بالی ووڈ میں آنے والے دنوں میں کئی نئی اور دلچسپ اداکار جوڑیاں بڑے پردے پر جلوہ گر ہونے والی ہیں۔ سلمان خان اور نین تارا سے لے کر رندیپ ہڈا اور شردھا کپور تک، جبکہ رنویر سنگھ اور کلیانی پریادرشن کی جوڑی بھی پہلی مرتبہ ایک ساتھ فلم میں نظر آئے گی۔ آنے والی فلموں میں مختلف اداکاری کے انداز، اپنی منفرد شناخت اور بڑی تعداد میں مداح رکھنے والے یہ ستارے جب ایک ساتھ دکھائی دیں گے تو ناظرین کے لیے یہ دیکھنا دلچسپ ہوگا کہ ان کی جوڑی پردے پر کیا کمال دکھاتی ہے۔(تصاویر:آئی این این)

سلمان خان اورنین تارا
آنے والی فلموں کی سب سے زیادہ زیرِ بحث نئی جوڑیوں میں سلمان خان اور نین تارا کی جوڑی شامل ہے۔ دونوں پہلی مرتبہ ایکشن ڈراما فلم ’’مونسٹر‘‘ میں ایک ساتھ نظر آئیں گے، جسے فی الحال SVC63 کا نام دیا گیا ہے۔ دونوں فنکاروں کی فلمی دنیا میں اپنی الگ شناخت اور ملک بھر میں  مداحوں کی بڑی تعداد ہے۔ سلمان خان اپنے مخصوص انداز اور زبردست اسکرین موجودگی کے لیے مشہور ہیں جبکہ نین تارا اپنی شاندار اداکاری اور مضبوط کرداروں کے ذریعے ناظرین کے دلوں میں جگہ بنا چکی ہیں۔ ایسے میں بڑے پیمانے پر بننے والی اس ایکشن فلم میں دونوں کو ایک ساتھ دیکھنا شائقین کے لیے خاصا دلچسپ ہوگا۔

رندیپ ہڈا اورشردھا کپور 
 رندیپ ہڈا اور شردھا کپور پہلی مرتبہ فلم ’’ایٹھا‘‘ میں ایک ساتھ اداکاری کرتے نظر آئیں گے۔ اس جوڑی کی خاص بات دونوں فنکاروں کے اداکاری کے مختلف انداز ہیں۔ رندیپ ہڈا اپنے جاندار کرداروں اور ہر طرح کے کردار میں ڈھل جانے کی صلاحیت کے لیے جانے جاتے ہیں، جبکہ شردھا کپور نے اپنی سادہ اور فطری اداکاری کے ساتھ مختلف نوعیت کے کرداروں کے ذریعے ناظرین میں خاص مقام حاصل کیا ہے۔ ایسے میں دونوں کو پہلی بار ایک ساتھ دیکھنا دلچسپی کا باعث ہوگا۔ شائقین کو انتظار رہے گا کہ دونوں کے منفرد اندازِ اداکاری پردے پر کس طرح ایک دوسرے کے ساتھ ہم آہنگ ہوتے ہیں۔

کارتک آرین اور سری لیلا 
کارتک آرین اور جنوبی ہند کی اداکارہ سری لیلا فلم ’’تو میری زندگی ہے‘‘ میں ایک ساتھ نظر آئیں گے۔ انوراگ باسو کی ہدایت کاری میں بننے والی اس رومانوی میوزیکل فلم کو بھوشن کمار کا ادارہ ٹی سیریز تیار کررہا ہے۔ یہ نئی جوڑی رومانوی کہانی میں ایک تازہ احساس پیدا کرنے کی توقع رکھتی ہے۔ کارتک آرین کا شوخ اور رومانوی انداز سری لیلا کی نوجوان توانائی کے ساتھ دیکھنے کو ملے گا۔ فلم میں محبت اور موسیقی کو اہمیت دی گئی ہے، جس کے باعث شائقین کو اس نئی جوڑی سے کافی امیدیں وابستہ ہیں۔

 آیوشمان کھرانہ اور شروری 
 آیوشمان کھرانہ اور شروری راج شری پروڈکشنز کی آنے والی خاندانی فلم’’یہ پریم مول لیا‘‘ میں پہلی مرتبہ ایک ساتھ نظر آئیں گے۔ راج شری پروڈکشنز اپنی فلموں میں خاندان، رشتوں اور جذبات سے جڑی کہانیوں کو پیش کرنے کے لیے معروف ہے۔ ایسے میں ان دونوں فنکاروں کا ایک ساتھ آنا خاص اہمیت رکھتا ہے۔ آیوشمان کھرانہ اپنی فطری اداکاری اور عام زندگی سے جڑے کرداروں کے لیے پسند کیے جاتے ہیں، جبکہ شروری نے اپنے منفرد انداز اور اداکاری کے ذریعے ناظرین کی توجہ حاصل کی ہے۔ دونوں کی پہلی مشترکہ فلم کو لے کر شائقین میں خاصا جوش ہے۔ اب یہ دیکھنا دلچسپ ہوگا کہ خاندانی اور جذباتی کہانی میں ان کی جوڑی کس طرح نظر آتی ہے۔ 

