیکن ان کے اندر دیگر متعدد صلاحیتیں موجود تھیں۔ وہ موسیقار کے علاوہ اداکار، گلوکار، کہانی کار، اسکرین پلے رائٹر اور فلم ساز تھے۔ 
شری ناتھ ترپاٹھی۱۴؍ مارچ۱۹۱۳ءکو یوپی میں بنارس کے ایک برہمن گھرانےمیں پیدا ہوئے تھے۔ ان کے دادا پنڈت گنیش دت ترپاٹھی سنسکرت ودیا پیٹھ، بنارس کےپرنسپل تھے اور ان کے والد پنڈت دامودر دت ٹھاکر گورنمنٹ ہائی اسکول، بنارس کے پرنسپل تھے۔ انہوں نے بنارس سے بنیادی تعلیم حاصل کی۔ اس کے بعد الٰہ آبادسےانہوں نےبی ایس سی کیا۔ اور پھر وی این بھاتکھنڈے کے مورس کالج آف میوزک، لکھنؤ سے کلاسیکی موسیقی کی تربیت لی۔ انہوں نے ہلکی کلاسیکی اور لوک موسیقی کی تربیت مینا دیوی، لکھنؤ سے لی۔ انہوں نے’پریاگ سنگیت سمیتی ‘سے’سنگیت پروین‘اور مورس میوزک کالج سے’سنگیت وشارد‘ کی ڈگری حاصل کی۔ 
وہ بمبئی آئے اور۱۹۳۵ء وائلن بجانے والے کے طور پر بامبے ٹاکیزمیں کام کرنے لگے۔ اس کے بعد۱۰۰؍روپے ماہانہ پرمیوزک ڈائریکٹر سرسوتی دیوی کےاسسٹنٹ بن گئے۔ انہیں ۱۹۳۶ءمیں گلوکارکے طور پر جیون نیامیں پہلی مرتبہ اپنے فن کا مظاہرہ کرنے کا موقع ملا۔ ان کے پہلے گیت کے بول تھے’اے ری دیّالچک لچک چلو‘۔ جیون نیااشوک کمارکی بھی پہلی فلم تھی۔ انہوں نے۱۹۳۸ءمیں بامبے ٹاکیزچھوڑدی۔ بامبے ٹاکیز کے ساتھ ان کی آخری فلم بھابھی (۱۹۳۸)تھی۔ ۱۹۳۹ءمیں انہیں ’چندن‘میں بطور میوزک ڈائریکٹر کام کرنےکاموقع ملا۔ یہ فلم ۲؍سال بعد ۱۹۴۱ء میں ریلیز ہوئی۔ انہوں نے اپنا پہلا گانا’’ننھا سا دل دیتی ہوں ‘‘کمپوزکیا، جسے خود ترپاٹھی نےراجکماری کے ساتھ گایاتھا۔ انہوں نے بطور میوزک ڈائریکٹر پہلی کامیابی پنگھٹ(۱۹۴۳)سےحاصل کی۔ 
موسیقی کےعلاوہ ترپاٹھی نے اداکاری میں بھی ہاتھ آزمایا۔ انھیں اداکاری کا پہلا موقع فلم ’رام بھکت ہنومان ‘(۱۹۴۸ء) نامی فلم میں ملا۔ انھوں نےہنومان کا کردار اداکیا۔ انہوں نے اس دوران کئی فلموں میں اداکاری کی۔ لیکن بطور میوزک ڈائریکٹر اپناکریئر جاری رکھا۔ انہوں نے فلموں کے لیے کچھ خوبصورت گیت بنائے۔ ان فلموں میں اتر ابھیمنیو (۱۹۴۶)، رتن منجری(۱۹۵۵)، جنم جنم کے پھیرے (۱۹۵۷ء)، پکشی راج(۱۹۵۹ء)، رانی روپ متی (۱۹۵۹ء)، لال قلعہ (۱۹۶۰ء)، سنگیت سمراٹ تان سین(۱۹۶۲ء) شامل ہیں۔ 
ان کی ہدایت کاری میں بننے والی پہلی فلم۱۹۵۹ء کی’رام ہنومان یودھ‘ تھی۔ اس کےبعدانہوں نےکچھ اور فلموں کی ہدایتکاری کی، جیسے کہ کوی کالیداس(۱۹۵۹ء)، پکشی راج(۱۹۵۹ء)، رانی روپ متی (۱۹۶۰ء)، امرت منتھن (۱۹۶۱ء)، پیا ملن کی آس(۱۹۶۱ء)، سنگیت سمراٹ تان سین(۱۹۶۲ء)، شیو پاروتی (۱۹۶۲ء)، دیو کنیا (۱۹۶۳ء)، مہاراجہ وکرم(۱۹۶۵ء)، کنواری(۱۹۶۶ء)وغیرہ۔ 
موسیقی ترتیب دینے، اداکاری اور ہدایت کاری کے علاوہ انہوں نےکئی علاقائی فلموں کے لیے مکالمے اور کہانیاں بھی لکھیں۔ ان کا انتقال۲۸؍ مارچ۱۹۸۸ءکو ممبئی میں ہوا۔