مشہور فرنچائز ’’ٹومب ریڈر‘‘ کی نئی لائیو ایکشن سیریز سے لارا کروفٹ کی پہلی تصویر منظرِ عام پر آ گئی ہے۔ اس بار یہ کردار اداکارہ صوفی ٹرنر نبھا رہی ہیں۔ تصویر نے سوشل میڈیا پر بحث چھیڑ دی ہے، جہاں مداح نئے روپ کا موازنہ انجلینا جولی کے مشہور کردار سے کر رہے ہیں۔

مشہور ویڈیو گیم اور فلمی فرنچائز ’’ٹومب ریڈر‘‘ ایک مرتبہ پھر اسکرین پر واپسی کیلئے تیار ہے، اور اس بار لارا کروفٹ کے مرکزی کردار میں نظر آئیں گی معروف برطانوی اداکارہ صوفی ٹرنر۔ نئی لائیو ایکشن سیریز کی پہلی جھلک سامنے آتے ہی سوشل میڈیا پر زبردست ردِعمل دیکھنے میں آ رہا ہے۔ یہ سیریز ڈجیٹل پلیٹ فارم امیزون پرائم ویڈیو کے لیے تیار کی جا رہی ہے۔ جاری کی گئی تصویر میں صوفی ٹرنر کو کلاسیکی لارا کروفٹ کے روپ میں دکھایا گیا ہے، جہاں وہ سبز ٹینک ٹاپ، شارٹس، بیلٹ اور اسلحے کے ساتھ ایکشن کے لیے تیار نظر آتی ہیں۔ یہ انداز خاص طور پر ویڈیو گیم کے پرانے شائقین کے لیے مانوس اور یادگار محسوس ہو رہا ہے۔

یہ بھی پڑھئے: اے آر رحمان نے بالی ووڈ میں کام نہ ملنے پر اپنے غم اور غصے کا اظہار کیا

اگرچہ مداحوں کی ایک بڑی تعداد نے صوفی ٹرنر کی جسمانی تیاری اور مضبوط اسکرین موجودگی کو سراہا ہے، لیکن انٹرنیٹ پر ایک اور نام مسلسل زیرِ بحث رہا ، انجلینا جولی۔ انجلینا جولی نے ۲۰۰۱ء اور ۲۰۰۳ء میں لارا کروفٹ کا کردار ادا کیا تھا، اور ان کا انداز آج بھی اس کردار کے ساتھ جڑا ہوا سمجھا جاتا ہے۔ یہی وجہ ہے کہ نئی تصویر سامنے آتے ہی کئی صارفین نے پرانی فلموں کے مناظر شیئر کرتے ہوئے موازنہ شروع کر دیا۔ سوشل میڈیا پر کچھ شائقین کا کہنا ہے کہ صوفی ٹرنر کا روپ اصل ویڈیو گیم کے کردار کے زیادہ قریب ہے، جبکہ بعض کے نزدیک انجلینا جولی کی دلکشی اور کرشمہ اب بھی ناقابلِ فراموش ہے۔ تاہم کئی صارفین نے یہ بھی لکھا کہ ہر دور کی لارا کروفٹ کو اس کے اپنے تناظر میں دیکھنا چاہیے۔

یہ بھی پڑھئے: ادیتی راؤ حیدری وجے سیتھوپتی کے ساتھ پہلی بار کام کرنے کے تعلق سے پُرجوش

یہ نئی سیریز معروف مصنفہ اور پروڈیوسر فیبی والر برج کی تخلیقی نگرانی میں بنائی جا رہی ہے، جو مضبوط اور حقیقت پسند خواتین کرداروں کیلئے جانی جاتی ہیں۔ پروڈیوسرز کے مطابق، اس بار لارا کروفٹ کو صرف ایک ایکشن ہیرو کے طور پر نہیں بلکہ ایک جذباتی، ذہنی اور جسمانی جدوجہد سے گزرنے والی شخصیت کے طور پر پیش کیا جائے گا۔ فی الحال سیریز کی ریلیز تاریخ کا اعلان نہیں کیا گیا، تاہم پہلی جھلک نے یہ واضح کر دیا ہے کہ ٹومب ریڈر کا یہ نیا روپ شائقین کی توجہ حاصل کرنے میں کامیاب ہو چکا ہے۔ اب دیکھنا یہ ہے کہ کیا صوفی ٹرنر لارا کروفٹ کے کردار میں وہ اثر قائم کر پاتی ہیں جو برسوں پہلے انجلینا جولی نے چھوڑا تھا۔