پربھاس اورترپتی ڈمری 
پربھاس اور ترپتی ڈمری کی جوڑی بھی آنے والی فلموں کی دلچسپ جوڑیوں میں شامل ہے۔ دونوں ہدایت کار سندیپ ریڈی وانگا کی فلم ’’اسپرٹ‘‘ میں ایک ساتھ نظر آئیں گے۔ یہ ایکشن تھرلر فلم ملک بھر کے ناظرین کو مدنظر رکھتے ہوئے تیار کی جارہی ہے۔ پربھاس کی ملک گیر سطح پر زبردست مقبولیت ہے اور وہ اپنے طاقتور کرداروں کے لیے جانے جاتے ہیں، جبکہ ترپتی ڈمری نے اپنی اداکاری کے ذریعے فلمی دنیا میں ایک خاص شناخت بنائی ہے۔ دونوں کی پہلی مشترکہ فلم کو لے کر شائقین میں کافی تجسس پایا جاتا ہے۔ خاص بات یہ ہے کہ بڑے پیمانے پر بننے والی اس ایکشن فلم میں ترپتی ڈمری کو ایک نئے اور مختلف انداز میں دیکھنے کا موقع ملے گا۔

اللو ارجن اوردپیکا پڈوکون 
اللو ارجن اور دپیکا پڈوکون کا ایک ساتھ آنا ہندوستانی سنیما کے بڑے اشتراک میں شمار کیا جارہا ہے۔ دونوں ہدایت کار ایٹلی کی زیرِ ہدایت بننے والی بڑے بجٹ کی سائنس فکشن ایکشن فلم ’’راکا‘‘ میں نظر آئیں گے، جسے سن پکچرز تیار کررہا ہے۔ ہندوستانی سنیما کے دو بڑے ستاروں کا پہلی مرتبہ ایک ساتھ کام کرنا اپنے آپ میں خاص اہمیت رکھتا ہے۔ اللو ارجن اپنے شاندار رقص، جاندار اداکاری اور منفرد انداز کے لیے مشہور ہیں جبکہ دپیکا پڈوکون اپنی خوبصورتی، بہترین اداکاری اور مضبوط اسکرین موجودگی کے لیے پہچانی جاتی ہیں۔ بڑے پیمانے پر تیار کی جانے والی اس سائنس فکشن ایکشن فلم میں دونوں کی جوڑی ناظرین کے لیے ایک نیا تجربہ ثابت ہوسکتی ہے۔ شائقین یہ دیکھنے کے لیے پُرجوش ہیں کہ دونوں ستاروں کے مختلف انداز پردے پر کس طرح ایک دوسرے کے ساتھ نظر آتے ہیں۔

رنویر سنگھ اورکلیانی پریادرشن 
رنویر سنگھ اور کلیانی پریادرشن آنے والی فلم ’’پرلے‘‘ میں پہلی مرتبہ ایک ساتھ دکھائی دیں گے۔ جے مہتا کی ہدایت کاری میں بننے والی یہ فلم دنیا کے خاتمے کے پس منظر میں ایکشن اور بقا کی جدوجہد پر مبنی تھرلر ہے۔ اس فلم میں دونوں فنکاروں کے اداکاری کے انداز ایک دوسرے سے کافی مختلف ہوں گے۔ رنویر سنگھ اپنی پُرجوش اداکاری اور توانائی سے بھرپور شخصیت کے لیے مشہور ہیں جبکہ کلیانی پریادرشن نے جنوبی ہندوستانی سنیما میں اپنی اداکاری کے ذریعے خاص پہچان بنائی ہے۔ خاص بات یہ ہے کہ پہلی بار ایک ساتھ آنے والی یہ جوڑی کسی رومانوی فلم کے بجائے ایک سنسنی خیز بقا کی کہانی میں نظر آئے گی۔ یہی پہلو اس فلم اور اس نئی جوڑی کو مزید دلچسپ بناتا ہے۔ شائقین کو امید ہے کہ دونوں فنکار اس فلم میں کچھ منفرد اور نیا پیش کریں گے۔