بالی ووڈ اداکار سُشانت سنگھ راجپوت نہایت باصلاحیت انسان تھے اور وہ ایک ساتھ دونوں ہاتھوں سے لکھتے تھے

بالی ووڈ اداکار سُشانت سنگھ راجپوت نہایت باصلاحیت انسان تھے اور وہ ایک ساتھ دونوں ہاتھوں سے لکھتے تھے۔سُشانت سنگھ راجپوت ہمارے درمیان نہیں ہیں لیکن شائقین ان کی پرانی یادوں کو مسلسل تازہ کر رہے ہیں۔ سوشل میڈیا پر ہر روز سُشانت سنگھ راجپوت کی پرانی ویڈیوز اور تصاویر سامنے آرہی ہیں۔ لوگوں کو یہ یقین کرنا مشکل ہو رہا ہے کہ سُشانت نے خودکشی کرلی ہے اوروہ اس دنیا سے چلے گئے ہیں۔ ایک صارف نے اپنے ٹویٹر ہینڈل پر سُشانت سنگھ راجپوت کا ایک پرانا ویڈیو جاری کیا ہے۔ اس ویڈیو میں وہ اپنے دونوں ہاتھوں سے ایک ساتھ لکھتے ہوئے دکھائی دے رہے ہیں۔ سُشانت نے اپنی فلم ’چھچھورے‘ کے شریک اسٹار طاہر راج بھسین کا نام دونوں ہاتھوں سے ایک ساتھ لکھا ہے۔ اس کے بعد وہ بہت خوش دکھائی دے رہے ہیں۔ اس ویڈیو کو دیکھ کر آپ اندازہ لگاسکتے ہیں کہ سُشانت ملٹی ٹیلنٹیڈ تھے۔