ملاقات میں امریکی وزیر خارجہ مارکو روبیوبھی شریک، روس۔ یوکرین جنگ بندی سے متعلق مذاکرات پر گفتگو۔

امریکی نائب صدر جے ڈی وینس اور  یوکرینی صدر ولادیمیر زیلنسکی کے درمیان کچھ عرصہ پہلے وہائٹ ہائوس میں ہوئے مشہور جھگڑے کے بعد دونوں کی  ملاقات  ہوئی ہے۔ یہ ملاقات روم میں ہوئی ہے۔ زیلنسکی نے اعلان کیا ہے کہ انہوں نے استنبول مذاکرات پر تبادلۂ خیال کیا جہاں روسیوں نے ایک نچلے درجے کا وفد بھیجا جس کے پاس فیصلہ کرنے کا اختیار نہیں تھا۔ اس ملاقات میں امریکی وزیر خارجہ  مارکو روبیو بھی شریک تھے۔
انہوں نے ’ایکس‘ کے ذریعے وضاحت کی کہ امریکی حکام کے ساتھ ملاقات کے دوران انہوں نے حقیقی سفارت کاری کیلئے یوکرین کی آمادگی پر زور دیا اور جلد از جلد مکمل اور غیر مشروط جنگ بندی کی اہمیت پر زور دیا۔ وینس اور روبیو نے یہ بھی کہا ہے کہ ملاقات میں روس پر پابندیاں لگانے، دو طرفہ تجارت، دفاعی تعاون، میدان جنگ کی صورتحال اور مستقبل میں قیدیوں کے تبادلے کی ضرورت پر تبادلہ خیال کیا گیا۔انہوں نے کہا روس پر اس وقت تک دباؤ جاری رہنا چاہئے جب تک کہ وہ جنگ روکنے کیلئے تیار نہ ہو جائے۔ انہوں نے یہ بھی واضح کیا کہ انہوں نے منصفانہ اور پائیدار امن کے حصول کیلئے مشترکہ اقدامات پر تبادلہ خیال کیا۔