الامین جمال کے ’ایگو یمال‘ہیڈ بینڈ نے سوشل میڈیا پر دھوم مچا دی، جب اسپین کے اسٹار کھلاڑی نے فیفا ورلڈ کپ کے ایک بڑے مقابلے سے قبل تنقید کا منفرد انداز میں جواب دیا۔

اسپین کے نوجوان سپر اسٹار الامین جمال فیفا ورلڈ کپ کے نمایاں ترین کھلاڑیوں میں سے ایک رہے ہیں۔ اپنی شاندار ڈرِبلنگ، تخلیقی کھیل اور فیصلہ کن کارکردگی کی بدولت انہوں نے شائقین کو خوب متاثر کیا جبکہ اسپین نے بھی راؤنڈ آف ۱۶؍ میں جگہ بنا لی  تاہم، ان کی تیزی سے بڑھتی ہوئی شہرت کے ساتھ ساتھ ان پر تنقید بھی بڑھتی گئی۔ حالیہ مہینوں میں ۱۸؍ سالہ بارسلونا اسٹار کو سوشل میڈیا پر بعض مداحوں کی جانب سے غرور اور حد سے زیادہ خود اعتمادی کا مظاہرہ کرنے پر تنقید کا سامنا کرنا پڑا۔
آسٹریا کے خلاف اسپین کی شاندار فتح کے دوران جمال  نے بظاہر اپنے ناقدین کو منفرد انداز میں جواب دیا۔ وہ ایک ایسا ہیڈ بینڈ پہن کر میدان میں اترے جس پر ’’Ego Yamal‘‘ لکھا ہوا تھا، جس نے فوری طور پر سوشل میڈیا پر بحث چھیڑ دی۔ اس غیر معمولی ہیڈ بینڈ کو دیکھ کر مداح سوچنے لگے کہ آیا اس کے پیچھے کوئی خاص پیغام ہے یا یہ محض فیشن کا حصہ ہے۔ ہسپانوی ریڈیو اسٹیشن  کوپ  کے مطابق، یہ پیغام دراصل آن لائن ہونے والی تنقید کا جان بوجھ کر دیا گیا جواب تھا۔

یہ بھی پڑھئے:کیا``ہیٹ ۲" میں لیونارڈو ڈی کیپریو اور کرسچن بیل نظر آئیں گے؟

رپورٹ کے مطابق، یہ نعرہ’’ایگو الامین ‘‘ نامی اس لقب کی طرف اشارہ کرتا ہے جسے بعض ٹک ٹاک صارفین طنزیہ انداز میں استعمال کرتے ہوئے دعویٰ کرتے تھے کہ ہسپانوی کھلاڑی میں غرور آ گیا ہے۔ لیکن اس لیبل سے دوری اختیار کرنے کے بجائے، جمال  نے اسے قبول کرنے کا فیصلہ کیا۔ کوپ  نے کھلاڑی کے قریبی ذرائع کے حوالے سے بتایا’’تنقید کو نظر انداز کرنے کے بجائے،  الامین جمال نے اس لقب کو مزاحیہ انداز میں اپنا لیا ہے اور قومی ٹیم کے ایک اہم میچ میں فخر کے ساتھ اسے نمایاں کیا۔‘‘
یہ اقدام تیزی سے وائرل ہو گیا اور بہت سے مداحوں نے الامین جمال کی تعریف کی کہ انہوں نے ناقدین کو اپنی پہچان متعین کرنے کا موقع دینے کے بجائے اسی لقب کو اپنی طاقت بنا لیا جبکہ کچھ لوگوں نے اسے ایک اور مثال قرار دیا کہ کم عمری کے باوجود جمال کتنے پراعتماد اور پُرسکون ہیں حالانکہ ان پر غیر معمولی توجہ مرکوز ہے۔
جمال  نے عالمی فٹبال میں انتہائی تیزی سے ترقی کی ہے۔ وہ بارسلونا کے نمایاں ترین نوجوان کھلاڑیوں میں شمار ہوتے ہیں اور اسپین کی قومی ٹیم کے لیے بھی ایک اہم کردار ادا کر رہے ہیں۔ ان کی ہر کارکردگی، جشنِ فتح اور انٹرویو پر وسیع پیمانے پر گفتگو ہوتی ہے، جس کی وجہ سے ان کی شخصیت پر بحث بھی ان کی فٹبال صلاحیتوں کی تعریف کے ساتھ ساتھ جاری رہتی ہے۔

یہ بھی پڑھئے:مراکش شریک میزبان کنیڈا کو ۳؍گول سے رو ند کر کوارٹر فائنل میں داخل

 یہ نوجوان مسلسل شاندار کھیل پیش کر کے اپنے ناقدین کو خاموش کر رہے ہیں۔ آسٹریا کے خلاف فتح میں بھی انہوں نے اہم کردار ادا کیا، جس کے نتیجے میں اسپین نے آرام سے فیفا ورلڈ کپ کے راؤنڈ آف ۱۶؍ میں جگہ بنا لی۔ ان کی مسلسل عمدہ فارم نے انہیں ٹورنامنٹ کے سب سے نمایاں ستاروں میں شامل کر دیا ہے۔
اب جمال  کے سامنے اب تک کا سب سے بڑا امتحان ہے 
اسپین کا اگلا مقابلہ راؤنڈ آف ۱۶؍ میں پرتگال کے خلاف ہوگا، جہاں نوجوان جمال کا سامنا کرسٹیانو رونالڈو اور پرتگال کی ستاروں سے بھری ٹیم سے ہوگا۔ یہ مقابلہ ٹورنامنٹ کے سب سے زیادہ متوقع میچوں میں شمار کیا جا رہا ہے۔ اپنی شاندار کارکردگی اور جرات مندانہ ’’ایگو یمال ‘‘ پیغام کے بعد ایک بار پھر سب کی نظریں اس نوجوان سپر اسٹار پر ہوں گی کیونکہ اسپین ورلڈ کپ جیتنے کے اپنے مشن کو آگے بڑھانے کی کوشش کرے گا۔