ملک کوعالمی سطح کے باوقار ایمی ایوارڈ دلانے والی پہلی ویب سیریز’دہلی کرائم‘ اپنے تیسرے سیزن کے ساتھ ناظرین تک پہنچ گئی ہے۔پہلے دو سیزن میں دہلی میں گھناؤنے نربھیا عصمت دری کیس اور’کچھا بنیان‘ گینگ کی تحقیقات کرنے کے بعد، اس بار یہ انسانی اسمگلنگ کے حساس مسئلے سے نمٹ رہا ہے۔

اس سیریز کا سلسلہ وہیں سے شروع ہوتا ہے جہاں سےپچھلے سیز میں ختم ہوا تھا،جہاں شمال مشرق میں تعینات ڈی آئی جی ورتیکا چترویدی (شیفالی شاہ)، ہتھیاروں سے لدے ٹرک کی رپورٹ کے بعدجب ٹرک رکواتی ہےتو اس میں سے ایک درجن نوجوان لڑکیاں برآمد ہوتی ہیں۔ ان نوجوان لڑکیوں کو نوکری دلانے کے بہانے دہلی اور ہریانہ لے جا کر فروخت کیا جاناتھا۔ ورتیکا اس ریکیٹ کو ختم کرنے کے لیے دہلی واپس آتی ہے۔ دریں اثنا، دہلی میں، ایک خاتون نے ۲؍ سالہ بچی، نور کو ایمس اسپتال میں مرتے ہوئے چھوڑ دیا، جس کی تحقیقات کے لیے اے سی پی نیتی سنگھ (رسیکا دگل)  کررہی ہے۔ جلد ہی، بے بی نور اور لڑکیوں کی اسمگلنگ کے دونوں کیس آپس میں ملے ہوئے دکھائی دیتےہیں۔ راہل (انشومن پشکر) اور کلیانی (میتا وششت)، جو بڑی دیدی (ہما قریشی) کے لیے کام کرتے ہیں، سامنے آتے ہیں۔ورتیکا نے اپنی اسپیشل ٹاسک فورس کے ساتھ مل کر دونوں معاملات کی تفتیش شروع کردی۔ اسمگلنگ کا یہ جال کہاں تک پھیلا ہوا ہے؟ ان لڑکیوں کا مستقبل کیسے خطرے میں ہے؟ بڑی دیدی کون ہے؟ یہ سب آپ کو ویب سیریز دیکھ کر پتہ چل جائے گا۔

تنوج چوپڑا کی ہدایت کاری میں بننے والی یہ سیزن سچے واقعات سے متاثر ہے اور اپنے موضوع کے اعتبار سے آپ کو جذباتی کردیتی ہے۔ان ضرورت مند نابالغ لڑکیوں کا جس طرح ہریانہ میں فروخت ہونے والی دلہن سے لے کر بیرون جنسی کارکن کے طور پر خرید و فروخت ہوتی ہے وہ دل دہلا دینے والا ہے۔ تاہم اس بار تفتیش میں پہلے جیسی گرفت، سنسنی اور سسپنس کا فقدان ہے۔

پوری سیریز میں کوئی چونکانےوالا موڑ نہیں ہے، جو مایوس کن ہے۔ ورتیکا کی ٹیم بھی آسانی سے ایک کے بعد ایک مجرموں کا سراغ لگاتی چلی جاتی ہے، اتنی ہی آسانی سے جیسے بڑی دیدی کی لڑکیاں کنٹینرمیں ایک ریاست سے دوسری ریاست تک سفر کرتی ہیں۔ مطلب، بڑی دیدی اور اس کے ساتھی وجے، گجرات میں ٹرپل مرڈر اور پولیس فائرنگ جیسے بڑے جرائم کرنےکے باوجود، لڑکیوں سے بھرے اتنے بڑے کنٹینر کے ساتھ ممبئی پہنچتے ہیں۔ سڑکوں پر کوئی ناکہ بندی، کوئی گشت نہیں،یہ خامیاں سیریز کو کمزور کرتی ہیں۔

اسی طرح اپنے شوہر سے ہراساں ہونے والی بڑی دیدی اتنے بڑےسیکس ریکیٹ کی ماسٹر مائنڈ کیسے بن گئی؟ اس کے ساتھی وجے اور کسم (سیانی گپتا) کون ہیں اور وہ ان سے کیسے ملی؟ ان پس منظر کی کہانیوں کو نظر انداز کرنا بھی مایوس کن ہے۔

اس بار ویب سیریز کی طاقت شیفالی شاہ اور ان کی ٹیم کی اداکاری ہے۔ شیفالی میڈم سر کے کردار میں یوں گھس جاتی ہے جیسے اس سے کبھی باہر ہی نہیں آئی ہو۔کئی جذباتی مناظرمیں کسی مکالمے کے بغیراس کا چہرہ ہی سب کچھ کہہ دیتاہے۔ اس دوران رسیکا دگل، راجیش تیلانگ، اور ادیتی سنگھ بھی اثر ڈالتے ہیں۔بڑی دیدی کی بات کریں تو ہما قریشی، جو اس سیزن کی خاص بات بنی ہیں، انہوں نے ہریانوی لہجے اور انداز کو بہت اچھی طرح سےادا کیا ہے، لیکن وہ اس کردار کو وہ گہرائی نہیں دےسکیں جس کی ضرورت کسی جذبات کو ابھارنے کے لیے درکار ہے۔ نہ ہی وہ کسی نفرت یا ہمدردی کو جنم دیتی ہے۔سیانی گپتا کا کردار بالکل بے معنی لگتا ہے، لیکن میتا وششت ایک چھوٹے سے کردار میں یقیناً یادگار ہے۔

مجموعی طور پر یہ ایک ایساکرائم ڈرامہ ہے جو دیکھنے کے قابل ہے۔ نیٹ فلکس پر’دہلی کرائم سیزن۳‘کو اس کے حساس موضوع اور شیفالی شاہ کی زبردست کارکردگی کے لیےدیکھا جاسکتا ہے۔